నిరుపేదలకు నిరాశే..!

రాష్ట్ర ప్రభుత్వం గతేడాది డిసెంబర్‌ చివరి వారంలో ప్రజాపాలన పేరిట దరఖాస్తులు స్వీకరించింది. వాటిలో ఆన్‌లైన్‌ చేసిన దరఖాస్తుల్లో ఎక్కువగా రేషన్‌కార్డులకు సంబంధించినవే ఉన్నాయి. వీటికి మోక్షం లభించలేదు.

• కొత్త రేషన్‌ కార్డుల కోసం తప్పని నిరీక్షణ
• కమిటీలు, సర్వేల పేరుతో సర్కారు కాలయాపన
• ముగిసిన ఫ్యామిలీ డిజిటల్‌ కార్డుల సర్వే
• ఉమ్మడి జిల్లాలో ఎఫ్‌ఎస్‌సీలో పేర్ల తొలగింపు
• పది నెలల్లో 63 కార్డులు, 2,399 మంది కుటుంబ సభ్యుల పేర్లు డిలీట్‌
• ఆగ్రహంలో ప్రజలు

మహబూబ్‌నగర్‌ కలెక్టరేట్‌, అక్టోబర్‌ 14 : రాష్ట్ర ప్రభుత్వం గతేడాది డిసెంబర్‌ చివరి వారంలో ప్రజాపాలన పేరిట దరఖాస్తులు స్వీకరించింది. వాటిలో ఆన్‌లైన్‌ చేసిన దరఖాస్తుల్లో ఎక్కువగా రేషన్‌కార్డులకు సంబంధించినవే ఉన్నాయి. వీటికి మోక్షం లభించలేదు. ఈ నేపథ్యంలో అక్టోబర్‌ 2 నుంచి రేషన్‌ కార్డుల జారీకి దరఖాస్తులు స్వీకరిస్తామని మరోసారి ప్రకటించింది. తీరా అది కూడా నోచుకోకపోవడంతో వేలాదిమంది నిరుపేదలకు నిరాశే మిగిలింది.

జిల్లాలో ఎంపిక చేసిన మున్సిపల్‌ వార్డులు, పంచాయతీల్లో ‘ఫ్యామిలీ డిజిటల్‌ కార్డుల సర్వే’ పైలట్‌ ప్రాజెక్టుగా చేపట్టింది. ఇది ఈనెల 8వ తేదీతో ముగిసింది. దీని తర్వాతైనా దరఖాస్తులు స్వీకరిస్తారేమోనని చాలా మంది ఆశగా ఎదురుచూ స్తున్నా.. కొత్త కార్డులు సైతం జారీ చేయడం లేదు. మృతిచెందిన వారి పేర్లు రేషన్‌కార్డుల్లో వాటంతటవే తొలిగిపోయేలా సాఫ్ట్‌వేర్‌ ఏర్పాటు చేశారు. కానీ, పుట్టిన వారి పేర్లు మాత్రం చేర్చడం లేదు. ఉమ్మడి కుటుంబాలు వేరు సంసారం పెట్టినా కొత్త కార్డులు ఇవ్వడం లేదు.

నోటికాడి కూడు లాగేస్తుండ్రు..

ప్రజాపాలన ప్రభుత్వం అంటూ గొప్పలు చెబుతూనే పేదల నోటికాడి కూడును లాగేస్తుందని ఉమ్మడి జిల్లా ప్రజలు వాపోతున్నారు. ఆహారభద్రత (రేషన్‌) కార్డులు, కుటుంబ సభ్యుల పేర్లు తొలగింపే ఇందుకు ప్రత్యక్ష ఉదాహరణగా నిలుస్తోందని పేర్కొంటున్నారు. కాంగ్రెస్‌ ప్రభుత్వం గతేడాది డిసెంబర్‌లో కొలువుదీరాక.. పేదలకు అన్ని రకాలుగా అండగా ఉండడమే తమ ఎజెండా అంటూ ప్రగల్భాలు పలికింది. అర్హులైన ప్రతి ఒక్కరికీ ఆహారభద్రత కార్డులు జారీ చేస్తామంటూ చెప్పినా.. ఆ దిశగా ముందుకు సాగకపోగా.. ఉన్న కార్డుల్లోనూ కోత విధిస్తున్నది.

పది నెలల్లో 63 కార్డుల తొలగింపు..

రాష్ట్రవ్యాప్తంగా 33 జిల్లాల్లో కాంగ్రెస్‌ సర్కారు ఏర్పడి న ఈ పది నెలల కాలంలో 2,539 కార్డులు రద్దు కాగా.. 39,740 మంది కుటుంబ సభ్యుల పేర్లు తొలగించారు. ఉమ్మడి పాలమూరు జిల్లాలో 63 రేషన్‌కార్డులు, 2,399 కుటుంబ సభ్యుల పేర్లు తీసివేశారు.

ఉమ్మడి జిల్లాలో తొలగింపు ఇలా..

• మహబూబ్‌నగర్‌ జిల్లాలో ఈ ఏడాది జనవరిలో 2,39,514 రేషన్‌కార్డులు, 7,89,978 మంది కుటుంబసభ్యులు ఉండగా.. అక్టోబర్‌లో 2,39,500 కార్డులు, 7,89,520 మంది కుటుంబసభ్యులకు చేరింది. ఈ లెక్కన 14 కార్డులు, 458 మంది పేర్లు తొలగించారు.
• జోగుళాంబ గద్వాల జిల్లాలో ఈ ఏడాది జనవరిలో 1,60,111 రేషన్‌కార్డులు, 5,46,355 మంది కుటుంబసభ్యులు ఉండగా.. అక్టోబర్‌లో 1,60,101 కార్డులు, 5,45,594 మంది కుటుంబసభ్యులకు చేరింది. ఈ లెక్కన 10 కార్డులు, 761 మంది పేర్లు తొలగించారు.
• నాగర్‌కర్నూల్‌ జిల్లాలో ఈ ఏడాది జనవరిలో 2,37,833 రేషన్‌కార్డులు, 7,50,598 మంది కుటుంబసభ్యులు ఉండగా.. అక్టోబర్‌లో 2,37,800 కార్డులు, 7,49,892 మంది కుటుంబసభ్యులకు చేరింది. ఈ లెక్కన 33 కార్డులు, 706 మంది పేర్లు తొలగించారు.
• నారాయణపేట జిల్లాలో ఈ ఏడాది జనవరిలో 1,40,321 రేషన్‌కార్డులు, 5,08,503 మంది కుటుంబసభ్యులు ఉండగా.. అక్టోబర్‌లో 1,40,322 కార్డులు, 5,08,439 మంది కుటుంబసభ్యులకు చేరింది. ఈ లెక్కన 64 మంది పేర్లు తొలగించారు.
• వనపర్తి జిల్లాలో ఈ ఏడాది జనవరిలో 1,57,103 రేషన్‌కార్డులు, 5,16,465 మంది కుటుంబసభ్యులు ఉండగా.. అక్టోబర్‌లో 1,57,097 కార్డులు, 5,16,055 మంది కుటుంబసభ్యులకు చేరింది. ఈ లెక్కన 6 కార్డులు, 410 మంది పేర్లు తొలగించారు.

ఈ చిత్రంలో ఉన్న అతడి పేరు రవి. మహబూబ్‌నగర్‌ జిల్లా కేంద్రంలోని మేకలబండ ప్రాంతానికి చెందిన వ్యక్తి. ఇతడికి భార్య శాంతిప్రియ, ముగ్గు రు పిల్లలు ఉన్నారు. రేషన్‌కార్డు ఉన్నా.. అందులో భార్య పేరు లేదు. ఈ నేపథ్యంలో ప్రజాపాలన దరఖాస్తుల స్వీకరణ సమయంలో తన భార్య పేరును ఆహారభద్రత కార్డులో చేర్చాలని అప్లికేషన్‌ సమర్పించినా.. ఆన్‌లైన్‌లో నమోదు కాలేదు.