Visit:
Chiranjeevi | తెలుగు సినీ పరిశ్రమలో ఎలాంటి సినీ నేపథ్యం లేకుండా అడుగుపెట్టి.. తన ప్రతిభ, కష్టపడి పనిచేసే తత్వంతో అగ్ర కథానాయకుడిగా ఎదిగిన నటుడు మెగాస్టార్ చిరంజీవి. ఒక సామాన్య యువకుడిగా ప్రారంభమైన ఆయన సినీ ప్రయాణం ఎన్నో మైలురాళ్లను దాటుకుంటూ ఐదు దశాబ్దాలకు చేరువైంది. 1978 సెప్టెంబర్ 22న విడుదలైన ‘ప్రాణం ఖరీదు’ చిత్రంతో మొదలైన ఆయన సినీ ప్రస్థానం నేటితో 48 ఏళ్లు పూర్తి చేసుకుంది. ఈ సందర్భంగా చిరంజీవి తన సినీ ప్రయాణాన్ని గుర్తుచేసుకుంటూ అభిమానులతో పంచుకున్న భావోద్వేగ సందేశం ప్రత్యేకంగా నిలిచింది.
కొణిదెల శివశంకర వరప్రసాద్గా సినీ రంగంలోకి వచ్చిన చిరంజీవి.. వరుస అవకాశాలను అందిపుచ్చుకుంటూ తనకంటూ ప్రత్యేకమైన శైలిని ఏర్పరుచుకున్నారు. నటనతో పాటు నృత్యం, యాక్షన్, తెరపై ఆయన చూపించే హావభావాలు అప్పటి ప్రేక్షకులను విశేషంగా ఆకట్టుకున్నాయి. ముఖ్యంగా తెలుగు సినిమాల్లో కథానాయకుల నృత్యం, యాక్షన్ ప్రదర్శనకు చిరంజీవి ఒక కొత్త ఒరవడిని తీసుకొచ్చారు. కెరీర్లో ఎన్నో విజయాలను అందుకున్న చిరంజీవి.. అగ్ర కథానాయకుడిగా తన స్థానాన్ని సుస్థిరం చేసుకున్నారు. దక్షిణ భారత చిత్ర పరిశ్రమలో అత్యధిక పారితోషికం అందుకున్న కథానాయకుల్లో ఒకరిగా నిలవడంతో పాటు, బాక్సాఫీస్ వద్ద కూడా పలు కొత్త రికార్డులను నెలకొల్పారు. ఆయన సినీ సేవలకు గుర్తింపుగా భారత ప్రభుత్వం పద్మభూషణ్, పద్మవిభూషణ్ పురస్కారాలతో సత్కరించింది. నృత్యంలోనూ తన ప్రత్యేకతను చాటుకున్న చిరంజీవి గిన్నిస్ ప్రపంచ రికార్డును సైతం సొంతం చేసుకున్నారు.
సినీ ప్రస్థానానికి 48 ఏళ్లు పూర్తయిన సందర్భంగా చిరంజీవి తన అభిమానులను ఉద్దేశించి భావోద్వేగ సందేశాన్ని పంచుకున్నారు. ఇన్నేళ్ల ప్రయాణంలో ఎన్నో విభిన్న పాత్రలు పోషించానని, ఎన్నో విజయాలు, పురస్కారాలు, గౌరవాలను అందుకున్నానని ఆయన గుర్తుచేసుకున్నారు. తనపై నమ్మకంతో అవకాశాలు ఇచ్చిన నిర్మాతలకు, తనను విభిన్న కోణాల్లో ప్రేక్షకులకు పరిచయం చేసిన దర్శకులకు, సినిమాల కోసం తనతో కలిసి పనిచేసిన నటీనటులు, సాంకేతిక నిపుణులకు చిరంజీవి కృతజ్ఞతలు తెలిపారు. అయితే తన జీవితంలో అందుకున్న విజయాలు, పురస్కారాల కంటే అభిమానులు తనపై చూపించిన ప్రేమే ఎంతో గొప్పదని పేర్కొన్నారు. తనను తమ కుటుంబ సభ్యుడిగా ఆదరించిన ప్రతి అభిమానికీ కృతజ్ఞతలు తెలుపుతూ.. ‘చిరంజీవి’ అనే పేరు ఒకప్పుడు తాను పెట్టుకున్న పేరు మాత్రమేనని, కానీ అభిమానుల ప్రేమతో అది తనకు శాశ్వతమైన గుర్తింపుగా మారిందని చిరంజీవి భావోద్వేగంగా పేర్కొన్నారు. ఈ మాటలు అభిమానులను మరింత భావోద్వేగానికి గురిచేశాయి.
22 సెప్టెంబర్ 1978
ఆరోజు మొదలైన నా సినీ ప్రయాణం నేటితో 48 వసంతాలు పూర్తి చేసుకుంది.
ఈ 48 ఏళ్లలో ఎన్నో పాత్రలు పోషించాను. ఎన్నో విజయాలను చూశాను. ఎన్నో అవార్డులు, గౌరవాలు అందుకున్నాను.
ఈ సుదీర్ఘ ప్రయాణంలో నన్ను నమ్మి అవకాశాలు ఇచ్చిన ప్రతి నిర్మాతకు, నాలోని నటుడిని కొత్త కొత్త… pic.twitter.com/5wBJnXl3MP
— Chiranjeevi Konidela (@KChiruTweets) September 22, 2026
