ఆరంభ శూరత్వం వద్దు..

‘ఈ ఏడాది ఎలాగైనా బరువు తగ్గాల్సిందే!’ అనే లక్ష్యంతో కొత్త ఏడాదిని ప్రారంభిస్తారు చాలామంది. అనుకున్నదే తడవుగా జిమ్‌లో చేరిపోతారు. ఎంతో కొంత డిస్కౌంట్‌తో ఏడాది ఫీజు మొత్తం చెల్లిస్తారు. కానీ, అదంతా ఆరంభ శూరత్వమే!

‘ఈ ఏడాది ఎలాగైనా బరువు తగ్గాల్సిందే!’ అనే లక్ష్యంతో కొత్త ఏడాదిని ప్రారంభిస్తారు చాలామంది. అనుకున్నదే తడవుగా జిమ్‌లో చేరిపోతారు. ఎంతో కొంత డిస్కౌంట్‌తో ఏడాది ఫీజు మొత్తం చెల్లిస్తారు. కానీ, అదంతా ఆరంభ శూరత్వమే! జనవరి పూర్తయ్యే సరికి.. రోజువిడిచి రోజు కూడా వెళ్లలేరు. ఫిబ్రవరి వచ్చాక.. అటువైపు వెళ్లడమే మానేస్తారు. ఇలాంటి లక్ష్యంతో ఏడాదిని ప్రారంభించేవారిలో 80 శాతం మంది.. మధ్యలోనే ఆయా తీర్మానాలను అటకెక్కిస్తున్నారట. అయితే, కొంచెం స్మార్ట్‌గా ఆలోచిస్తే.. బరువు తగ్గాలన్న లక్ష్యాన్ని ఏడాది పొడవునా కొనసాగించవచ్చు.

• ముందుగా.. మీరు బరువు ఎందుకు తగ్గాలని అనుకుంటున్నారో స్పష్టత ఉండాలి. శరీరాన్ని ఫిట్‌గా ఉంచుకోవడానికా? మెరుగైన ఆరోగ్యం కోసమా? అనేది ఎప్పుడూ మీ మనసులో మెదులుతూ ఉండాలి. అప్పుడు.. మీ లక్ష్యం మీ కళ్ల ముందే కదలాడుతూ ఉంటుంది.
• ఏడాది మొత్తానికీ ఒకే లక్ష్యం పెట్టుకోకుండా.. దాన్ని చిన్నచిన్నగా విభజించుకోండి. ఏడాది మొత్తంలో 10 కిలోలు తగ్గాలని అనుకుంటే.. ప్రతి మూడు నెలలకు 2.5 కిలోల చొప్పున తగ్గేలా ప్లాన్‌ చేసుకోండి. చిన్నచిన్న లక్ష్యాలను పూర్తిచేస్తే.. ఏడాది పూర్తయ్యేసరికి మీ అసలు లక్ష్యం కూడా నెరవేరుతుంది.
• కేవలం బరువు తగ్గడమే కాకుండా.. ఆరోగ్యకరమైన ఆహారపు అలవాట్లు, క్రమం తప్పకుండా వ్యాయామం చేయడం, ఒత్తిడిని సమర్థంగా ఎదుర్కోవడం లాంటి లక్ష్యాలనూ పెట్టుకోవాలి. ఈ మూడిటిలో ఏది సక్రమంగా కొనసాగినా.. బరువు అదుపులో ఉంటుంది.
• మీ పురోగతిని ఎప్పటికప్పుడు పర్యవేక్షించడానికి ‘ఫిట్‌నెస్‌ ట్రాకర్‌’ సాయం తీసుకోండి. మీ శరీర కొలతలు, బరువును ఫిట్‌నెస్‌ యాప్‌, ట్రాకర్ల ద్వారా నిత్యం చెక్‌ చేసుకుంటూ ఉండండి. మంచి పురోగతి సాధిస్తున్నట్లు అనిపిస్తే.. మీ ఉత్సాహం కూడా రెట్టింపవుతుంది.
• రెగ్యులర్‌గా వర్కవుట్స్‌ చేసేవారితో స్నేహం చేయండి. సపోర్ట్‌ గ్రూపుల్లో చేరండి. ఈ గ్రూప్స్‌.. మిమ్మల్ని ఉత్సాహంగా, జవాబుదారీగా ఉంచడంలో సాయపడతాయి.
• మీ లక్ష్యం గురించి నలుగురికీ చెప్పండి. సోషల్‌ సపోర్ట్‌ తీసుకోండి. అప్పుడే మీరు మంచి
  ఫలితాలు పొందేలా వారినుంచి ప్రోత్సాహం లభిస్తుంది.
• మీ లక్ష్యం నెరవేరాలంటే.. మీపై మీకే నమ్మకం, చిత్తశుద్ధి ఉండాలి. అందుకే, ప్రతి మూడు నెలలకు ఒకసారైనా.. మీ లక్ష్యానికి ఎంత చేరువ అవుతున్నారో మిమ్మల్ని మీరే సమీక్ష చేసుకోండి. ఏవైనా లోటుపాట్లు ఉంటే.. పునరావృతం కాకుండా చూసుకోండి.

అలా కాకుండా.. మిమ్మల్ని మీరే మోసం చేసుకుంటే.. ఇలాంటి లక్ష్యాలు పెట్టుకోవడమే వృథా! అందుకే మీకు మీరే.. బెస్ట్‌ క్రిటిక్‌. అప్పుడే అనుకున్నది సాధించ గల్గుతారు.