నా బండి.. నా ఇష్టం!

నా బండి నా ఇష్టం.. నచ్చిన బొమ్మ, పేర్లు రాసుకుంటామనేవిధంగా కొందరు వాహనదారులు వ్యవహరిస్తున్నారు. వాహనాలపైనే కాకుండా నెంబర్‌ ప్లేట్స్‌పై తమకు నచ్చిన బొమ్మలు, పేర్లు రాయించుకొని రోడ్డు నిబంధనలను బేఖాతరు చేస్తున్నారు.

• వాహనాలు, నెంబర్‌ ప్లేట్లపై నచ్చిన బొమ్మలు, పేర్లు
• ఆర్టీఏ నిబంధనలు బేఖాతర్‌
• చూసీ చూడనట్లు వ్యవహరిస్తున్న అధికారులు

అలంపూర్‌, జూన్‌ 26 : నా బండి నా ఇష్టం.. నచ్చిన బొమ్మ, పేర్లు రాసుకుంటామనేవిధంగా కొందరు వాహనదారులు వ్యవహరిస్తున్నారు. వాహనాలపైనే కాకుండా నెంబర్‌ ప్లేట్స్‌పై తమకు నచ్చిన బొమ్మలు, పేర్లు రాయించుకొని రోడ్డు నిబంధనలను బేఖాతరు చేస్తున్నారు. బైక్‌లు ఇతర వాహనాలపై రంగురంగుల స్టిక్కర్లతోపాటు రాజకీయ పార్టీల గుర్తులు, వివిధ సంఘాల నాయకులు, సినీనటుల చిత్రాలు వేసుకుంటున్నారు. వాహనాలపై బొమ్మలు, పేర్లు రాసుకునే వారి సంఖ్య రోజురోజుకూ పెరుగుతున్నది. వాహన అద్దాలపై స్టిక్కర్లు అంటించుకోవడం వల్ల ముందు వెళ్లే వాహనాలను గుర్తించడం ఇబ్బందిగా ఉంటుంది. ఇలాంటి వాహనాలతో ప్రమాదాలు చోటుచేసుకున్న ఘటనలు అనేకం ఉన్నాయి. మరికొందరు వాహన నెం బర్‌ కనిపించకుండా చేస్తున్నారు. ప్రమాదం జరిగితే తప్పించుకుపోయే వాహనాల్లో ఇటువంటివి ఎక్కువగా ఉంటున్నాయని చెప్పవచ్చు. రిజిస్ట్రేషన్‌ సమయంలో ఆర్టీఏ కార్యాలయంలో ఇచ్చే హై సెక్యూరిటీ నెంబర్‌ ప్టేట్ల స్థానంలో వారికి నచ్చిన మోడల్‌లో నెంబర్‌ ప్లేట్లను బిగించుకుంటున్నారు. కొంతమంది వాహనదారులు ఏకంగా నెంబర్‌ ప్లేట్లు లేకుండా రోడ్లపై నడుపుతున్నారు. ఇటీవల వివిధ శాఖల్లో విధులు నిర్వహించే ఉద్యోగులు తమ వాహనం, నెంబర్‌ ప్లేట్లపై ఆయా శాఖల పేర్లు, హోదాలు రాసుకోవడం కొత్త ట్రెండ్‌గా మారింది. నిబంధనలను పట్టించుకోని వాహనదారులను సం బంధిత అధికారులు గుర్తించి తగిన చర్యలు తీసుకోవాల్సిన అవసరం ఉంది.

నిబంధనలు ఇవే..

• రవాణాశాఖ సూచించిన విధంగా హై సెక్యూరిటీ నెంబర్‌ ప్లేట్లను వినియోగించాలి.
• నెంబర్‌ ప్లేట్‌పై రెండు వరుసల్లో వాహన నెంబర్‌ రాసుకోవాలి.
• వాహనం ముందుభాగంలో నెంబర్‌ ప్లేట్‌పై అక్షరాలు 30 మి.మీ. ఎత్తులో 35 మి.మీ ఉండాలి. అక్షరం అక్షరానికి మధ్య 7 మి.మీ. దూరం ఉండాలి.
• వాహన సామర్థ్యం మేరకు నెంబర్‌ ప్లేట్ల కొలతలు ఉంటాయి. యంత్ర సామర్థ్యం 70 సీసీలోపు వాహనాలపై ప్రతి అంకెకు 15 మి.మీ. ఎత్తు, 25 మి.మీ. మధ్య దూరం ఉండాలి. వ్యక్తిగత వాహనానికి తెల్లరంగు బోర్డుపై నల్లరంగు అక్షరాలు రాసుకోవాలి. అద్దె వాహనాలకు పసుపురంగు నెంబర్‌ ప్లేట్‌పై నల్లరంగుతో అక్షరాలు రాసుకోవాలి.
• వాహనాలకు విరిగిన నెంబర్‌ ప్లేట్లు, అక్షరాలు సరిగా కనిపించని నెంబర్‌ ప్లేట్లు ఉండకూడదు. అలాంటి వాహనాలకు జరిమానా విధించబడుతుంది.
• వాహనాల నెంబర్‌ ప్లేట్లు ఆయా పాంతాల్లో ఉపయోగించే వాడుకల భాషలో ఆర్టీఏ నిబంధనల మేరకే రాసుకోవాలి.
• నెంబర్‌ ప్లేట్లు సరిగా లేకుండా ఉపయోగించే వాహనాల వల్ల, వాహన చోధకుల వల్ల ప్రమాదాలు, చోరీలు, శాంతి భద్రతలకు భంగం కలిగించే అవకాశాలు ఉంటాయి.
• అటువంటి వారిని పట్టుకోవడం డిపార్ట్‌మెంట్‌కు ఇబ్బందికరంగా ఉంటుంది.

హైసెక్యూరిటీ నెంబర్‌ ప్లేట్‌తో లాభాలు..

• ప్రమాదానికి గురైనప్పుడు, అత్యవసర సమయాల్లో నెంబర్‌ ప్లేట్‌ ఆధారంగా వాహదారుడి అడ్రస్‌ గుర్తించవచ్చు.
• వాహనం చోరీకి గురైనప్పుడు సీసీ కెమెరాల ఆధారంగా నెంబర్‌ ప్లేట్‌ను గుర్తించవచ్చు.
• నెంబర్‌ ప్లేట్‌పై ఎలాంటి రాతలు, బొమ్మలు లేకపోతే వాహనాన్ని గుర్తించడం సులభంగా ఉంటుంది.
• వాహన లైఫ్‌ చివరి వరకు ఆర్టీఏ కార్యాలయం నుంచి రిలీజ్‌ అయిన హై సెక్యూరిటీ నెంబర్‌ ప్లేట్లనే వాడాలి.