Rain Damage | నాగర్ కర్నూలు జిల్లాలో గాలివాన బీభత్సం.. తడిసిముద్దైన వడ్లు, మొక్కజొన్న..!

Rain Damage : నాగర్ కర్నూలు జిల్లాలో భారీ ఈదురు గాలులతో కూడిన వర్షం బీభత్సం సృష్టించింది. వాతావరణంలో మార్పులు రావడంతో బలమైన గాలులు వీచాయి. ఈదురు గాలుల ధాటికి పలు చోట్ల వృక్షాలు నేలకొరిగాయి.

Rain Damage : నాగర్ కర్నూలు జిల్లాలో భారీ ఈదురు గాలులతో కూడిన వర్షం బీభత్సం సృష్టించింది. మంగళవారం సాయంత్రం 6:30 గంటల సమయంలో ఒక్కసారిగా వాతావరణంలో మార్పులు రావడంతో బలమైన గాలులు వీచాయి. ఈదురు గాలుల ధాటికి పలు చోట్ల వృక్షాలు నేలకొరిగాయి. వ్యవసాయ మార్కెట్‌లో రైతులు అమ్మకానికి తీసుకొచ్చిన వడ్లు, మొక్కజొన్న తడిసిముద్దయ్యాయి. కాంటా చేయని ధాన్యం తడిసిపోవడంతో రైతులు ‘అయ్యో.. చెడగొట్టు వాన ఎంత పనిచేసింది’ అని గగ్గోలు పెట్టారు.

వాతావరణ మార్పులతో ఈదురుగాలుల ఉధృతికి భారీ ఫ్లెక్సీలు చిరిగిపోగా.. ఉరుముల శబ్దాలకు ప్రజలు భయభ్రాంతులకు గురయ్యారు. గాలి గందరగోళం నుంచి తేరుకోకముందే ఉరుములు, మెరుపులతో కూడిన వర్షం కురిసింది. ఉన్నట్టుండి వాన పడడంతో రోడ్లపై ప్రయాణికులు తీవ్ర ఇబ్బందులు
పడ్డారు. భారీ వర్షం పడే అవకాశమున్నందున ప్రజలంతా అప్రమత్తంగా ఉండాలని అధికారుల సూచించారు.