విడి విత్తనాలు కొనొద్దు

• దళారులను నమ్మి మోసపోవద్దు..
• కంపెనీ విత్తనాలతో రైతులకు మేలు

నేరేడుచర్ల, జూన్‌ 30 : వానకాలం సీజన్‌ ప్రాంభమైంది. రైతులు పొలం పనుల్లో బిజీబిజీగా ఉన్నారు. విత్తనాలు కొనుగోలులో రైతులు అప్రమత్తంగా ఉండాలి. నాణ్యతలేని లూజ్‌ విత్తనాలు తీసుకుంటే నష్టపోయే ప్రమాదం ఉంది. లూజ్‌, కంపెనీ విత్తనాల్లో తేడా తెలుసుకోవాలి.

లూజ్‌ విత్తనాలతో

• ఈ విత్తనాలకు నాణ్యత ఉండదు.
• ఈ విత్తనాల తయారీలో కంపెనీ ధ్రువీకరణ, అధికారుల ప్రమేయం ఉండదు.
• వీటికి బిల్లు ఇవ్వరు. ప్రాసెసింగ్‌, శుద్ధి ఇతర ప్రమాణాలు ఉండవు.
• పూత, కాత దశలో ఏమైనా నష్టాలు జరిగితే రైతులకు న్యాయం జరుగదు.

కంపెనీ విత్తనాలు కొంటే..

• పూర్తి నాణ్యత ఉంటుంది.
• వీటి తయారీలో వివిధ దశల్లో కంపెనీ, ధ్రువీకరణ అధికారులు పాల్గొంటారు.
• విత్తనాలు కొనుగోలు చేసే సమయంలో బిల్లు ఇస్తారు.
• విత్తన తయారీలో ప్రాసెసింగ్‌, శుద్ధి, ఇతర నాణ్యతా ప్రమాణాలు పాటిస్తారు.
• వీటికి జన్యు నాణ్యత ఉంటుంది.
• వ్యవసాయ శాఖ లైసెన్సు పొందిన డీలర్లు మాత్రమే విక్రయిస్తారు.

రసీదు తప్పక తీసుకోవాలి

రైతులు వ్యవసాయ శాఖ అధికారులతో లైసెన్సు పొందిన డీలర్ల వద్దే విత్తనాలు కొనుగోలు చేసుకోవాలి. తప్పక రసీదు తీసుకోవాలి. పంట కాలం పూర్తయ్యే వరకు రసీదును భద్రంగా ఉంచుకోవాలి. రైతులు తొందర పడి దళారుల మాటలు నమ్మి మోసపోవద్దు. విత్తనాల కొనుగోలులో అనుమానం ఉంటే స్థానిక వ్యవసాయాధికారులను సంప్రదించాలి.