అర్చకులకు తీపికబురు

ఆలయాల్లో పూజారులుగా కొనసాగుతున్న అర్చకులకు ప్రభుత్వం తీపికబురు అందించింది. సర్కారు అమలు చేస్తున్న ధూప, దీప, నైవేద్యం పథకాన్ని ఉమ్మడి జిల్లాలో మరో 339 ఆలయాలకు వర్తింపజేస్తూ ఇటీవలే ఉత్తర్వులు విడుదల చేసింది.

• పూజారుల జీవితాల్లో వెలుగులు
• మరో 339 ఆలయాలకు ధూపదీప నైవేద్య పథకం..
• అర్చకులకు ప్రొసీడింగ్‌లు అందజేసిన సర్కారు
• మాట నిలబెట్టుకున్న సీఎం కేసీఆర్‌

పెబ్బేరు, జూన్‌ 25 : ఆలయాల్లో పూజారులుగా కొనసాగుతున్న అర్చకులకు ప్రభుత్వం తీపికబురు అందించింది. సర్కారు అమలు చేస్తున్న ధూప, దీప, నైవేద్యం పథకాన్ని ఉమ్మడి జిల్లాలో మరో 339 ఆలయాలకు వర్తింపజేస్తూ ఇటీవలే ఉత్తర్వులు విడుదల చేసింది. కాగా ఆయా ఆలయాలకు సంబంధించిన అర్చకులకు పత్రాలను కూడా అందజేశారు. ఆదాయం లేక ధూపం, దీపానికి కూడా నోచుకోని ఆలయాలకు ఆర్థిక చేదోడును ఇచ్చేందుకు గానూ ప్రభుత్వం ధూప, దీప, నైవేద్యం పథకాన్ని అమలు చేస్తున్నది. కేవలం భక్తుల కానుకల పైనే ఆధారపడి చాలీచాలని ఆదాయంతో కొట్టుమిట్టాడుతున్న అర్చకుల కుటుంబాలకు పథకం ఎంతో ఆసరాగా నిలుస్తోంది. ఇప్పటికే ఈ పథకం ఉమ్మడి జిల్లాలో అమలులో ఉన్నప్పటికీ, తాజాగా మరిన్ని ఆలయాలకు పథకాన్ని వర్తింపజేశారు.

కేసీఆర్‌ ప్రకటించిన 20 రోజులకే..

హైదరాబాద్‌లో విప్రహిత బ్రాహ్మణ సంక్షేమ సదనం ప్రారంభోత్సవం సందర్భంగా మే 31వ తేదీన ముఖ్యమంత్రి చంద్రశేఖర్‌రావు బ్రాహ్మణులకు వరాల జల్లు కురిపించారు. మరిన్ని ఆలయాలకు ధూప దీప నైవేద్యం పథకాన్ని వర్తింపజేయనున్నట్లు ప్రకటించారు. అదేవిధంగా ఈ పథకం కింద ఇస్తున్న రూ.6వేలను రూ.10వేలకు పెంచుతున్నట్లు కూడా వెల్లడించారు. ఈ నేపథ్యంలోనే ధూప దీప నైవేద్యం పథకాన్ని మరిన్ని ఆలయాలకు వర్తింప జేస్తూ ఉత్తర్వులు వెలువడ్డాయి. కేసీఆర్‌ ప్రకటించిన 20 రోజులకే అర్చకుల పేరుమీద వచ్చిన ప్రొసీడింగ్‌ కాపీలను ఉమ్మడి జిల్లాలో ఇప్పటికే కలెక్టర్లు, మంత్రులు, ఎమ్మెల్యేలు పంపిణీ చేశారు.

వనపర్తి జిల్లాలో పథకానికి ఎంపికైన ఆలయాలు

• వనపర్తి పట్టణంలోని వీరబ్రహ్మేంద్రస్వామి, వేణుగోపాలస్వామి, వీరాంజనేయస్వామి, గాంధీనగర్‌లోని అభయాంజనేయస్వామి, చిట్యాలలోని అభయాంజనేయస్వామి, అప్పాయిపల్లి, కడుకుంట్లలోని ఆంజనేయస్వామి, రాజనగరం రామాంజనేస్వామి, నాచహళ్లిలోని ఆంజనేయస్వామి ఆలయాలు..
• గోపాల్‌పేట మండలంలోని జయన్న తిర్మలాపురంలోని ఆంజనేయస్వామి, బుద్ధారంలోని బుద్ధేశ్వరస్వామి, చాకలిపల్లెలోని రామలింగేశ్వరస్వామి ఆలయాలు..
• పాన్‌గల్‌ మండలం బుసిరెడ్డిపల్లిలోని ఆది మల్లేశ్వరస్వామి, కేతేపల్లిలోని రామలింగేశ్వరస్వామి, దొండాయిపల్లిలోని ఆంజనేయస్వామి, మల్లాయిపల్లిలోని లక్ష్మీనర్సింహస్వామి ఆలయాలు..
• ఆత్మకూరు పట్టణంలోని కోట్ల ఆంజనేయస్వామి, ఆత్మకూరు మండలం పిన్నంచెర్లలోని అభయాంజనేయస్వామి, రేచింతలలోని ఆంజనేయస్వామి, తిప్పుడంపల్లి మారుతిస్వామి, మూలమల్ల ఆంజనేయస్వామి, జూరాల ఈశ్వరస్వామి ఆలయాలు..
• వీపనగండ్ల మండలకేంద్రంలోని శివాలయం, కల్వరాల కోటగట్టు ఆంజనేయస్వామి, సంపట్రావుపల్లిలోని అభయాంజనేయస్వామి, పుల్గరచర్లలోని వేంకటేశ్వరస్వామి ఆలయాలు..
• ఖిల్లా ఘణపురం మండలం అప్పారెడ్డిపల్లెలోని ఆంజనేయస్వామి, సల్కలాపురంలోని రంగనాయస్వామి, వీరన్నగుట్ట, వీరభద్రస్వామి ఆలయాలు..
  అమరచింత మండలం నందిమల్లలోని భ్రమరాంబ మల్లికార్జునస్వామి ఆలయం..
• పెబ్బేరు పట్టణంలోని మిట్ట భక్తాంజనేయస్వామి, పెంచికలపాడులోని అభయాంజనేయస్వామి, పాతపల్లిలోని చింతలకుంట ఆంజనేయస్వామి ఆలయాలు..
• కొత్తకోట మండలం పామాపురంలోని వేదమాత గాయత్రీదేవి, పాలెం అభయాంజనేయస్వామి, సంకిరెడ్డిపల్లిలోని శివాంజనేయస్వామి ఆలయాలు..
• చిన్నంబావి మండలం బెక్కెంలోని రామాలయం, ఆంజనేయస్వామి ఆలయాలు..
• పెద్దమందడిలోని ప్రసన్నాంజనేయస్వామి, మద్దిగట్లలోని శివాలయం..
• రేవల్లిలోని గాంధీనగర్‌ ఆంజనేయస్వామి, చీర్కపల్లిలోని ఆంజనేయస్వామి ఆలయాలు..
• మదనాపురం మండలం దుప్పల్లిలోని సీతారామాంజనేయస్వామి, గోపన్‌పేటలోని శివాంజనేయస్వామి ఆలయాలు..

ఆత్మవిశ్వాసాన్ని నింపే పథకం

ధూప దీప నైవేద్యం పథకం కింద పెబ్బేరు మండలం పాతపల్లి సమీపంలోని చింతలకుంట ఆంజనేస్వామి ఆలయం ఎంపి క కావడం హర్షించదగిన విషయం. చాలీచాలని ఆదాయంతో నెట్టుకొస్తున్న అర్చకుల్లో ఈ పథకం ఆత్మవిశ్వాసాన్ని నింపుతున్నది. పూజారుల కుటుంబాలకు ఆర్థిక సమస్యల నుంచి విముక్తి లభించింది. దాతల కోసం ఎదురుచూపులు తప్పాయి.
– వెంకటేశ్వర్లు, పాతపల్లి ఆంజనేయస్వామి ఆలయ పూజారి, పెబ్బేరు మండలం

రూ.10వేల పెంపును స్వాగతిస్తున్నాం..

ధూప దీప నైవేద్యం పథకం కింద అర్చకులకు ఇస్తున్న వేతనాన్ని రూ.6వేల నుంచి రూ.10వేలకు పెంచడం సంతోషదాయకం. వేతనం పెంపును సీఎం కేసీఆర్‌ ప్రకటించడం ఆయన గొప్ప మనసుకు నిదర్శనం. తెలంగాణ రాష్ట్రం ఏర్పడక ముందు ఈ పథకం కింద రూ.2,500 అందేవి. కేసీఆర్‌ సీఎం అయ్యాక 2014 నుంచి రూ.6వేలకు పెంచారు. ఇప్పుడు రూ.10వేలకు పెంచడంతో బ్రాహ్మణుల జీవితాలకు భరోసా కలిగించినట్లయ్యింది.
– పీవీ లక్ష్మీకాంతాచార్యులు, ధూప దీప నైవేద్య సంఘం వనపర్తి జిల్లా అధ్యక్షుడు