Visit:
కొల్లాపూర్‌ రూరల్‌, నవంబర్‌ 30 : కాంగ్రెస్‌ సర్కారు అన్నిరంగాల్లో విఫలం చెందిందని.. రానున్న స్థానిక సంస్థల ఎన్నికల్లో బీఆర్‌ఎస్‌ మద్దతుదారులను గెలిపించాలని మాజీ ఎమ్మెల్యే బీరం హర్షవర్ధన్‌రెడ్డి అన్నారు. కాంగ్రెస్‌ కోడేరు మండలం వర్కింగ్‌ ప్రెసిడెంట్‌ వీరపాగ కిరణ్‌కుమార్‌ బీఆర్‌ఎస్‌ రాష్ట్ర నాయకుడు రఘువర్ధన్‌ రెడ్డి, మండలాధ్యక్షుడు రాజశేఖర్‌గౌడ్‌ ఆధ్వర్యంలో ఆదివారం కొల్లాపూర్‌లో బీరం హర్షవర్ధన్‌రెడ్డి సమక్షంలో గులాబీ కండువా క ప్పుకొన్నారు.
ఈ సందర్భంగా బీఆర్‌ఎస్‌లో చేరిన వీరపాగ కిరణ్‌కుమార్‌ మా ట్లాడుతూ అమలు కాని హామీలను ఇచ్చి కాంగ్రెస్‌ ప్రజలను మోసం చేసిందన్నారు. ముఖ్యమంత్రి రేవంత్‌రెడ్డి పరిపాలనను చూసి ప్రజలు బహిరంగంగానే తిడుతున్నారని, ఎన్నికల సందర్భంగా గొప్పలకు పోయి పంచిన ఆరు గ్యారెంటీల కార్డుల గురించి నిలదీస్తున్నారని తెలిపారు. ఇందుకు సమాధానాలు లేక ప్రజల్లో తిరిగేందుకు కూడా భయపడాల్సిన దుస్థితి నెలకొన్నదన్నారు. జూపల్లి కృష్ణారావు మంత్రిగా బాధ్యతలు చేపట్టాక కింది స్థాయిలోని కార్యకర్తల సాధక బాధలు పట్టించుకున్న పాపాన పోలేదన్నారు.
జూపల్లి తీరు నచ్చక వేరే పార్టీల వైపు కాంగ్రెస్‌ నాయకులు చూస్తున్నారని ఆవేదన వ్యక్తం చేశారు. బీఆర్‌ఎస్‌ హయాంలో జరిగిన అభివృద్ధి తప్పా కాంగ్రెస్‌లో చేసిందేమీ లేదన్నారు. స్థానిక సంస్థల ఎన్నికల్లో బీఆర్‌ఎస్‌ మద్దతుదారులను గెలిపించుకొనేందుకు నిరంతరం పనిచేస్తానన్నారు. కార్యక్రమంలో బీఆర్‌ఎస్‌ రాష్ట్ర నాయకుడు రఘువర్ధన్‌ రెడ్డి, కోడేరు బీఆర్‌ఎస్‌ మండలాధ్యక్షుడు రాజశేఖర్‌ గౌడ్‌, కోడేరు మండలంలోని వివిధ గ్రామాలకు చెందిన నాయకులు, కార్యకర్తలు పాల్గొన్నారు.
