Viral news | మూడు ముళ్ల బంధంతో ఒక్క‌టైన పూజారి, ట్రాన్స్‌జండ‌ర్‌..!

Viral news | సమాజంలో నెలకొన్న మూస ధోరణులను, అపోహలను పటాపంచలు చేస్తూ ఓ జంట ఒక్కటైంది. ప్రేమకు లింగభేదాలు అడ్డురావని నిరూపిస్తూ ఓ ఆలయ అర్చకుడు (Temple Priest), ట్రాన్స్‌జెండర్ (Transgender) మహిళ వివాహ బంధంతో ఒక్కటయ్యారు. తమిళనాడు (Tamil Nadu) లోని కడలూరు జిల్లా (Cuddalore) లో జరిగిన ఈ ఆదర్శ వివాహం ఇప్పుడు దేశవ్యాప్తంగా అందరి దృష్టిని ఆకర్షిస్తోంది.

Viral news : సమాజంలో నెలకొన్న మూస ధోరణులను, అపోహలను పటాపంచలు చేస్తూ ఓ జంట ఒక్కటైంది. ప్రేమకు లింగభేదాలు అడ్డురావని నిరూపిస్తూ ఓ ఆలయ అర్చకుడు (Temple Priest), ట్రాన్స్‌జెండర్ (Transgender) మహిళ వివాహ బంధంతో ఒక్కటయ్యారు. తమిళనాడు (Tamil Nadu) లోని కడలూరు జిల్లా (Cuddalore) లో జరిగిన ఈ ఆదర్శ వివాహం ఇప్పుడు దేశవ్యాప్తంగా అందరి దృష్టిని ఆకర్షిస్తోంది. వివరాల్లోకి వెళ్తే.. కడలూరుకు చెందిన ఆలయ అర్చకుడు నాగరాజన్, అదే ప్రాంతానికి చెందిన ట్రాన్స్‌జెండర్ మహిళ సంజనను సంప్రదాయబద్ధంగా వివాహం చేసుకున్నారు.

ఇరు కుటుంబాల పూర్తి అంగీకారంతో ఈ వేడుక అత్యంత వైభవంగా జరిగింది. బంధుమిత్రులు, శ్రేయోభిలాషులతోపాటు పెద్ద సంఖ్యలో ట్రాన్స్‌జెండర్లు ఈ కార్యక్రమానికి హాజరై నూతన వధూవరులను మనసారా ఆశీర్వదించారు. ఈ పెళ్లి వేడుక ఏమాత్రం సాధారణ వివాహానికి తీసిపోని విధంగా జరిగింది. మంగళవాయిద్యాలు, డప్పు చప్పుళ్ల హోరు మధ్య పెళ్లి ఊరేగింపు కోలాహలంగా సాగింది. ఈ సందర్భంగా కుటుంబసభ్యులు, స్నేహితులు ఉత్సాహంగా నృత్యాలు చేస్తూ సందడి చేశారు. ఈ దృశ్యాలు చూస్తున్న వారికి ఇదొక సంబరంలా కనిపించింది.

ప్రస్తుతం ఈ వివాహానికి సంబంధించిన వీడియోలు, ఫోటోలు సామాజిక మాధ్యమాల్లో విస్తృతంగా ప్రచారమవుతున్నాయి. ఎన్నో అడ్డంకులను దాటుకుని ఒక్కటైన ఈ జంటపై నెటిజన్లు ప్రశంసల వర్షం కురిపిస్తున్నారు. వారి ధైర్యాన్ని మెచ్చుకుంటూ, ఇతరులకు ఆదర్శంగా నిలిచారని కామెంట్లు పెడుతున్నారు. సమాజంలో సానుకూల మార్పుకు ఈ వివాహం ఒక నిదర్శనంగా నిలుస్తుందని పలువురు అభిప్రాయపడుతున్నారు.