Allu Arjun | అల్లు అర్జున్ గొప్ప మనసు.. ఫ్యాన్స్‌కు ఉచిత ప్రమాద బీమా!

Icon Star | ఐకాన్ స్టార్ అల్లు అర్జున్ తన అభిమానుల పట్ల ఉన్న అంతులేని ప్రేమాభిమానాలను మరోసారి చేతల్లో చూపించాడు.

Icon Star | ఐకాన్ స్టార్ అల్లు అర్జున్ తన అభిమానుల పట్ల ఉన్న అంతులేని ప్రేమాభిమానాలను మరోసారి చేతల్లో చూపించాడు. కేవలం తెరపైనే కాకుండా, నిజ జీవితంలోనూ తమను ఆదరించే అభిమానుల కుటుంబాలకు అండగా నిలవాలనే ఉద్దేశంతో ఆయన ఒక అద్భుతమైన కార్యక్రమానికి శ్రీకారం చుట్టారు. మంగ‌ళ‌వారం హైదరాబాద్‌లోని యూసుఫ్‌గూడ వేదికగా ఘనంగా జరిగిన ‘అల్లు అర్జున్ ఫ్యాన్స్ అసోసియేషన్’ (AAFA) వార్షిక సదస్సు ఈ కార్యక్రమానికి వేదికైంది. ఈ సమావేశానికి తెలుగు రాష్ట్రాల నుంచి మాత్రమే కాకుండా, ఒడిశా, తమిళనాడు, కర్ణాటక, కేరళ, మహారాష్ట్ర సహా దేశంలోని వివిధ రాష్ట్రాల నుంచి దాదాపు వెయ్యి మందికి పైగా ఫ్యాన్ అసోసియేషన్ ప్రముఖులు, ప్రధాన నాయకులు అత్యంత ఉత్సాహంగా హాజరయ్యారు.

అయితే ఈ ప్రత్యేక వేదికపై అల్లు అర్జున్ ఏడు రాష్ట్రాల నుంచి విచ్చేసిన తన అభిమానులందరికీ ఎటువంటి సభ్యత్వ రుసుములు లేకుండా, పూర్తిగా ఉచిత ప్రమాద బీమా పథకాన్ని లాంఛనంగా ప్రారంభించారు. ఈ గొప్ప సంక్షేమ పథకం కింద రాష్ట్ర స్థాయి కమిటీ సభ్యులకు రూ. 5 లక్షలు, అలాగే జిల్లా స్థాయి కమిటీ సభ్యులకు రూ. 3 లక్షల వరకు ప్రమాద బీమా కవరేజ్ లభించనుంది. అంతేకాకుండా, ఈ బీమాకు సంబంధించిన అధికారిక కార్డులను స్వయంగా తన చేతుల మీదుగా అభిమానులకు అందించి వారిలో సరికొత్త జోష్ నింపారు.

సినిమాల సక్సెస్‌లను పంచుకోవడమే కాకుండా, కష్టసుఖాల్లోనూ తన అభిమానుల కుటుంబాల భద్రత మరియు భవిష్యత్తు ఎంతో ముఖ్యమని భావించి బన్నీ తీసుకున్న ఈ సాహసోపేతమైన నిర్ణయంపై ప్రస్తుతం సినీ వర్గాల్లోనూ, ప్రజల్లోనూ ప్రశంసల వర్షం కురుస్తోంది. కేవలం రీల్ హీరోగానే కాకుండా తన ఆర్మీకి నిజమైన రక్షణ కల్పిస్తున్న అల్లు అర్జున్‌ను నెటిజన్లు, అభిమానులు ‘అసలైన రియల్ హీరో’ అంటూ ఎంతో గర్వంగా కొనియాడుతున్నారు.