పచ్చిరొట్టతో ప్రయోజనాలెన్నో..

రసాయనాలు, ఎరువులు మోతాదుకు మించి వాడటం వల్ల భూమిలోని సారం పూర్తిగా తగ్గిపోయి పంటల దిగుబడులు పడిపోతున్నాయి. రసాయనాల వల్ల రైతులు పండించిన పంటలోనూ నాణ్యత లేకపోవడం, తద్వారా ఇవి తిన్న ప్రజలు అనారోగ్యం బారిన పడటం తరచూ జరుగుతోంది.

• సేంద్రియ పదార్థాలతో సూక్ష్మజీవులు వృద్ధి
• రసాయనఎరువులతో భూసారం కోల్పోయే ప్రమాదం
• పచ్చిరొట్ట ఎరువులతో భూమికి సత్తువ, అధిక దిగుబడులు
• రైతులకు అందుబాటులో జీలుగ, జనుము విత్తనాలు: ఏడీఏ మహేశ్‌
• జీలుగు, జనుము,పిల్లిపెసర సాగుతో భూమి సారవంతం

హుస్నాబాద్‌, మే 19: రసాయనాలు, ఎరువులు మోతాదుకు మించి వాడటం వల్ల భూమిలోని సారం పూర్తిగా తగ్గిపోయి పంటల దిగుబడులు పడిపోతున్నాయి. రసాయనాల వల్ల రైతులు పండించిన పంటలోనూ నాణ్యత లేకపోవడం, తద్వారా ఇవి తిన్న ప్రజలు అనారోగ్యం బారిన పడటం తరచూ జరుగుతోంది. రాష్ట్ర ప్రభుత్వం, వ్యవసాయ శాస్త్రవేత్తలు సేంద్రియ, సహజసిద్ధమైన పచ్చిరొట్ట ఎరువులను ఉపయోగించి పంటలు పండించాలని సూచిస్తున్నారు. సేంద్రియ ఎరువుల్లో ముఖ్యం గా వర్మీ కంపోస్టు, పశువుల పేడను వినియోగిస్తారు. వీటి తయారీకి అధిక ఖర్చయ్యే అవకాశం ఉన్నందున పచ్చిరొట్ట ఎరువులు అతితక్కువ ఖర్చుతో తయారు చేసుకోవచ్చని వ్యవసాయాధికారులు చెప్తున్నారు.

వానకాలం తొలకరి జల్లులు కురవగానే పచ్చిరొట్ట పైర్లను సాగు చేసినైట్లెతే వానకాలం పంట సాగు చేసుకునేటప్పటికీ ఎరువులు సిద్ధంగా ఉంటాయి. పచ్చిరొట్ట పైర్లలో 16రకాలు ఉంటాయి. ఇందులో జీలుగ, అవిశ, జనుము, వెంపల్లి, అలసంద, పిల్లిపెసర, పెసర, మినుము, గోడుచిక్కుడు, అజోల్ల, కానుగ, వేప, ైగ్లెసిడియా, జిల్లేడు, నేల తంగేడు, కొండ మిరుప తదితర రకాలు ఉన్నాయి. వరితో పాటు ఏ పంట సాగు చేసినా నత్రజని, భాస్వరం, పొటాష్‌ ఎరువులు అవసరం. ఇవి పచ్చిరొట్ట సాగు చేయడం ద్వారా పుష్కలంగా సమకూర్చుకునే అవకాశం ఉంది.

జీలుగ సాగు విధానం….

జీలుగ పంటను చౌడు, వరి పండించే భూముల్లో సాగు చేసినైట్లెతే మంచి ఫలితాలు ఉంటాయి. ఎకరానికి 20కిలోల విత్తనాలు అవసరమవుతాయి. మొక్కలు పెరిగి పూతదశకు వచ్చే సరికి 6 నుంచి 8టన్నుల పచ్చిరొట్ట లభిస్తుంది. వీటిని అదేపొలంలో కలియదున్ని మురగపెట్టినైట్లెతే 30 నుంచి 32కిలోల యూరియా లభిస్తుంది. ఈ పంటను సాగుచేయడం వల్ల పొలంలో వేయాల్సిన యూరియా కన్నా 30 నుంచి 32కిలోలు తక్కువగా వేసినా సరిపోతుంది. వీటిద్వారా 3.5శాతం నత్రజని, 0.6శాతం భాస్వరం, 1.2శాతం పొటాష్‌ లభిస్తుంది.

జనుము సాగు విధానం

జనుము సాగు చేసేందుకు ఒక ఎకరానికి 9నుంచి 14కిలోల విత్తనాలు అవసరం ఉంటాయి. దీని ద్వారా ఎకరానికి 5 నుంచి 6టన్నుల పచ్చిరొట్ట లభిస్తుంది. వీటిని పొలంలోనే కలియదున్నితే 24కేజీల యూరియా లభిస్తుంది. ఇందులోనూ 2.3శాతం నత్రజని, 0.5శాతం భాస్వరం, 1.8శాతం పొటాష్‌ ఉంటాయి.

పెసర, మినుము…

పెసర, మినుము పచ్చిరొట్టతో ఎకరానికి 15నుంచి 20కిలోల యూరియా వస్తుంది. వరిసాగు చేసే పొలాల్లో వీటిని వేసుకోవడం వల్ల అధిక లాభం ఉంటుంది. భారీగా నత్రజని కూడా లభిస్తుంది. పూతదశకు రాగానే పొలంలోనే దున్ని మురగపెడితే పచ్చిరొట్ట ఎరువు తయారవుతుంది. సహజసిద్ధ ఎరువు కావడంతో వరిధాన్యం నాణ్యతగా ఉండటంతోపాటు ఈ పంట ద్వారా వచ్చిన బియ్యం తిన్న ప్రజలు ఎంతో ఆరోగ్యంగా ఉంటారు.

అవిశ పంట సాగు…

అవిశ పంటకు ఎకరానికి 16కేజీల విత్తనాలు అవసరమవుతాయి. దీని ద్వారా సుమారు 40 కేజీల నత్రజని ఉత్పత్తి కావడం విశేషం. సెస్బానియం పచ్చిరొట్ట సాగు చేయాలనుకుంటే ఎకరానికి 16కేజీల విత్తనాలు వేసుకోవాలి. ఎకరం పొలానికి 70 కేజీల దాకా నత్రజని లభిస్తుంది.

అలసంద, పిల్లి పెసర పంట…

అలసంద సాగుకు ఎకరానికి 15కేజీల విత్తనాలు అవసరం ఉంటాయి. ఈ మొక్కలను పొలంలో కలియదున్నితే 60 కేజీల వరకు నత్రజని ఉత్పత్తి అవుతుంది. పిల్లిపెసర ఎకరానికి కేవలం 6కేజీల విత్తనాలు సరిపోతాయి. దీని ద్వారా ఏకంగా 40కేజీల నత్రజనిని పొలంలో ఉత్పత్తి చేసుకోవచ్చు.

పచ్చిరొట్ట ఎరువులను రెండు రకాలుగా తయారు చేసుకోవచ్చు…

• పచ్చిరొట్ట పంటలైన జనుము, జీలుగ, పిల్లిపెసర, ఉలవ, పెసర, అలసంద వంటి పైర్ల విత్తనాలు దుక్కిలో వెదజల్లాలి. అవి పెరిగిన తర్వాత 50శాతం పూత దశలో పొలంలో కలియదున్ని కుళ్లిన తర్వాత పంటను వేసుకోవాలి.
• వేప, నేలతంగేడు, కానుగ, గ్రైరిసిడిరియాకు సంబంధించిన మొక్కల ఆకులు, కొమ్మలను సేకరించాలి. వీటిని పొలంలో వేసి కలియదున్ని మురగనివ్వాలి. ఆ తర్వాత ప్రధాన పంటను వేసుకోవాలి.

సాగు విధానం…

పచ్చిరొట్ట ఎరువుల ఉపయోగాలు….

• పచ్చిరొట్ట పైర్లను పొలంలోనే కలియదున్నడం వల్ల సూక్ష్మజీవులు అధికంగా వృద్ధి చెందుతాయి. భూసారం పెరుగుతుంది.
• భూమిని గుల్లపరిచి నీటి నిల్వ సామర్థ్యం అధికం అవుతుంది.
• భూమిలో లభ్యంకాని రూపంలో ఉండే అనేక పోషకాలను లభ్యరూపంలోకి మారుస్తాయి.
• పచ్చిరొట్ట పైర్లు పువ్వు జాతి మొక్కలకు చెందినవి. కాబట్టి గాలిలోని నత్రజనిని పీల్చుకొని స్థిరీకరిస్తాయి.
• రైబోజియం అనే బ్యాక్టీరియా గాలిలోని నత్రజనిని మొక్క వేర్లలోని బొడిపెలలో నిల్వచేసి ఎకరానికి 25నుంచి 50కేజీల నత్రజనిని అందిస్తాయి.
• చౌడు భూముల పునరుద్ధరణకు జీలుగ, సీమ జీలుగ మొక్కలు ఎంతో ఉపయోగపడుతాయి.
• పచ్చిరొట్టతో భాస్వరం, గంధకం లభ్యత చాలా పెరుగుతుంది.
• రసాయన ఎరువులు ఉపయోగించడానికి బదులుగా పచ్చిరొట్ట సాగు చేస్తే ఎన్నో విధాలుగా ఉపయోగకరంగా ఉంటుంది.
• పెట్ట్టుబడి ఖర్చు తగ్గడంతో పాటు భూసారం పెరుగుతుంది.
• జింక్‌, మాంగనీసు, ఇనుము, క్యాల్షియం లాంటి సూక్ష్మధాతువులను పంటకు చేర్చుతాయి.
• నేల సహజ మిత్రులైన వానపాముల వృద్ధికి దోహదపడుతాయి.
• తుంగ, గరిక లాంటి గడ్డి మొక్కల పెరుగుదలను పచ్చిరొట్ట ఎరువులు అడ్డుకుంటాయి.
• నేలలో కరగని మూలకాలనూ కరిగించి పంటకు అనుకూలంగా మార్చుతాయి.
• సహజ సిద్ధంగా ఎరువులు లభిస్తుండటంతో పంటల్లో రసాయనాల శాతం కూడా తగ్గుతుంది. దీంతో వినియోగదారులకు స్వచ్ఛమైన ధాన్యం, మంచి ఆరోగ్యం లభిస్తుంది.

అందుబాటులో జీలుగ, జనుము విత్తనాలు

జీలుగ, జనుము విత్తనాలను ముందస్తుగానే రైతులకు అందుబాటులో ఉంచాం. ఇప్పటికే పలు స్టోర్లలో నిల్వ ఉంచాం. జీలుగ విత్తనాలకు కిలో ధర రూ. 93 ఉండగా ఇందులో రూ. 55.80 సబ్సిడీ పోను రైతు రూ. 37.20 చెల్లించాల్సి ఉంటుంది. 30కిలోల బస్తా చొప్పన ప్రస్తుతం విక్రయానికి ఉంచాం. జనుము విత్తనాలు కిలో ధర రూ. 90.50 ఉండగా ఇందులో ప్రభుత్వం రూ. 54.30 సబ్సిడీ ఇస్తుంది. రైతు చెల్లించే ధర రూ. 36.20 మాత్రమే. ప్రభుత్వం సబ్సిడీపై విత్తనాలు అందిస్తున్నందున రైతులు సద్వినియోగం చేసుకొని పచ్చిరొట్ట సాగు చేయడం ద్వారా అధిక దిగుబడులు పొందాలి. పూర్తి వివరాలకు వ్యవసాయాధికారులను సంప్రదించాలి.

– పి.మహేశ్‌, అసిస్టెండ్‌ డైరెక్టర్‌ ఆఫ్‌ అగ్రికల్చర్‌, హుస్నాబాద్‌