22ఏలోని ఆస్తుల రిజిస్ట్రేషన్లు బంద్‌

సంగారెడ్డి జిల్లాలోని కోట్ల రూపాయల విలువ చేసే ఆస్తులు కాంగ్రెస్‌ ప్రభుత్వం 22-ఏ నిషేధిత జాబితాలోకి నెట్టింది. రెవెన్యూ అధికారుల నిర్లక్ష్యం, ప్రభుత్వ పర్యవేక్షణలోపం ఫలితంగా పటాన్‌చెరు, సంగారెడ్డి నియోజకవర్గాల్లోని నివాసగృహాలు, లేఔట్లు, వ్యవసాయ భూములు 22-ఏ నిషేధిత జాబితాలోకి చేరాయి.

• సంగారెడ్డి జిల్లాలో నిషేధిత జాబితాలో రూ.కోట్ల విలువైన ఆస్తులు
• బెంబేలెత్తుతున్న ప్రజలు
• రియల్‌ వ్యాపారంపై పిడుగు
• వందకుపైగా ఫిర్యాదులు
• అధికారులు మౌనం
• పట్టించుకోని ప్రభుత్వం
• కాంగ్రెస్‌ ప్రభుత్వంపై ప్రజల ఆగ్రహం

సంగారెడ్డి జిల్లాలోని కోట్ల రూపాయల విలువ చేసే ఆస్తులు కాంగ్రెస్‌ ప్రభుత్వం 22-ఏ నిషేధిత జాబితాలోకి నెట్టింది. రెవెన్యూ అధికారుల నిర్లక్ష్యం, ప్రభుత్వ పర్యవేక్షణలోపం ఫలితంగా పటాన్‌చెరు, సంగారెడ్డి నియోజకవర్గాల్లోని నివాసగృహాలు, లేఔట్లు, వ్యవసాయ భూములు 22-ఏ నిషేధిత జాబితాలోకి చేరాయి.

నివాసగృహాలు, గ్రామ కంఠాలు, పాత లేఔట్లు నిషేధిత జాబితాలో చేర్చారు. నివాసగృహాలు, వ్యవసాయేతర భూములను నివాసం అసైన్డ్‌, వక్ఫ్‌, దేవాదాయ, చెరువు శిఖం లేదా సీలింగ్‌ భూములుగా రికార్డుల్లోకి చేర్చారు. ఏండ్లగా నివాసం ఉంటున్న ఇండ్లు అకస్మాత్తుగా నిషేధిత జాబితాలో ప్రత్యక్షం కావడంతో సామాన్య ప్రజలు ప్రభుత్వ తీరుపై ఆగ్రహం వ్యక్తం చేస్తున్నారు. ప్రభుత్వ అనుమతులతో ఏర్పాటు చేసిన లేఔట్లు సైతం 22-ఏ నిషేధిత జాబితాలోకి చేరాయి.

సంగారెడ్డి, ఆగస్టు 19 (నమస్తే తెలంగాణ) : కాంగ్రెస్‌ ప్రభుత్వం అధికారంలోకి వచ్చిన తర్వాత రియల్‌ వ్యాపారం పడిపోయింది. తాజాగా ప్రభుత్వం ప్రైవేట్‌ ఆస్తులను సైతం 22ఏ జాబితాలో చేర్చడంతో రియల్‌ వ్యాపారం మరింత కుదేలు కావడంతో రియల్‌ఎస్టేట్‌ వ్యాపారులు ఆగ్రహం వ్యక్తం చేస్తున్నారు. పలు మండలాల్లోని వ్యవసాయ భూములు, అసైన్డ్‌భూములు, దేవాదాయ, వక్ఫ్‌భూములను సైతం నిషేధిత జాబితాలో చేర్చారు. దీంతో తమ భూములను నిషేధిత జాబితాలో చేర్చడంపై రైతులు ఆగ్రహం వ్యక్తం చేస్తున్నారు. 22ఏ విషయంలో అధికారులు మౌనం వహిస్తున్నారు. జాబితా వివరాలు వెల్లడించడం లేదు. పటాన్‌చెరు, సంగారెడ్డి నియోజకవర్గాల్లో ఓపెన్‌ ప్లాంట్లు, అపార్టుమెంట్ల క్రయవిక్రయాలు భారీగా నిలిచిపోయాయి. దీంతో రియల్‌ఎస్టేట్‌ రంగంపై తీవ్ర ప్రభావం పడింది.

పైసలు ఇస్తేనే 22ఏ నుంచి లైన్‌క్లియర్‌

హైదరాబాద్‌కు సమీపంలో ఉండటంతో పటాన్‌చెరు,సంగారెడ్డి నియోజకవర్గాల్లో రియల్‌ వ్యాపారం కొనసాగుతున్నది. ముఖ్యంగా పటాన్‌చెరు నియోజకవర్గంలో ఔటర్‌ రింగ్‌రోడ్డు చు ట్టూ అమీన్‌పూర్‌, బీరంగూడ, కొల్లూరు, పటాన్‌చెరు,ముత్తంగి తదితర ప్రాంతాల్లో వెంచర్లు వేసి విల్లాలు, ఆపార్టుమెంట్ల నిర్మాణం చేపట్టారు. ప్రభుత్వం బడా రియల్‌ఎస్టేట్‌ వ్యాపారుల వెంచర్లు ఉన్న వ్యవసాయేతర భూములను 22ఏ జాబితాలో చేర్చింది. దీంతో రియల్‌ఎస్టేట్‌ వ్యాపారులు తాముకట్టిన విల్లా లు, ఆపార్టుమెంట్ల రిజిస్ట్రేషన్లు నిలిచిపోవడంతో 22-ఏజాబితాలో తమ ప్రైవేట్‌ ఆస్తులను బయటకు తీసుకువచ్చేందుకు ప్రభుత్వంలోని మంత్రులు, ఉన్నతాధికారులను కలిస్తున్నారు.

22-ఏ జాబితా నుంచి పేర్లు తొలిగించాలంటే ప్రైవేట్‌ ఆస్తి విలువలో 30 శాతం డబ్బులు తమకు ఇవ్వాలని కాంగ్రెస్‌ ప్రజాప్రతినిధులు, ఉన్నతాధికారులు డిమాండ్‌ చేస్తున్నట్లు తెలిసింది. ప్రజాప్రతినిధులు, ఉన్నతాధికారులు కోరిన డబ్బులు ఇస్తే వారి ఆస్తులు రాత్రికిరాత్రి 22-ఏ నుంచి ఆస్తుల జాబితా తొలిగిపో యి రిజిస్ట్రేషన్లకు దారి క్లియర్‌ అవుతుంది. డబ్బులు లేని మధ్యతరగతి ప్రజలు, సామాన్యులు 22-ఏ జాబితా నుంచి తమ ఆస్తులను క్లియర్‌ చేయించుకునేందుకు తీవ్ర కష్టాలు పడాల్సి వస్తోంది.

జిల్లా అధికారుల మౌనం

22ఏ నిషేధిత జాబితా విషయంలో జిల్లా రెవెన్యూ, రిజిస్ట్రేషన్‌ యంత్రాంగం మౌనం వహిస్తోంది. 22ఏ నిషేధిత జాబితాలోని వివరాలను రెవెన్యూశాఖ బయటపెట్టడంలేదు. దీంతో అధికారుల తీరుపై విమర్శలు వ్యక్తమవుతున్నాయి. 22-ఏ జాబితాలోని ప్రైవేట్‌ ఆస్తుల జాబితాను ఆన్‌లైన్‌లో పొందుపర్చాలనే డిమాండ్‌ వినిపిస్తుంది. ఇదిలా ఉంటే 22-ఏ నిషేధిత జాబితా నుంచి తమ ప్రైవేట్‌ ఆస్తులు తొలిగించాలంటూ బాధితులు తహసీల్‌, ఆర్డీవో, కలెక్టర్‌కు ఫిర్యాదులు చేస్తున్నారు. 22ఏ నిషేధిత జాబితా నుంచి తమ పేర్లు తొలిగించాలంటూ 100 మందికిపైగా ఫిర్యాదులు ఇచ్చినట్లు తెలుస్తోంది.

22-ఏలోకి రూ. కోట్ల విలువైన ఆస్తులు

పటాన్‌చెరు నియోజకవర్గంలో రూ. కోట్లు విలువచేసే ప్రైవేట్‌ ఆస్తులు 22-ఏ నిషేధిత జాబితాలోకి చేర్చారు.

• అమీన్‌పూర్‌ మండలంలో 250 నుంచి 300 ఎకరాల వ్యవసాయేతర భూములు, 300 ఎకరాల వ్యవసాయ భూములు నిషేధిత జాబితాలో ఉన్నట్లు సమాచారం. అమీన్‌పూర్‌, బీరంగూడ డివిజన్‌ పరిధిలోని గ్రీన్‌ఫీల్ట్‌, మోడీకాలనీ, గ్రీన్‌మెడోస్‌, ప్రణీత్‌కౌంటీ కాలనీలు హెచ్‌ఏండీఏ అనుమతులతో ఏండ్ల క్రితం ఏర్పడ్డాయి. ఈ కాలనీలు ప్రస్తుతం 22ఏ జాబితాలో చేర్చినట్లు ఆ కాలనీవాసులు చెబుతున్నారు. నిషేధిత జాబితాలో తమ కాలనీలు ఉండటంతో రిజిస్ట్రేషన్‌శాఖ రిజిస్ట్రేషన్లు నిలిపివేసిందని కాలనీవాసులు ఆందోళన వ్యక్తం చేస్తున్నారు. అమీన్‌పూర్‌లోని ఐదుకుగాపై కొత్త వెంచర్లు కూడా నిషేధిత జాబితాలో చేర్చారు. దీంతో విల్లాలు, అపార్టుమెంట్ల రిజిస్ట్రేషన్లు నిలిచిపోయాయి. 22ఏ నిషేధిత జాబితా కారణంగా బ్యాంకులు గృహాలపై రుణాలను నిలిపివేస్తున్నాయి.
• పటాన్‌చెరు మండలంలో రూ.1000 కోట్లకుపైగా విలువచేసే ప్రైవేట్‌ ఆస్తులను నిషేధిత జాబితాలో చేర్చినట్లు సమాచారం. రామచంద్రాపురం మండలంలో కోట్ల విలువ చేసే ఎనిమిది ఎకరాల వ్యవసాయేతర భూమిని 22ఏ జాబితాలో చేర్చారు.
• గుమ్మడిదల మున్సిపాలిటీలోని సర్వేనెంబర్‌ 199లోని ఆరు ఎకరాల్లో ఇండ్లు నిర్మించుకున్నారు. ఆరు ఎకరాల్లోని నివాస గృహాలను 22-ఏ జాబితాలోకి చేర్చారు. అప్పులుచేసి ఇండ్లు కట్టుకుంటే కాంగ్రెస్‌ ప్రభుత్వం తమ ఇండ్లను నిషేధితజాబితాలో చేర్చడం అన్యాయమని ప్రకృతివనం కాలనీవాసులు ఆగ్రహం వ్యక్తం చేస్తున్నారు. గుమ్మడిదలలోని 261, 261/4 సర్వే నెంబర్‌లోని 15 ఎకరాల భూమి నిషేధిత జాబితాలో చేర్చారు. అనంతారం గ్రామంలోని 173, 174 సర్వేనెంబర్‌లోని వంద ఎకరాలకుపైగా వ్యవసాయభూములను నిషేధిత జాబితాలో చేర్చారు.
• సంగారెడ్డి నియోజకవర్గంలోని కంది, సంగారెడ్డి మండలాల్లో వందలకోట్ల విలువ చేసే ప్రైవేట్‌ ఆస్తులు, కంది మండలంలో 200 ఎకరాలకుపైగా వ్యవసాయేతర భూమిని 22-ఏ జాబితాలో చేర్చినట్లు తెలిసింది.