జాగ్రత్త.. జాగ్రత్త!

హోలీ.. జాగ్రత్తగా జరుపుకొంటే ఆనందాల్ని పంచుతుంది. రంగుల కేళిలో ఏమరుపాటుగా ఉంటే మాత్రం.. అనారోగ్యాన్ని తెచ్చిపెడుతుంది. ముఖ్యంగా, రసాయన రంగులు చల్లుకుంటే.. లేనిపోని ఆరోగ్య సమస్యలు ఎదుర్కోవాల్సి వస్తుంది.

హోలీ.. జాగ్రత్తగా జరుపుకొంటే ఆనందాల్ని పంచుతుంది. రంగుల కేళిలో ఏమరుపాటుగా ఉంటే మాత్రం.. అనారోగ్యాన్ని తెచ్చిపెడుతుంది. ముఖ్యంగా, రసాయన రంగులు చల్లుకుంటే.. లేనిపోని ఆరోగ్య సమస్యలు ఎదుర్కోవాల్సి వస్తుంది. అందుకే.. ఈ జాగ్రత్తలు పాటించండి.

కళ్లకు భద్రత..

• సింథటిక్‌ రంగుల నుంచి కళ్లను కాపాడుకునేందుకు కళ్లజోడు ధరించండి. రంగుల్లో ఉండే రసాయనాల నుంచి కళ్లకు రక్షణ కల్పిస్తుంది.
• హోలీ ఆడేటప్పుడు కళ్లలో రంగులు పడితే.. వెంటనే కళ్లను రుద్దకండి. ఇది ఇన్ఫెక్షన్‌కు దారితీస్తుంది. కాబట్టి, కళ్లను శుభ్రమైన నీటితో కడగాలి. ఇందుకు రోజ్‌ వాటర్‌ సమర్థంగా పనిచేస్తుంది.
• కాంటాక్ట్‌ లెన్స్‌ వాడేవాళ్లు.. వాటిని తొలగించి హోలీ ఆడుకోండి. రంగుల్లో ఉండే రసాయనాలు లెన్స్‌లో చిక్కుకొని.. చికాకు, ఇన్ఫెక్షన్‌ ప్రమాదాన్ని పెంచుతాయి.

గోళ్లకు రక్షణ

హోలీ ఆడిన తర్వాత నిమ్మరసంతో గోళ్లు శుభ్రం చేసుకోండి. ఇందుకోసం నిమ్మకాయను సగానికి కోసి.. దానిపై కొద్దిగా పంచదార చల్లండి. దాని సాయంతో గోళ్లను
నెమ్మదిగా రుద్దితే.. రంగుల మరకలు ఇట్టే తొలగిపోతాయి.

జుట్టు బాగుండాలంటే..

• ముందురోజు రాత్రే జుట్టుకు కొబ్బరి నూనె రాసుకోండి. ఉదయం మరోసారి రాస్తే ఇంకా మంచిది.
• కనుబొమలకు, రెప్పలకు బేబీ ఆయిల్‌ను లైట్‌గా రాసుకుంటే సరిపోతుంది.
• ఆడవాళ్లు జుట్టును ముడేసుకోవడం బెటర్‌.

చర్మ ఆరోగ్యానికి..

• రసాయన రంగులు చర్మానికి హాని కలిగిస్తాయి. కాబట్టి, హోలీ ఆడేముందు శరీరం మొత్తం రెండుసార్లు మాయిశ్చరైజింగ్‌ లోషన్‌ రాసుకోవాలి. ఆలివ్‌, కొబ్బరి నూనెల మిశ్రమం పట్టిస్తే.. చర్మంపై పొరలాగా ఏర్పడి, రంగుల నుంచి చర్మాన్ని కాపాడుతాయి.
• కాళ్లు, చేతులకు పెట్రోలియం జెల్లీ రాసుకోవాలి.
• అన్నిటికన్నా ముఖ్యంగా.. శరీరాన్ని వీలైనంత పూర్తిగా కప్పిఉంచే దుస్తుల్ని ధరించండి. అవికూడా.. వాడి పడేసేవి అయితే ఇంకా మంచిది.
• ఇక హోలీ ఆడటం పూర్తయిన వెంటనే స్నానం చేయండి. రంగులతోనే రోజంతా కాలక్షేపం చేస్తే.. చర్మానికి అంటుకుపోయిన రంగులు మరింత హాని కలిగిస్తాయి.
• స్నానం తర్వాత మరోసారి శరీరానికి మాయిశ్చరైజర్‌ రాసుకుంటే సరిపోతుంది.