ఎస్‌ఎంసీ ఎన్నికలకు మోగిన గంట

ప్రభుత్వ పాఠశాలల నిర్వహణలో స్కూల్‌ మేనేజ్‌మేంట్‌ కమిటీ(ఎస్‌ఎంసీ) పాత్ర కీలకమైంది. ఆయా పాఠశాలల్లో చదివే విద్యార్థుల తల్లిదండ్రులు, సంరక్షకులతో ఏర్పాటు చేసే ఈ కమిటీల ఎన్నికల నిర్వహణకు ప్రభుత్వ ఆదేశాలతో రాష్ట్ర విద్యాశాఖ షెడ్యూల్‌ను విడుదల చేసింది.

• నేడు నోటిఫికేషన్‌ విడుదల.. 29న ఎన్నికలు
• షెడ్యూల్‌ విడుదల చేసిన విద్యాశాఖ
• ఉమ్మడి జిల్లా వ్యాప్తంగా 3,088 పాఠశాలల్లో ఎన్నికలు
• చేతులెత్తే విధానం, అవసరమైతే రహస్య బ్యాలెట్‌తో ఎన్నిక

రామగిరి, జనవరి 19 : ప్రభుత్వ పాఠశాలల నిర్వహణలో స్కూల్‌ మేనేజ్‌మేంట్‌ కమిటీ(ఎస్‌ఎంసీ) పాత్ర కీలకమైంది. ఆయా పాఠశాలల్లో చదివే విద్యార్థుల తల్లిదండ్రులు, సంరక్షకులతో ఏర్పాటు చేసే ఈ కమిటీల ఎన్నికల నిర్వహణకు ప్రభుత్వ ఆదేశాలతో రాష్ట్ర విద్యాశాఖ షెడ్యూల్‌ను విడుదల చేసింది. 30 నవంబర్‌ 2019 తర్వాత మళ్లీ ఈ నెల 20న నోటిఫికేషన్‌ విడుదల చేయనుండగా ఈ నెల 29న ఎన్నికల జరుగనున్నాయి. దాంతో పాఠశాలల్లో ఎన్నికల సందడి మొదలు కానున్నది. జిల్లా విద్యాశాఖాధికారి పర్యవేక్షణలో వీటి ప్రక్రియ కొనసాగనున్నది.

ఉమ్మడి జిల్లా వ్యాప్తంగా 3,088 పాఠశాలల్లో..

ఉమ్మడి నల్లగొండ జిల్లా వ్యాప్తంగా వివిధ ప్రభుత్వ యాజమాన్యాల పరిధిలోని 3,088 పాఠశాలల్లో ఎన్నికల నిర్వహణతో నూతన కమిటీలు ఏర్పాటు కానున్నాయి. ప్రభుత్వ, జిల్లా పరిషత్‌, కస్తూర్బా, మోడల్‌, యూఆర్‌ఎస్‌, టీఎస్‌ఆర్‌ఈఐఎస్‌, వివిధ శాఖల గురుకుల స్కూళ్లతోపాటు ఎయిడెడ్‌ పాఠశాలల్లో విద్యార్థుల తల్లిదండ్రులు, సంరక్షకులు ఓటర్లుగా ఈ ఎన్నికల్లో పాల్గొననున్నారు.

సుదీర్ఘ కాలం తర్వాత…

గతంలో 18 నవంబర్‌, 2019లో స్కూల్‌ మేనేజ్‌మెంట్‌ కమిటీ ఎన్నికకు షెడ్యూల్‌ విడుదల చేయగా 30 నవంబర్‌, 2019లో ఎన్నికలు నిర్వహించి కమిటీలను ప్రకటించారు. వీటి పదవీ కాలం 30 నవంబర్‌, 2021తో ముగియగా కొవిడ్‌ నేపథ్యంలో పాఠశాలల నిర్వహణ సాగలేదని తమకు న్యాయం చేసి మళ్లీ అవకాశం ఇవ్వాలని ఆయా కమిటీ సభ్యులు, చైర్మన్లు ప్రభుత్వానికి విన్నవించడంతో పదవీకాలం పొడగించారు. దాంతో ఆ కమిటీలు సుదీర్ఘకాలం పనిచేశాయి. తాజాగా ప్రభుత్వం మళ్లీ నూతన కమిటీల కోసం షెడ్యూల్‌ జారీ చేసింది.

షెడ్యూల్‌ ఇలా..

• 20న ఉదయం 10 గంటలకు ఎన్నిక నోటిఫికేషన్‌ను ఆయా పాఠశాలల ప్రధానోపాధ్యాయులు విడుదల చేస్తారు. అదే రోజు మధ్యాహ్నం 2గంటలకు అన్ని పాఠశాలల్లో తల్లిదండ్రుల ఓటర్ల జాబితా ప్రకటన
• 22న సాయంత్రం 4గంటల వరకు జాబితాపై అభ్యంతరాల స్వీకరణ
• 24న ఉదయం 11గంటలకు తుది జాబితా విడుదల
• విడుదల చేసి ఓటర్ల జాబితాలో 50శాతం మంది హాజరైతేనే ఎన్నిక ఉంటుంది. ఎన్నికలను చెతులెత్తే పద్థతిగానీ, వాయిస్‌ ఓట్‌ ద్వారా నిర్వహిస్తారు. అలా జరుగకుంటే రహస్య ఓటింగ్‌ చేస్తారు.
• 29న ఉదయం 7గంటల నుంచి మధ్యాహ్నం 1గంట వరకు ఎస్‌ఎంసీ సభ్యుల ఎన్నికల నిర్వహణ. ఎస్‌ఎంసీ సభ్యుల ఎన్నిక, చైర్మన్‌, వైస్‌ చైర్మన్‌ ఎంపిక ఉంటుంది. మధ్యాహ్నం 2గంటల నుంచి 4గంటల వరకు నూతన కమిటీ సమావేశం నిర్వహిస్తారు.

సభ్యుల ఎన్నిక ఇలా …

• ఎన్నికల్లో 1నుంచి 8వ తరగతి వరకు విద్యార్థుల తల్లిదండ్రులు పాల్గొంటారు. 9,10 తరగతులు చదివే విద్యార్థుల తల్లిదండ్రులకు కమిటీల్లో అవకాశం ఉండదు.
• ప్రతి తరగతికి ముగ్గురు సభ్యులను ఎన్నుకుంటారు. వీరిలో ఇద్దరు మహిళలు ఉండగా ఒకరు మాత్రం ప్రతి కూల పరిస్థితులు ఎదుర్కొంటున్న వారి పిల్లలు, అనాథ, ఎస్సీ, ఎస్టీ, వలస, వీధి బాలలు, ప్రత్యేకావసరాలున్న పిల్లల తల్లి లేదా తండ్రి ఉండాలి. మరొకరిని బీసీ, మైనార్టీకి చెందిన తల్లిదండ్రుల నుంచి ఒకరిని, మూడో వ్యక్తిని ఎవరినైనా ఎంపిక చేయవచ్చు.
• ప్రాథమిక పాఠశాలల్లో 5 తరగతులుంటే తరగతికి ముగ్గురు చొప్పున 15 మందిని, ప్రాథమికోన్నత పాఠశాలల్లో 7వ తరగతి వరకు ఉంటే 21 మందిని, 8వ తరగతి వరకు ఉంటే 24మంది సభ్యులను, ఉన్నత పాఠశాలల్లో 6, 7, 8 తరగతుల తల్లిదండ్రుల్లో 9మంది సభ్యులను ఎన్నుకోవాల్సి ఉంటుంది.
  ప్రధానోపాధ్యాయులే
• కన్వీనర్‌గా..

స్కూల్‌ మేనేజ్‌మెంట్‌ కమిటీలో ఆ పాఠశాల ప్రధానోపాధ్యాయులు కన్వీనర్‌గా వ్యవహరిస్తారు. మరో సీనియర్‌ ఉపాధ్యాయులు, వార్డు/కౌన్సిలర్‌/ఏఎన్‌ఎం, మహిళా సమాఖ్య అధ్యక్షురాలు, అంగన్‌వాడీ కార్యకర్త ఎక్స్‌ అఫిషియో సభ్యులుగా వ్యవహరిస్తారు. ఎన్నికైన సభ్యులతో పాటు ఆరుగురు ఎక్స్‌ అఫీషియో సభ్యులు, ఇద్దరు కోఆప్షన్‌ సభ్యులు ఉంటారు. ప్రాథమిక పాఠశాలల్లో ఎన్నికైన 15 మందితో పాటు ఆరుగురు ఎక్స్‌
అఫీషియో సభ్యులు, ఇద్దరు కోఆప్షన్‌ సభ్యులతో మొత్తం 23 మంది ఉంటారు.

ఏడో తరగతి వరకు ఉన్న ప్రాథమికోన్నత పాఠశాలల్లో 29 మంది, 8వ తరగతి వరకు ఉన్న పాఠశాలల్లో 32 మంది, హైస్కూళ్లలో మొత్తం 17 మంది సభ్యులుంటారు. ఆయా పాఠశాలల పరిధిలో విద్యావేత్త, పాఠశాల అభివృద్ధికి సహకరించే దాతలను ఎస్‌ఎంసీ కోఆప్షన్‌ సభ్యులుగా నియమించుకునే అవకాశం ఉంది. స్వచ్ఛంద సంస్థల ప్రతినిధి లేదా విద్యార్థుల్లో ఇద్దర్ని కోఆప్షన్‌ చేసుకోవచ్చు. గ్రామ పంచాయతీ సర్పంచ్‌, మున్సిపల్‌ చైర్మన్లు సమావేశాలకు హాజరయ్యే హక్కు ఉంటుంది.

షెడ్యూల్‌ ప్రకారం ఎస్‌ఎంసీల ఎన్నికలు

స్కూల్‌ మేనేజ్‌మెంట్‌ కమిటీ ఎన్నికల నిర్వహణకు చర్యలు తీసుకుంటున్నాం. ఈ నెల 20న ఆయా పాఠశాలల హెచ్‌ఎంలు నోటిఫికేషన్‌ జారీ చేస్తారు. నిబంధనల ప్రకారం ఓటర్ల జాబితా సిద్ధం చేసి వెల్లడించాల్సి ఉంటుంది. ఈ నెల 29న అన్ని పాఠశాలల్లో ఎన్నిక జరుగుతుంది. ఆ తర్వాత సభ్యుల, ఎక్స్‌ అఫీషియో , చైర్మన్‌ ఎంపిక పూర్తి చేసి తొలి సమావేశం నిర్వహించాల్సి ఉంటుంది.

-బి.భిక్షపతి, డీఈఓ, నల్లగొండ

ఎస్‌ఎంసీల విధులు ఇవే…

• గ్రామంలోని బడీడు పిల్లలను విధిగా పాఠశాలల్లో చేర్పించడం. విద్యార్థుల విద్యా సామర్థ్యాల పెంపునకు కృషి చేయడం.
• గ్రామాల్లోని దాతలు, ప్రజా ప్రతినిధుల నుంచి నిధులు సేకరించి విద్యార్థులకు ఆయా పాఠశాలల్లో మౌలిక సౌకర్యాలు కల్పించడం.
• ప్రతి మాసం సమావేశాలు ఏర్పాటు చేసి పాఠశాల అభివృద్ధికి కావాల్సిన ప్రణాళికలు తయారు చేసి అమలుకు చర్యలు తీసుకోవడం.
  ఉపాధ్యాయులు, విద్యార్థుల హాజరు విధానాన్ని పరిశీలించి, నిధులు సక్రమంగా ఖర్చుపెట్టేలా పర్యవేక్షణ చేయడం.
• మధ్యాహ్నం భోజనం పర్యవేక్షణ చేయడం.
• జిల్లా, రాష్ట్ర విద్యాశాఖ అధికారుల ఆదేశాలతో ప్రతి కార్యక్రమం అమలు చేయాల్సిన బాధ్యత ఎస్‌ఎంసీపై ఉంటుంది.