రైతుల్లో రుణమాఫీ రందీ

రైతుల్లో రుణమాఫీ టెన్షన్‌ వెంటాడుతోంది. మా రుణాలు మాఫీ అవుతాయా..? కావా..? అనే ఆందోళన రైతుల్లో నెలకొంది. అన్ని అర్హతలు ఉన్నప్పటికీ, రెండు విడుతల్లోనూ రుణమాఫీ జాబితాలో తమ పేర్లు లేవని రైతులు వాపోతున్నారు.

• అధికారులు, బ్యాంకుల చుట్టూ తిరుగుతున్న రైతన్నలు
• గ్రీవెన్స్‌కు వెల్లువలా ఫిర్యాదులు
• రైతుల్లో మాఫీ అవుతుందో.? లేదో..? అన్న టెన్షన్‌
• సహకార బ్యాంకు రుణాల్లో అంతా గందరగోళం
• ప్రభుత్వ కటాఫ్‌తో చాలామంది రైతులకు రుణమాఫీ కట్‌
• రేషన్‌ కార్డు, టెక్నికల్‌ సమస్యలతో మాఫీ గందరగోళం
• రుణం ఉన్నప్పటికీ రుణ ఖాతా లేదని సాకులు చెబుతున్న బ్యాంకు అధికారులు

సిద్దిపేట, ఆగస్టు 5(నమస్తే తెలంగాణ ప్రతినిధి) : రైతుల్లో రుణమాఫీ టెన్షన్‌ వెంటాడుతోంది. మా రుణాలు మాఫీ అవుతాయా..? కావా..? అనే ఆందోళన రైతుల్లో నెలకొంది. అన్ని అర్హతలు ఉన్నప్పటికీ, రెండు విడుతల్లోనూ రుణమాఫీ జాబితాలో తమ పేర్లు లేవని రైతులు వాపోతున్నారు. సిద్దిపేట, మెదక్‌, సంగారెడ్డి జిల్లాల్లోని వేలాది మంది రైతులు రుణమాఫీ కోసం ఎదురు చూస్తున్నారు. తమకు రుణమాఫీ ఎందుకు కాలేదని అధికారులు, బ్యాంకుల చుట్టూ తిరుగుతున్నారు.

ఒకే ఇంటి పేరుతో ఉన్న రైతులను ఒకే కుటుంబంగా చూపుతున్నారన్న విమర్శలు సైతం ఉన్నాయి. కొన్ని గ్రామాల్లో రేషన్‌ కార్డు ఉన్నప్పటికీ ఆ కుటుంబానికి రుణమాఫీ కాలేదు. ఇంకో కుటుంబంలో ఇద్దరి పేర్ల మీద రుణాలు ఉంటే అందులో ఒక్కరు ఇదివరకు బ్యాంకులో రుణం క్లోజ్‌ చేస్తే ఆ రైతుకు రుణమాఫీ వచ్చినప్పటికీ బ్యాంకు అధికారులు ఇవ్వడం లేదు.

ఎందుకంటే రుణ ఖాతా క్లోజ్‌ అయింది నీకు రుణమాఫీ డబ్బులు ఇవ్వమని చెబుతున్నారు. రాష్ట్ర ప్రభుత్వం పెట్టిన గడువులో ఆ రైతుకు రుణమాఫీ వచ్చిందని మెసెజ్‌ సైతం వచ్చింది. బ్యాంకు అధికారులు ముప్పు తిప్పలు పెడుతున్నారు. ఇలా ఎంతోమంది రైతులు నష్టపోతున్నారు. సహకార బ్యాంకుల్లో తీసుకున్న రుణాలకు మాఫీ రావడం లేదని పలువురు రైతులు తెలుపుతున్నారు. రైతుల నుంచి అధికారులు దరఖాస్తులు తీసుకుంటున్నారు. కానీ మాఫీ అయితదా..? లేదా..? అని రైతుల్లో ఆందోళన నెలకొన్నది.

సహకార బ్యాంకుల్లో అంతా గందరగోళం

సార్‌.. మాకెందుకు రుణమాఫీ కాలేదు. మేమేమి తప్పు చేశాం…అంటూ రైతులు గొల్లుమంటున్నారు. సహకార బ్యాంకుల్లో రైతులు తీసుకున్న రుణాలు అంతా గందరగోళంగా ఉన్నాయి. అర్హత ఉన్న చాలా మంది రైతులకు రుణాలు మాఫీ కాలేదు. ఇదేంటని సొసైటీ అధికారులను అడిగితే సరైన సమాధానం రావడం లేదు. ఏదేదో సాకులు చెప్పి తప్పించుకునే ప్రయత్నం చేస్తున్నారు.

మొత్తంగా 50శాతం రుణాలు కూడా మాఫీ కాలేదని రైతులు వాపోతున్నారు. సంగారెడ్డి జిల్లాలో 37 సొసైటీల్లో 22,086 మంది రైతులు రూ.212.46 కోట్లు రుణాలు తీసుకున్నారు. వీరిలో తొలి విడుత 6,090 మంది రైతులకు రూ.25.13 కోట్లు, రెండో విడుతలో 2,134 మంది రైతులకు రూ.21. 02 కోట్లు, మెదక్‌ జిల్లాలో 31 సొసైటీల్లో 29,519 మంది రైతులు రూ.153.76 కోట్లు రుణాలు తీసుకున్నారు. వీరిలో తొలి విడుతలో 9,271 మం దికి రూ.34.39 కోట్లు, రెండో విడుతలో 2,599 మంది రైతులకు రూ.18.61 కోట్లు, సిద్దిపేట జిల్లాలో15 సొసైటీల్లో 11,980 మంది రైతులు రూ.85.17 కోట్ల రుణాలు తీసుకున్నారు.

వీరిలో తొలి విడుతలో 4,193 మందికి రూ. 15.69 కోట్లు, రెండో విడుతలో 1,345 మంది రైతులకు రూ. 10.74 కోట్ల రుణమాఫీ వచ్చింది. ఇంకా ఉమ్మడి జిల్లాలో చాలామంది రైతులకు రుణమాఫీ కాలేదు. దీంతో రైతులు ఆయా సహకార బ్యాంకుల చుట్టూ తిరుగుతున్నారు. తమకు రుణమాఫీ అవుతుందా…? లేదా అని వారిలో ఆందోళన నెలకొన్నది. ఉమ్మడి మెద క్‌ జిల్లాలోని కొన్ని సొసైటీల లెక్కలు చూస్తే చాలామంది రైతుల రుణాలు మాఫీ కాలేదని అర్ధమవుతుంది.

• చేర్యాల సహకార సంఘంలో 1,001మంది రైతులు ఉన్నా రు. వీరిలో 508 మందికి రూ.కోటి మాఫీ అయింది. ఇంకా 493 మందికి రుణమాఫీ కావాల్సి ఉంది. రెండో విడుతలో లక్షన్నరలోపు రుణాలు తీసుకున్నవారు 170 మంది రైతులు ఉన్నారు. వీరిలో 154 మందికి రుణమాఫీ అయ్యింది. ఇంకా 16 మందికి రుణమాఫీ కాలేదు. దీంతో రైతులు తమకు రుణమాఫీ అవుతుందా..? కాదా అని దిగాలుగా చూస్తున్నారు.
• హుస్నాబాద్‌ సహకార బ్యాంకులో రుణాలు తీసుకున్న రైతులు 977 మంది ఉన్నారు. వీరిలో లక్ష రూపాయల రుణాలకు 57 5 మంది అర్హులు కాగా, వీరిలో 308 మందికి మాత్రమే రుణమాఫీ అయ్యింది. ఇంకా 267 మందికి రుణమాఫీ కాలేదు. రెండో విడుతలో లక్షన్నరలోపు రుణం తీసుకున్న వారు 248 మంది రైతులు. ఇందులో కేవలం 178 మందికి మాత్రమే రుణమాఫీ జరిగింది. ఇంకా 70 మంది ఉన్నారు.
• పటాన్‌చెరు మండలం రుద్రారం గ్రామంలోని పీఏసీఎస్‌లో ఒక్కరికి కూడా రుణమాఫీ కాలేదు. ప్రభుత్వం ప్రకటించిన కటాఫ్‌లో ఈ బ్యాంకుల్లో ఒక్కరు కూడా లేరు. 2014 నుంచి 2018 వరకు అప్పటి బీఆర్‌ఎస్‌ ప్రభుత్వం 30 మంది రైతులకు రూ.19.80 లక్షలను మాఫీ చేసింది. ఈ సొసైటీలో ఇంకా రుణమాఫీ కాని రైతులు 604 మంది ఉన్నారు.
• సిద్దిపేట సొసైటీలో 943 మంది రైతులు ఉన్నారు. తొలి విడుతలో 724 మంది రైతులకు గానూ 181 మందికి రూ.48 లక్షల రుణమాఫీ వచ్చింది. రెండో విడుతలో 143 మందికి 87 మందికి మాత్రమే రూ.47 లక్షల రుణమాఫీ అయింది. దుబ్బా క సొసైటీలో రుణాలు తీసుకున్న రైతులు 950మంది. తొలి విడుతలో 305 మందికి రూ.1.27 కోట్లు, రెండో విడుతలో 109 మంది రైతులకు రూ.83 లక్షలు మాఫీ అయింది.
• గజ్వేల్‌ సొసైటీలో మొత్తం రైతులు 751మంది కాగా తొలి విడుతలో 381 మంది రైతులకు రూ.1.36 కోట్లు మాఫీ వచ్చింది. రెండో విడుతలో 107 మంది రైతులకు గానూ 99 మందికి మాత్రమే రుణమాఫీ వచ్చింది. రుణమాఫీ కాని రైతులంతా సొసైటీ బ్యాంకుల చుట్టూ తిరుగుతున్నారు.

రుణమాఫీ కొందరికేనా..?

రాష్ట్ర ప్రభుత్వం రైతులకు మూడు విడుతలుగా రుణమాఫీ చేస్తామని చెప్పింది. అందులోభాగంగా ఇటీవల రెండు విడుతల్లో లక్షన్నరలోపు రుణాలను మాఫీ చేసింది. దీంతో ఉమ్మడి జిల్లాలో 2,32,014 మంది రైతులకు రూ.1,596. 38 కోట్ల రుణాలు మాఫీ చేసినట్లు ప్రభుత్వం తెలిపింది. ఇంతవరకు బాగానే ఉన్నా అసలు సమస్య ఇక్కడే ఉంది. ప్రభుత్వం చేపట్టిన రైతు రుణమాఫీ పథకంలో గందరగోళం నెలకొన్నది.

కాంగ్రెస్‌ పార్టీ ఎన్నికల్లో ఇచ్చిన హామీమేరకు 2018 డిసెంబర్‌ 12వ తేదీ నుంచి 2023 డిసెంబర్‌ 9వ తేదీ వరకు బ్యాంకుల్లో రుణం తీసుకున్న రైతులకు మాత్రమే రుణ మాఫీ కటాఫ్‌ పెట్టింది. అసలు వడ్డీ కలిపి రూ.2 లక్షల వరకు రుణమాఫీ చేస్తామని ప్రకటించింది. ఈమేరకు తొలి విడుతలో జూలై 18న లక్ష రూపాయల వరకు, జూలై 30న లక్షన్నరలోపు రుణాలను మాఫీ చేస్తున్నట్లు ప్రకటించింది. కానీ రుణమాఫీలో ప్రభుత్వ నిబంధనలు, టెక్నికల్‌ సమస్యలతోపాటు రేషన్‌ కార్డు, రుణఖాతా క్లోజ్‌ కావడం తదితర సమస్యలతో చాలామంది రైతులకు రుణమాఫీ కాలేదు.

ప్రధానంగా ఒక కుటుంబంలో ఎంతమంది రుణం తీసుకున్నా రూ.2 లక్షల వరకే వర్తిస్తుందిని షరతు పెట్టింది. అదే కుటుంబంలో తక్కువరుణం తీసుకున్న వారిని చూసి మొత్తంగా రెండు లక్షల వరకు లెక్కలు తీసి మాఫీ చేయాల్సిన ప్రభుత్వం ఆ కుటుం బం మొత్తాన్ని పక్కన పెట్టింది. ఏమన్న అంటే మూడో విడుతలో మాఫీ అవుతుందని చెబుతున్నారు. మరోవైపు ఆ కుటుం బం మొత్తం రెండు లక్షలపైన ఉన్నది క్లీయర్‌ చేస్తేనే ఆ కుటుంబానికి రెండు లక్షల రుణమాఫీ చేస్తామని ప్రభుత్వం చెబుతోంది. ఇలా ఎన్నో కొర్రీలు పెడుతున్నది.