పట్టుతో కవర్‌ చేద్దాం

సాధారణంగా ప్రతి ఒక్కరూ కనీసం ఆరేడు గంటలైనా నిద్రపోతారు. పడుకునేటప్పుడు చాలామంది తలకింద దిండు పెట్టుకుంటారు. పత్తితో తయారైన మెత్తటి పిల్లోపై.. కమ్మటి నిద్రలో జోగిపోతారు.

సాధారణంగా ప్రతి ఒక్కరూ కనీసం ఆరేడు గంటలైనా నిద్రపోతారు. పడుకునేటప్పుడు చాలామంది
తలకింద దిండు పెట్టుకుంటారు. పత్తితో తయారైన మెత్తటి పిల్లోపై.. కమ్మటి నిద్రలో జోగిపోతారు. అయితే.. కాటన్‌తో చేసిన దిండు కవర్ల వల్ల చర్మానికి, జుట్టుకు హాని కలుగుతుందని సౌందర్య నిపుణులు హెచ్చరిస్తున్నారు. కాటన్‌కు బదులుగా పట్టుతో తయారైన కవర్లు వాడటమే మంచిదని సూచిస్తున్నారు. జుట్టు ఆరోగ్యంతోపాటు చర్మ సంరక్షణలోనూ పట్టు కవర్లు సాయపడతాయని చెబుతున్నారు.

• కాటన్‌ కవర్లతో పోలిస్తే.. సిల్క్‌ తక్కువ తేమను గ్రహిస్తుంది. దాంతో, మాడుతోపాటు పక్కలకు పడుకున్నప్పుడు ముఖం కూడా ఎక్కువ సమయంపాటు హైడ్రేటెడ్‌గా ఉండేందుకు సాయపడుతుంది. జుట్టు కుదుళ్లలో తేమను కూడా కాపాడుతుంది.
• పత్తి, ఉన్నితో తయారైన దిండ్లపై రాత్రంతా పడుకొని ఉండటం.. జుట్టు, చర్మం ఆరోగ్యానికి చేటు చేస్తుంది. ఎక్కువగా రాపిడికి గురవడం వల్ల వెంట్రుకలు చిట్లిపోవడం, రాలిపోవడం లాంటి సమస్యలు ఇబ్బంది పెడుతాయి. అదే, మృదువుగా ఉండే సిల్క్‌తో చర్మం, వెంట్రుకలు తక్కువ రాపిడికి గురవుతాయి.
• పట్టు శీతలీకరణను ప్రోత్సహిస్తుంది. శరీరం నుంచి వేడి ఆవిర్లు రావడాన్ని నిరోధిస్తుంది. కాబట్టి, చెమట తక్కువగా పడుతుంది. ఫలితంగా చుండ్రు, శిలీంధ్రాల పెరుగుదల తగ్గుతుంది.
• పట్టు వస్ర్తాలు సహజసిద్ధమైన ‘హైపో అలెర్జెనిక్‌’ లక్షణాలు కలిగి ఉంటాయి. ఇవి బ్యాక్టీరియా, వైరస్‌ల పెరుగుదలను నియంత్రిస్తాయి. ఫలితంగా అలెర్జీలు దూరం అవుతాయి.
• పట్టు మీద పడుకోవడం వల్ల సున్నితమైన అనుభూతి కలుగుతుంది. నిద్రకూడా బాగా పడుతుంది.
• పట్టు వస్త్రం.. సహజంగానే ఉష్ణోగ్రతలను నియంత్రించే లక్షణాలను కలిగి ఉంటుంది. వేడి వాతావరణంలో చల్లగా.. చల్లని వాతావరణంలో వెచ్చగా ఉంటూ సౌకర్యవంతంగా నిద్రపుచ్చుతుంది.
• సిల్క్‌లాంటి మృదువైన ఉపరితలం కారణంగా.. నిద్రలో జుట్టు చిక్కులు పడే అవకాశం తక్కువ.

ఇలా.. ఒక్క దిండు కవర్‌ను మార్చేస్తే.. చర్మం, జుట్టు ఆరోగ్యానికి భరోసా దక్కుతుంది. ముఖ్యంగా, సున్నితమైన చర్మం, జుట్టు ఉన్నవారికి ఎంతో ఉపయోగకరంగా ఉంటుంది.