Ice Apple | తాటి ముంజ‌ల‌ను తింటున్నారా..? ఈ విష‌యాలను తెలుసుకోవాల్సిందే..!

వేసవికాలం అన‌గానే ముందుగా అంద‌రికీ గుర్తుకు వ‌చ్చేవి మామిడిపండ్లు. అంద‌రూ వీటిని తిన‌డానికి ఎక్కువ‌గా మ‌క్కువ చూపుతారు. కానీ అదే స‌మ‌యంలో రోడ్ల ప‌క్క‌న బండ్ల‌పై ల‌భించే ఇత‌ర పండ్ల‌ల్లో ఐస్ ఆపిల్ ఒక‌టి. వీటిని తెలుగులో ముంజ‌లు, తాటి పండ్లు అని అంటారు.

Ice Apple | వేసవికాలం అన‌గానే ముందుగా అంద‌రికీ గుర్తుకు వ‌చ్చేవి మామిడిపండ్లు. అంద‌రూ వీటిని తిన‌డానికి ఎక్కువ‌గా మ‌క్కువ చూపుతారు. కానీ అదే స‌మ‌యంలో రోడ్ల ప‌క్క‌న బండ్ల‌పై ల‌భించే ఇత‌ర పండ్ల‌ల్లో ఐస్ ఆపిల్ ఒక‌టి. వీటిని తెలుగులో ముంజ‌లు, తాటి పండ్లు అని అంటారు. వేస‌వి కాలంలో ల‌భించే ఈ ముంజ‌లు శ‌రీరానికి చ‌ల్ల‌ద‌నాన్ని ఇవ్వ‌డంతోపాటు ఆరోగ్యానికి కూడా ఎంతో మేలు చేస్తాయి. ముంజ‌లు తాటిచెట్టు నుండి ల‌భ్య‌మ‌వుతాయి. ముంజ‌లు పెద్ద కొబ్బ‌రికాయ‌లా క‌నిపిస్తాయి. బ‌య‌ట గ‌ట్టిగా న‌లుపు రంగు తొక్క క‌లిగి ఉంటాయి. ముంజ‌ల లోప‌ల తెల్ల‌ని రంగులో గుజ్జు ఉంటుంది. ఇవి నీటి శాతం ఎక్కువ‌గా క‌లిగి లిచి పండు కంటే మృదువుగా ఉంటాయి. ముంజ‌లు తాజా కొబ్బ‌రి నీటి రుచిని క‌లిగి త‌క్కువ గాఢంగా ఉంటాయి. వేస‌విలో వ‌చ్చే వ‌డదెబ్బ‌, డీహైడ్రేష‌న్ నుండి బ‌య‌ట‌ప‌డ‌డానికి వీటిని ఎక్కువ‌గా తీసుకుంటూ ఉంటారు. ఇవి ఎక్కువ కాలం ల‌భించ‌వు. మార్చి నుండి జూన్ వ‌ర‌కు మాత్ర‌మే ల‌భిస్తాయి. వీటిలో నీటి శాతం ఎక్కువ‌గా ఉండ‌డం వ‌ల్ల త్వ‌ర‌గా పాడ‌వుతాయి. క‌నుక వీటిని ఎక్కువ‌గా దూర ప్రాంతాల‌కు త‌ర‌లించ‌రు. రోడ్ల ప‌క్క‌న ఎక్కువ‌గా అమ్ముతూ ఉంటారు.

అనేక పోష‌కాలు..

ఇక వీటిని తీసుకోవ‌డం వ‌ల్ల ఆరోగ్యానికి మేలు క‌లుగుతుంద‌ని చెప్ప‌వ‌చ్చు. వీటిలో నీటి శాతం ఎక్కువ‌గా ఉంటుంది. క‌నుక శ‌రీరానికి అవ‌స‌ర‌మైన నీటిని అందించ‌డంలో ఇవి ఎంతో స‌హాయ‌ప‌డ‌తాయి. వీటిలో స‌హ‌జ చ‌క్కెర‌లు ఉంటాయి క‌నుక ముంజ‌ల‌ను తీసుకోవ‌డం వ‌ల్ల త‌క్ష‌ణ శ‌క్తి ల‌భిస్తుంది. ముంజ‌ల్లో ఫైబ‌ర్, ప్రోటీన్, విట‌మిన్ ఎ, సి, ఇ, కె ల‌తో పాటు ఐర‌న్, ఫాస్ప‌ర‌స్, పొటాషియం వంటి పోష‌కాలు ఉంటాయి. ఆయుర్వేదంలో తాటిపండును శ‌రీర ఉష్ణాన్ని త‌గ్గించే పండుగా పేర్కొంటారు. వీటిని తీసుకోవ‌డం వ‌ల్ల ఆమ్ల‌త్వం, హీట్ రాషెస్, డీహైడ్రేష‌న్ వ‌ల్ల క‌లిగే త‌ల‌నొప్పి వంటి స‌మ‌స్య‌లు త‌గ్గుతాయి. వీటిలో తక్కువ క్యాల‌రీలు ఉంటాయి క‌నుక వేసవిలో తేలిక‌పాటి స్నాక్స్ గా వీటిని తీసుకోవ‌చ్చు.

వెంట‌నే తినేయాలి..

అలాగే ముంజ‌ల‌ను కొన్న రోజే తిన‌డం మంచిది. ముంజ‌ల‌పై ఉండే స‌న్న‌ని తొక్క‌ను తీసేసి తినాలి. కొంద‌రు వీటిపై బ్లాక్ సాల్ట్ వేసి తీసుకుంటారు. ఫ్రిజ్ లో ఉంచి చ‌ల్ల‌గా అయిన త‌రువాత కూడా వీటిని తీసుకోవ‌చ్చు. అలాగే వేస‌వికాలంలో ముంజ‌ల‌తో చ‌ల్ల‌టి డెజ‌ర్ట్స్ కూడా తయారు చేసి తీసుకోవ‌చ్చు. ఎల్ల‌ప్పుడూ తాజాగా, మృదువైన ముంజ‌ల‌ను చూసి కొనుగోలు చేయాలి. చాలా గ‌ట్టిగా ఉన్న ముంజ‌లు ఎక్కువ‌గా పండిపోయే అవ‌కాశం ఉంది. అలాగే వీటిని కొనుగోలు చేసిన వెంట‌నే తిన‌డం మంచిది. ఫ్రిజ్ లో కూడా ఇవి ఎక్కువ కాలం నిల్వ ఉండవు. ఫ్రిజ్ లో ఉంచ‌డం వ‌ల్ల కేవ‌లం ఒక‌టి నుండి రెండు రోజులు మాత్ర‌మే ఇవి నిల్వ ఉండే అవకాశం ఉంది. ఈ విధంగా వేస‌విలో ల‌భించే ఈ ముంజ‌లు ఆరోగ్యానికి ఎంతో మేలు చేస్తాయని, వేస‌విలో మామిడిపండ్ల‌తో పాటు వీటిని కూడా తీసుకునే ప్ర‌య‌త్నం చేయాల‌ని వైద్యులు సూచిస్తున్నారు.