బ్రూసెల్లోసిస్‌తో జర భద్రం

పాడి రైతుల సంక్షేమం కోసం తెలంగాణ ప్రభుత్వం పశువులకు వచ్చే వివిధ రకాల వ్యాధులకు నివారణ టీకాలను ఉచితంగా పంపిణీ చేస్తున్నది.

• ఆడ దూడలకు సోకుతున్న వ్యాధి
• మనుషులకూ వ్యాపిస్తున్న పరిస్థితి
• నివారణ టీకాతో జీవితకాలం ఇమ్యూనిటీ
• ఉచితంగా పంపిణీ చేస్తున్న ప్రభుత్వం
• అవకాశాన్ని పాడి రైతులు సద్వినియోగం చేసుకోవాలి
• తమ సూచనలు పాటించాలంటున్న పశువైద్యులు

నిజాంపేట,ఫిబ్రవరి7: పాడి రైతుల సంక్షేమం కోసం తెలంగాణ ప్రభుత్వం పశువులకు వచ్చే వివిధ రకాల వ్యాధులకు నివారణ టీకాలను ఉచితంగా పంపిణీ చేస్తున్నది. పాడిరైతులు వ్యవసాయరంగానికి అనుబంధంగా పశువులను పోషించుకుంటూ వాటి ఎరువుతో సేంద్రియ వ్యవసాయం చేస్తూ మంచి దిగుబడి సాధిస్తున్నారు. పశుసంపద గ్రామాల్లో ఇప్పుడిప్పుడే పెరుగుతున్న క్రమంలో ఈ మధ్య 4 నుంచి 8 నెలల వయస్సున్న ఆడ దూడల్లో బ్రూసెల్లోసిస్‌ వ్యాధి వేగంగా వ్యాపిస్తున్నది. ఈ వ్యాధి పశువులతో పాటు మనుషులకూ వ్యాపిస్తున్నది. దీని వల్ల పశువుల్లో గర్భస్రావం సమస్య ఏర్పడుతున్నది. వీటి నివారణకు స్థానికంగా ఉన్న పశువైద్యశాలలకు ఆడ దూడలకు తీసుకొచ్చి టీకాలను వేయించుకోవాలని పశువైద్యులు సూచిస్తున్నారు.

బ్రూసెల్లోసిస్‌ వ్యాధి లక్షణాలు

• పశువుల్లో గర్భాశయ సంబంధిత వ్యాధులు,తీవ్రమైన జ్వరం వస్తుంది.
• కీళ్లవాపులు,నొప్పులు, వృషణాల వాపు వస్తుంది. మగ పశువుల్లో ఈ వ్యాధి వల్ల సంపూర్ణ వంధత్వం కలుగుతుంది.
• సరిగ్గా ఆహారం తీసుకోలేవు.. ఫలితంగా ఒక్కసారిగా బరువు కోల్పోయి మరణం కూడా సంభవించవచ్చు.
• పశువుల కడుపులో 5 నెలల వయస్సు ఉన్న గర్భస్థ పిండం ఈ వ్యాధితో అబార్షన్‌ అవుతుంది.

తీసుకోవల్సిన జాగ్రత్తలు

• ఈ వ్యాధి చర్మం ద్వారా వ్యాప్తి చెందుతుంది కాబట్టి వ్యాధి సోకిన పశువులను సమూహం నుంచి వేరుగా ఉంచాలి.
• పశువులను కట్టివేసే పాకలను ఎప్పటికప్పుడూ శుభ్రంగా ఉంచుకోవాలి.
• దోమలు వృద్ధి చెందకుండా పొగపెట్టాలి.

పాడి రైతులు అప్రమత్తంగా ఉండాలి

పశువుల్లో బ్రూసెల్లోసిస్‌ వ్యాధి వ్యాపించకుండా అన్ని రకాల జాగ్రత్తలు తీసుకుంటున్నాం. వ్యాధి నియంత్రణకు కేంద్ర ప్రభుత్వం జాతీయ పశువ్యాధి నియంత్రణ కార్యక్రమం చేపట్టింది. పాడిరైతులకు ఈ వ్యాధి పట్ల పూర్తిగా అవగాహన కల్పిస్తున్నాం. ఆడ దూడలకు ఉచితంగా వ్యాధి నిరోధక టీకాలు వేసి వాటి చెవులకు ట్యాగ్‌ వేస్తున్నాము. ఈ టీకాను పశువులకు ఒక్క సారి వేస్తే చాలు జీవితకాలం మళ్లీ వ్యాధి రాదు. పాడి రైతులు అప్రమత్తంగా ఉండి ప్రభుత్వం కల్పిస్తున్న ఈ అవకాశాన్ని సద్వినియోగం చేసుకోవాలి.

-సుధాకర్‌ దేశ్‌ముఖ్‌, వెటర్నరీ డాక్టర్‌, నిజాంపేట

డాక్టర్ల సూచనలు పాటిస్తున్నా..
మా గ్రామంలో పశుసంపద పెంచేందుకు సుమారు రూ.5 లక్షల పెట్టుబడి పెట్టి మేడ్చల్‌, సిద్దిపేట, తూప్రాన్‌ పట్టణాల నుంచి 39 ఆడ దూడలను కొనుగోలు చేశాను. 4 నుంచి 8 నెలల వయసున్న ఆడ దూడలకు బ్రూసెల్లోసిస్‌ వ్యాధి వస్తున్నదని మా ఊరు పశువుల డాక్టర్‌ సుధాకర్‌తో చెప్పడంతో దూడలకు టీకాలు వేయించిన. ఇప్పుడు ఆరోగ్యంగా ఉన్నాయి. పశువులకు ఏ వ్యాధి వచ్చినా పశువుల డాక్టర్‌కు చూపించి వారి సూచనలు పాటిస్తున్నా.

-బక్కొల్ల బాగులు,పాడిరైతు,నిజాంపేట