ఎండ ప్రచండం

సూర్య ప్రతాపం పెరిగిపోయింది. మరో ఐదురోజుల పా టు తీవ్రత అధికంగా ఉంటుందని వాతావరణ శాఖ హెచ్చరించింది. ఈ నేపథ్యంలో ప్రజలు జాగ్రత్తలు వ హించాలని వైద్యులు సూచిస్తున్నారు. రెండు వారాలుగా పగటి పూట ఉష్ణోగ్రతలు అం తకంతకూ పెరుగుతున్నాయి.

• మండే ఎండలతో బెంబేలు
• నిర్మానుష్యంగా మారుతున్న రహదారులు
• ఉపశమనానికి దారులు వెతుక్కుంటున్న ప్రజలు
• శీతల పానీయాల వైపు పరుగులు
• రానున్న రెండ్రోజులు మరింత తీవ్రత
• చిన్నారులు, పెద్దలు జాగ్రత్తగా ఉండాలంటున్న వైద్యులు

నాగర్‌కర్నూల్‌, ఏప్రిల్‌ 4 (నమస్తే తెలంగాణ) : సూర్య ప్రతాపం పెరిగిపోయింది. మరో ఐదురోజుల పా టు తీవ్రత అధికంగా ఉంటుందని వాతావరణ శాఖ హెచ్చరించింది. ఈ నేపథ్యంలో ప్రజలు జాగ్రత్తలు వహించాలని వైద్యులు సూచిస్తున్నారు. రెండు వారాలుగా పగటి పూట ఉష్ణోగ్రతలు అంతకంతకూ పెరుగుతున్నాయి. సాధారణానికి మించి రికార్డు స్థాయిలో ఉష్ణోగ్రతలు నమోదవుతున్నాయి. తప్పనిసరి పనిపై వచ్చే ప్రజలు గొడుగులు పట్టుకొని, టవళ్లు, టోపీలు, మహిళలైతే చీరకొంగులు తలపై కప్పుకొని రోడ్డెక్కుతున్నారు. దీంతో మధ్యాహ్నం వేళ రోడ్లన్నీ నిర్మానుష్యంగా కనిపిస్తున్నాయి. మధ్యాహ్నం వడగాల్పులు వీ స్తూ సాయం త్రం 7 గంటల వరకూ ఎండ ప్రభావం ఉంటోంది. రోడ్ల వెంట టోపీలు, మట్టి కుండలు, కూలింగ్‌ అద్దాల అమ్మకాలు జోరందుకున్నాయి. ఎండవేడిమి నుంచి ఉపశమనం పొందేందుకు ప్రజలు శీతల పానీయాలను తాగుతున్నా రు. ఉదయం 12గంటలలోపే పనులు ముగించుకొని ఇండ్లకు రావాలని, సాయం త్రం 4 గంటల త ర్వాత బ యటికి వెళ్లడం శ్రేయస్కరమని వైద్యులు సూచిస్తున్నారు.

నిర్లక్ష్యం వహిస్తే ప్రాణాలకు ముప్పు

ఎండాకాలంలో అత్యవసర పనులుంటేనే బయటకు వెళ్లాలి. అప్పుడు కూడా సరైన జాగ్రత్తలు పాటించాలి. ఎందుకంటే వడదెబ్బ సోకే ప్రమాదం ఎక్కువగా ఉంటుంది. ఈ ఏడాది ఎండలు అధికంగా ఉన్నాయి. చిన్నపిల్లలు, వృద్ధులు, అనారోగ్య సమస్యలున్న వారు ఇండ్లల్లోనే చల్లటి ప్రదేశంలో ఉండాలి. కూల్‌డ్రింక్స్‌ కంటే మజ్జిగ, కుండలోని నీళ్లు, కొబ్బరిబొండాలకు ప్రాధాన్యత ఇవ్వాలి. వదులైన, కాటన్‌ దుస్తులు ధరించాలి.

– సుధాకర్‌లాల్‌, డీఎంహెచ్‌వో

బెంబేలెత్తుతున్న ప్రజలు

అలంపూర్‌, ఏప్రిల్‌ 4 : నడిగడ్డలో ఊష్ణోగ్రత లు పెరుగుతున్నాయి. ఎండ తీవ్రత పెరగడంతో ప్రజలు ఉదయం పూటే పనులు ముగించుకుంటున్నారు. దీంతో మధ్యాహ్నం వేళ రహదారుల న్నీ నిర్మానుష్యంగా కనబడుతున్నాయి. రాబోవు రోజుల్లో ఎండ వేడిమి మరింత పెరిగే అవకాశం ఉందని వాతావరణ శాఖ పేర్కొంది.

వాతావరణ శాఖ హెచ్చరికలు ఇలా..

• సాధారణం కంటే తక్కువ ఊష్ణోగ్రతలు నమోదైతే వైట్‌ అలర్ట్‌గా ప్రకటిస్తారు.
• సాధారణానికి మించి నమోదైతే హెటీ వేవ్‌ వార్నింగ్‌ ఎల్లో అలర్ట్‌.
• మామూలు కంటే 4-5 డిగ్రీల మధ్య ఊష్ణోగ్రతలు నమోదైతే ఆరెంజ్‌ అలర్ట్‌.
• మామూలు కంటే 6 డిగ్రీలకు పైగా ఉష్ణోగ్రత, తీవ్ర వడగాల్పులు ఉంటే రెడ్‌ అలర్ట్‌గా ప్రకటిస్తారు.
  వేడి నుంచి ఉపశమనానికి..
• ఇంట్లో వాతావరణం చల్లగా ఉండేలా కిటికీలు, తలుపులకు కర్టెన్లు వేసుకొని నీళ్లు చల్లుకోవాలి.
• ఎండలోకి వెళ్లేటప్పుడు సన్‌స్క్రీన్‌ లోషన్లు, కూలింగ్‌ పౌడర్లు ఉపయోగించాలి.
• శీతల పానీయాలకు బదులుగా పండ్ల రసాలు, నిమ్మకాయ, చెరుకు, సబ్జా రసాలు, కొబ్బరి నీళ్లు, మజ్జిగ తాగాలి.
• కొబ్బరి బొండాలు, కీరదోస, కర్బూజా వంటి పండ్లు తినాలి
• రోజుకు నాలుగైదు లీటర్ల నీళ్లు తాగాలి.
• ఎండలో ప్రయాణిస్తే గొడుగు, టోపీ, కూలింగ్‌ అద్దాలు, హెల్మెట్‌, గ్లౌజులు ఉపయోగించాలి.
• రోజుకు రెండుసార్లు స్నానం చేయాలి.
• బయటికి వెళ్లేటప్పుడు వాటర్‌ బాటిల్‌ తీసుకెళ్లడం, వీలైతే చెట్ల నీడలో ఉండేందుకు ప్రయత్నించాలి.
• డీ హైడ్రేషన్‌కు గురైతే మంచినీళ్లు, కొబ్బరి నీళ్లు తాగాలి.
• పరిస్థితి తీవ్రంగా ఉంటే తప్పకుండా దవాఖానకు వెళ్లాలి.
• తల్లిదండ్రులు తమ పిల్లలను ఎండలోకి వెళ్లకుండా చూసుకోవాలి.
• ఈత కొట్టడం కోసం చెరువులు, బావుల వద్దకు వెళ్లేటప్పుడు తోడుగా ఉండాలి.
• దోమలు కుట్టకుండా రాత్రి వేళ కాయిల్స్‌, దోమతెరలు ఉపయోగించాలి.
• మసాలాలు, మాంసాహారం తగ్గించాలి.
• ఎండలో నుంచి వచ్చిన వెంటనే నీళ్లు తాగరాదు.
• బైకులు, కార్లను నీడలోనే ఉంచాలి.