ఉద్యోగులూ.. పారాహుషార్‌!

ఉద్యోగాలంటేనే.. ఉరుకులు, పరుగులు! నెలవారీ టార్గెట్లు! జీవనశైలి లోపాలు, మారుతున్న ఆహారపు అలవాట్లు! అన్నీ కలిసి ఉద్యోగులపై తీవ్రమైన ఒత్తిడిని పెంచుతున్నాయి.

ఉద్యోగాలంటేనే.. ఉరుకులు, పరుగులు! నెలవారీ టార్గెట్లు! జీవనశైలి లోపాలు, మారుతున్న ఆహారపు అలవాట్లు! అన్నీ కలిసి ఉద్యోగులపై తీవ్రమైన ఒత్తిడిని పెంచుతున్నాయి. అందులోనూ, ఉద్యోగంతోపాటు ఇంటినీ నెట్టుకొస్తున్న మహిళలపై మరింత ప్రభావం చూపుతున్నాయి. ఫలితంగా.. వారిని అనేక ఆరోగ్య సమస్యలు చుట్టుముడుతున్నాయి. వాటినుంచి బయటపడేందుకు కొన్ని అలవాట్లను మార్చుకోవాలని మానసిక నిపుణులు చెబుతున్నారు. చిన్నచిన్న మార్పులతో ఒత్తిడిని చిత్తు చేయొచ్చని అంటున్నారు.

• నాలుగైదు కాఫీలు, టీలు లేనిదే.. ఉద్యోగుల రోజు గడవదు. కెఫిన్‌ ఎక్కువగా ఉండే ఈ ఉష్ణోదకాలను తీసుకోవడం కూడా.. అనారోగ్యాన్ని కలిగిస్తుంది. పని ఒత్తిడిని తగ్గించుకోవడానికి కాఫీలు, టీలు తాగితే.. అందులోని కెఫిన్‌ శరీరంలో కార్టిసాల్‌ ఉత్పత్తిని పెంచుతుంది. అది తీవ్రమైన మానసిక ఒత్తిడిని కలిగిస్తుంది. అందుకే.. కెఫిన్‌లేని గ్రీన్‌ టీ, లెమన్‌ టీ లాంటి వాటిని ఆశ్రయించాలి.
• చాలామంది ఉద్యోగులు ఇంటి భోజనానికి దూరంగా ఉంటారు. ఆఫీస్‌ క్యాంటీన్‌లోనో, ఆన్‌లైన్‌ ఆర్డర్స్‌తోనో కడుపు నింపేసుకుంటారు. పిజ్జాలు, బర్గర్లకు అలవాటు పడి.. ఆరోగ్యాన్ని పాడుచేసుకుంటారు. పౌష్టికాహారంతోనే ఆరోగ్యాన్ని కాపాడుకోవచ్చనే సంగతి తెలుసుకోవాలి. సమయం చిక్కినప్పుడల్లా.. సమతులాహారం తీసుకోవాలి.
• ఉద్యోగులు ఎదుర్కొనే ప్రధాన సమస్య.. నిద్రలేమి. ముఖ్యంగా రాత్రిపూట విధులు నిర్వహించేవారిని ఈ సమస్య మరింతగా వేధిస్తుంటుంది. తగినంత నిద్ర, విశ్రాంతి లేకపోతే.. లేనిపోని రోగాలు చుట్టుముడతాయి. సర్కాడియన్‌ రిథమ్‌ దెబ్బతిని.. ఒత్తిడి, ఆందోళన పెరుగుతుంది. దీన్ని నివారించడానికి సమయానికి నిద్రపోవడం అలవాటు చేసుకోవాలి.
• కూర్చొని పనిచేసే ఉద్యోగుల్లో చాలామంది బద్ధకస్తులుగా తయారవుతారు. బరువు పెరుగుతారు. దాన్నుంచి బయటపడేందుకు.. పనివేళలకు తగ్గట్టుగా వారాంతాల్లోనే వ్యాయామం చేస్తుంటారు. ఇలా సమయం చిక్కినప్పుడు అతిగా వర్కవుట్లు చేయడం కూడా.. ఆరోగ్యంపై ప్రతికూల ప్రభావం చూపుతుంది. కాబట్టి, క్రమబద్ధమైన వ్యాయామాన్ని.. రోజువారీ జీవితంలో భాగం చేసుకోవాలి.