గార్డెనింగ్‌ గైడ్‌!

వర్షాకాలం.. మొక్కల పెరుగుదలకు అనుకూల సమయం. దాంతో చాలామంది గార్డెనింగ్‌కు ఆసక్తి చూపుతారు. మొక్కలు, కుండీలు తీసుకొచ్చి.. పెరటితోటల పెంపకం మొదలుపెడతారు.

వర్షాకాలం.. మొక్కల పెరుగుదలకు అనుకూల సమయం. దాంతో చాలామంది గార్డెనింగ్‌కు ఆసక్తి చూపుతారు. మొక్కలు, కుండీలు తీసుకొచ్చి.. పెరటితోటల పెంపకం మొదలుపెడతారు. అలాంటివారు తెలిసీ తెలియకుండా చేసే కొన్ని పొరపాట్లు.. మొక్కలకు చేటు చేస్తాయని నిపుణులు చెబుతున్నారు. ‘గార్డెనింగ్‌’లో తీసుకోవాల్సిన జాగ్రత్తలను వివరిస్తున్నారు.

• విత్తనాలు, మొలకలను ఎక్కువ లోతులో విత్తడం/ నాటడం మంచిదికాదు.
• ఒక్కో మొక్కకు ఒక్కో రకమైన నేల అనుకూలంగా ఉంటుంది. కొన్ని మొక్కలు తడి మట్టిలో పెరిగితే.. మరికొన్ని పొడి నేలలో సులభంగా బతికేస్తాయి. కొన్ని మొక్కలకు ఆమ్ల స్వభావం కలిగిన నేల అవసరం పడుతుంది. కాబట్టి, అందుకు తగ్గట్టుగానే మొక్కలు, మట్టిని ఎంచుకోవాలి.
• తక్కువ స్థలంలో ఎక్కువ మొక్కలు పెంచితే ఇబ్బందే! ఆరు బయట ఎలా ఉన్నా.. కుండీల్లో పెంచే మొక్కల మధ్య కనీస దూరం పాటించడం ముఖ్యం. లేకుంటే.. మొక్కలకు తగినంత గాలి, పోషకాలు అందకుండా పోతాయి.
• వానకాలంలో మొక్కలకు తక్కువ నీరు పోయాలి. అలాకాకుండా.. మూడు పూటలా నీళ్లు పోస్తే.. మొక్కలు చనిపోయే ప్రమాదం ఉంటుంది. ఎక్కువ నీళ్లు పెడితే.. వేర్లతోపాటు మొక్కలూ కుళ్లిపోతాయి.
• మొక్కలను పెంచే కుండీలకు డ్రైనేజీ వ్యవస్థ ఉండేలా చూసుకోవాలి. లేకుంటే, వర్షపు నీళ్లు కుండీల్లోనే నిలిచి.. మొక్కకు హాని కలిగిస్తాయి. మొక్కల వేర్లు.. కుండీ మట్టిలోని గాలిని పీల్చుకుంటాయి. నీరు అలాగే నిలిస్తే.. ఆ నేలలో గాలి ఉండదు. దాంతో, వేర్లకు ఊపిరి ఆడకుండా పోతుంది. మొక్కలు చనిపోయే ముప్పు ఉంటుంది.