పాలేరుకు నీటిని తరలించుకుపోతున్నా సోయిలేని జిల్లా మంత్రులు

నల్లగొండ జిల్లా సాగర్‌ ఆయకట్టు ప్రాంత రైతాంగానికి నీళ్లు ఇవ్వకుండా ఖమ్మం జిల్లా పాలేరు రిజర్వాయర్‌కు నీటిని తరలించుకెళ్తున్నా జిల్లా మంత్రులు కోమటిరెడ్డి వెంకట్‌రెడ్డి, నలమాద ఉత్తమ్‌కుమార్‌రెడ్డికి సోయి లేకుండా పోయిందని మాజీ ఎమ్మెల్యే నల్లమోతు భాస్కర్‌రావు విమర్శించారు.

• మాజీ ఎమ్మెల్యే నల్లమోతు భాస్కర్‌రావు

మిర్యాలగూడ, జూలై 22 : నల్లగొండ జిల్లా సాగర్‌ ఆయకట్టు ప్రాంత రైతాంగానికి నీళ్లు ఇవ్వకుండా ఖమ్మం జిల్లా పాలేరు రిజర్వాయర్‌కు నీటిని తరలించుకెళ్తున్నా జిల్లా మంత్రులు కోమటిరెడ్డి వెంకట్‌రెడ్డి, నలమాద ఉత్తమ్‌కుమార్‌రెడ్డికి సోయి లేకుండా పోయిందని మాజీ ఎమ్మెల్యే నల్లమోతు భాస్కర్‌రావు విమర్శించారు. అక్రమంగా ఖమ్మం జిల్లాకు నీటిని తరలిస్తుంటే నిమ్మకు నీరెత్తినట్లు వ్యవహరించడం సిగ్గుచేటని పేర్కొన్నారు. సమృద్ధిగా వర్షాలు కురుస్తూ కృష్ణాలో పుష్కలంగా నీళ్లున్నా, శ్రీశైలం నుంచి 1.50లక్షల క్యూసెక్కుల నీరు వస్తున్నా ప్రభుత్వం నల్లగొండ జిల్లాకు నీళ్లు విడుదల చేయకుండా ఖమ్మం జిల్లా పాలేరు జలాశయాన్ని నింపడానికి నీటిని తరలిస్తున్నదని తెలిపారు. నల్లగొండ జిల్లాను ఎండబెట్టి ఖమ్మం జిల్లాకు ఇప్పటికి మూడుసార్లు నీటిని తరలించారని గుర్తుచేశారు. ఖమ్మం జిల్లాలో తాగునీటికి కొదువ లేకపోయినప్పటికీ మన రైతాంగానికి నీళ్లు ఇవ్వకుండా తరలించుకెళ్తూ ఇబ్బందులకు గురిచేస్తున్నారని పేర్కొన్నారు. ఇప్పటికైనా ప్రభుత్వం స్పందించి సాగర్‌ ఎడమ కాల్వకు నీటిని విడుదల చేసి నల్లగొండ జిల్లా ప్రాంతంతోపాటు మిర్యాలగూడ నియోజకవర్గ రైతులకు సాగునీరు అందించాలని సోమవారం ఒక ప్రకటనలో డిమాండ్‌ చేశారు.