ఇలా నడుపుదాం.. ఇంధనం ఆదా చేద్దాం

పెట్రోల్‌, డీజిల్‌ ధరలు వాహనదారులకు దడ పుట్టిస్తున్నాయి. ఇట్లాంటి పరిస్థితుల్లో వాహనాలు నడపడంపై సరైన అవగాహన ఉంటే కొంత వరకు ఇంధనం పొదుపు చేసుకోవచ్చని నిపుణులు సూచిస్తున్నారు.

• పెరిగిన పెట్రోల్‌, డీజిల్‌ ధరలతో వాహనదారులు బెంబేలు
• పొదుపు మంత్రం పాటించాలంటూ నిపుణుల సూచనలు

సిటీబ్యూరో, నవంబర్‌ 13(నమస్తే తెలంగాణ):పెట్రోల్‌, డీజిల్‌ ధరలు వాహనదారులకు దడ పుట్టిస్తున్నాయి. ఇట్లాంటి పరిస్థితుల్లో వాహనాలు నడపడంపై సరైన అవగాహన ఉంటే కొంత వరకు ఇంధనం పొదుపు చేసుకోవచ్చని నిపుణులు సూచిస్తున్నారు. గ్రేటర్‌లో సొంత వాహనాలపై చాలా మంది ఆసక్తి ప్రదర్శిస్తున్నారు. ధరలు అందుబాటులోకి రావడం, రుణ సదుపాయం కల్పిస్తుండటం, రవాణాకు సౌకర్యంగా ఉండటంతో మధ్య తరగతి వారూ కార్ల వైపు మొగ్గు చూపుతున్నారు. ఈ పరిస్థితుల్లో వాహనాలు నడపడంపై అవగాహన పెంచుకుంటే మైలేజీతో పాటు వాహనాలు నాణ్యతగా ఉంటాయని చెబుతున్నారు.

ఈ సూచనలు పాటిద్దాం
కార్లు లీటరు పెట్రోల్‌కు 15 -25 కిలో మీటర్ల వరకు నడిచేవే. ఇంజిన్‌ ఆయిల్‌, కూలెంట్‌ స్థాయిని అప్పుడప్పుడు పరిశీలించుకుంటే మంచిది.

ఉత్పత్తి కంపెనీ సూచించిన ఇంజిన్‌ ఆయిల్‌ వినియోగిస్తే కారు ఎలాంటి ఇబ్బంది లేకుండా నడుస్తుంది.
గాలి, పెట్రోల్‌, ఇంజిన్‌ ఆయిల్‌ వడకట్టే ఫిల్టర్లు కారుకు ఎలాంటి సమస్యలు తలెత్తకుండా నడిచేందుకు ఉపయోగపడుతాయి. వాటిని ఎప్పటికప్పుడు సరిచూసుకోవాలి.
వాహనాన్ని పార్కింగ్‌ చేసినపుడు అద్దాలు కొంచెం కిందకు దింపినట్లయితే వాహనంలోని వేడిగాలి వెళ్లిపోయి కొత్తగాలి చేరుతుంది. దీనివల్ల అద్దాలపై ఒత్తిడి తగ్గుతుంది.
చాలా మంది కారు స్టార్ట్‌ అయి ముందుకు కదిలితే చాలు అనుకుంటారు. కార్ల కంపెనీ సూచనల మేరకు గాలి సరిగి ఉందా లేదా అనేది సరిచూసుకోవాలి. ప్యాచీ పడితే కానీ గాలి కొట్టని పరిస్థితి ఉండకుండా..టైర్లల్లో గాలి నిర్దేశించిన స్థాయిలో ఉంటే బండి సౌకర్యంగా ముందుకు సాగుతుంది. ఇది ఇంధన
పొదుపునకు ఉపయోగపడుతుంది.
వీల్స్‌ అలైన్‌మెంట్‌, బ్యాలెన్సింగ్‌ ఎప్పటికప్పుడు చెక్‌చేసుకోవాలి.

గేర్లపై అవగాహన అవసరం
గేరు మార్చడంలోనూ అవగాహన చాలా అవసరం. ఇష్టానుసారంగా గేరు మార్చకూడదు. క్లచ్‌ మీద కాలు ఒత్తి పెట్టి ఉంచకూడదు. కారు కదిలిన వరకే మొదటి గేరులో ఉండాలి. ట్రాఫిక్‌ ఎక్కువగా ఉన్నా రెండో గేరులో కారు నడుస్తుంది. ఎప్పుడైతే పూర్తిగా కారు ఆగిపోతుందో అప్పుడే మొదటి గేరు అవసరం. దిగువకు రహదారులన్నప్పుడు గేర్లోనే నడిపించాలి. ఈ పరిస్థితుల్లో న్యూట్రల్‌కు తీసుకురాకూడదు. కిందకు కారు దిగుతున్నప్పుడు ఇంజిన్‌ను ఎట్టి పరిస్థితుల్లోనూ ఆపకూడదు. రహదారుల మీద వాహనాలు నిలిచిపోయినప్పుడు లేదంటే ఎక్కువ సమయం సిగ్నళ్లు పడినప్పుడు కారు ఇంజిన్‌ను ఆపేయడం ఉత్తమం. పరిమితికి మించిన బరువు వాహనంలో లేకుండా చూసుకోవాలి.
– ప్రశాంత్‌, మెకానిక్‌

సమయానికి సర్వీసింగ్‌ ఇవ్వాలి
కారు అద్దాలు ఎప్పుడూ తెరవకుండా చూసుకోవాలి. అద్దాలు ఏమాత్రం కిందకు దించినా.. గాలి లోపలికి వెళ్లి కారు ముందుకు కదలడానికి ఎక్కవ శక్తి ఖర్చవుతోంది. అలాగే ఎండలో నిలిపిన కారు దాదాపు 10-15 నిమిషాలు ఏసీ వేస్తే తప్ప చల్లబడదు. ఫలితంగా ఇంధనం ఎక్కువ ఖర్చవుతుంది. నీడ చూసుకుని కారును పార్క్‌ చేస్తే మంచిది. సమయానికి సర్వీసింగ్‌ అనేది చాలా ముఖ్యం. – రాజు, కారు మెకానిక్‌