Cattle | వానకాలం.. పశువులు పైలం.. పోష‌కులు ఈ జాగ్ర‌త్త‌లు త‌ప్ప‌నిస‌రిగా తీసుకోవాల్సిందే..!

Cattle | మానవ మనుగడకు ప్రకృతి సంపదతో పాటు పశుసంపద కూడా చాలా ముఖ్యం. ప్రత్యక్షంగా, పరోక్షంగా మానవ సమాజానికి పశుసంపద ఎన్నో విధాలుగా మేలు చేస్తున్నది. కాలానికి అనుగుణంగా ఆరోగ్యంపై మనుషులు ఎలాంటి జాగ్రత్తలు తీసుకుంటారో పశువులకు కూడా అలాంటి జాగ్రత్తలు తీసుకోవాల్సిన అవసరం ఎంతైనా ఉన్నది.

Cattle | న్యాల్‌కల్‌, జూలై 23: మానవ మనుగడకు ప్రకృతి సంపదతో పాటు పశుసంపద కూడా చాలా ముఖ్యం. ప్రత్యక్షంగా, పరోక్షంగా మానవ సమాజానికి పశుసంపద ఎన్నో విధాలుగా మేలు చేస్తున్నది. కాలానికి అనుగుణంగా ఆరోగ్యంపై మనుషులు ఎలాంటి జాగ్రత్తలు తీసుకుంటారో పశువులకు కూడా అలాంటి జాగ్రత్తలు తీసుకోవాల్సిన అవసరం ఎంతైనా ఉన్నది. వానకాలంలో పశువుల వ్యాధుల బారిన పడకుండా పోష‌కులు జాగ్రత్తలు తీసుకోవాలని వైద్యులు చెబుతున్నారు. తొలిదశలో పశువులకు వచ్చిన రోగాలను గుర్తిస్తే కొంత వరకు నష్ట నివారణ చర్యలు తీసుకోవచ్చని పశువైద్య నిపుణులు, అధికారులు పేర్కొంటున్నారు. ప్రస్తుత వానకాలంలో రైతులు, యాజమానులు తమ పశువులకు సోకే వ్యాధుల బారి నుంచి కాపాడుకునే జాగ్రత్తలు.

• వానకాలంలో కలుషిత నీరు, ముసురుకునే ఈగలు, కొత్తగా మొలిచే పచ్చిక (గడ్డి) పశువుల ఆరోగ్యానికి హాని కలిగిస్తాయి. కాబట్టి వాటిపై అప్రమత్తంగా ఉండాలి.
• పశువులను విద్యుత్‌ స్తంభాలు, తీగలకు దూరంగా ఉంచాలి.
• పాక పరిసర ప్రాంతాల్లో మురుగు, కలుపు మొక్కలు లేకుండా చూసుకోవాలి. వాటి ద్వారా విష కీటకలు, జంతువులు బారిన పశువులు పడే అవకాశమున్నది.
• వరదల కారణంగా వ్యాధులు వ్యాపించే అవకాశం ఉన్నందున వాగులు, నది పరీవాహక ప్రాంత పశుపోషకులు మరింత అప్రమత్తంగా ఉండాలి.
• గడ్డి, దాణా తడవకుండా నిల్వ చేసుకోవాలి. బూజు పట్టిన గడ్డి తింటే పశువులు అస్వస్థకు గురవుతాయి.
• పశువులకు అధిక శక్తి ఇచ్చే జొన్నలు, సజ్జలు, రాగులు, ఉలవలను ఆహారంగా ఇస్తూ రక్షిత తాగునీటిని సరిపడా అందిస్తుండాలి.
• పచ్చగడ్డితో పాటు వరిగడ్డి, సమీకృత దాణా, రోజు 50 గ్రా. మినిరల్‌ మిక్చర్‌ పెట్టడం తప్పనిసరి.
• వానకాలంలో చల్ల గాలులు, దోమలు, ఈగల కారణంగా పాడిగేదేలకు పాల దిగుబడి తగ్గిపోతుంది. అందుకే పశువుల పాకల చుట్టూ పరదాలు కట్టాలి. దోమల నివారణకు రాత్రి పుట వేప ఆకులతో పొగ పెట్టాలి.
• పశువులు, గొర్రెలు, మేకలకు బురద పుండ్లు, గాలికుంటు, జలగ, చిటుకు, నీలినాలుక వ్యాధులు వచ్చే అవకాశం ఎక్కువ. వ్యాధులు రాకుండా పశువులకు తప్పని సరిగా టీకాలు వేయించాలి. సమీపంలోని ప్రభుత్వ పశువైద్య కేంద్రాలకు తీసుకెళ్లితే ఉచితంగా టీకాలు వేస్తారు.
• వానకాలంలో పశువులకు సోకే సీజనల్‌ వ్యాధులను రైతులు, యాజమానులు కనిపెడుతూ ఎప్పటికప్పుడు అప్రమత్తంగా ఉండాల్సిన అవసరమున్నది.
• పశువులు అనారోగ్యానికి గురైతే వెంటనే ప్రభుత్వం ఏర్పాటు చేసిన సంచార పశువైద్యశాలకు టోల్‌ ఫ్రీ నంబర్‌ 1962కు సమాచారం అందించి చికిత్సలు చేయించుకోవచ్చు.

వ్యాధులపై అప్రమత్తం ఉండాలి

వానకాలంలో పశువులు, జీవాలపై రైతులు, యాజమానులు అప్రమత్తంగా ఉండాలి. వానకాలంలో కురిసే వర్షాలతో నీటి పరిసరాలు, వాతావరణం కలుషితమవుతాయి. ముఖ్యంగా పశువులు, జీవాలకు మేయడానికి మేత, తాగడానికి శుభ్రమైన నీరు లభించదు. ఫలితంగా అనారోగ్యానికి గురవుతాయి. వాటికి రోగ నిరోధక శక్తి తగ్గి వ్యాధుల బారిన పడుతాయి. వ్యాధి సోకిన పశువులు, జీవాలు మందలో వెళ్లినప్పుడు ఇతర పశువులు, జీవాలకు వ్యాధులు సోకే అవకాశం ఉంటుంది. వ్యాధులు సోకిన పశువుల మలమూత్రాలు, నోరు, కళ్ల నుంచి వచ్చే ద్రవాల ద్వారా కూడా ఇతర పశువులు వ్యాధి బారిన పడుతాయి. సీజనల్‌ వ్యాధులపై పశువులు, జీవాలను ఎప్పటికప్పుడు కనిపెడుతుండాలి. వెంటనే సమీపంలో పశువైద్య కేంద్రాలకు వాటిని తీసుకెళ్లి వైద్య పరీక్షలు చేయించాలి.

– అంజిక్యా, మండల పశువైద్యాధికారి, న్యాల్‌కల్‌