Tea History | వందేండ్ల చరిత్ర కలిగిన ఈ టీ కొట్టులో ఎంతటి సెలబ్రెటీ అయినా ఛాయ్‌ తాగాల్సిందే!

Tea History | ఉష్ణోదక ప్రియులకు తేనీరు అమృత తుల్యం అనడంలో సందేహం లేదు. ప్రతి రోజూ ఆద్యంతాల్లో అంటే తొలి, మలి సంజెల్లో తేనీటిని ఆస్వాదించాల్సిందే. పైగా అమృత తుల్యమైన టీ తాగినప్పుడు కలిగే ఆనందానికి ఆది తప్ప అంతం ఉండదని వారి ముక్తాయింపు. అందుకే కాబోలు పుణెలోని ఓ టీ కొట్టుకు ‘ఆద్య అమృతతుల్య’ పేరు పెట్టుకున్నారు దాని యజమానులు.

October 8, 2023 / 09:40 AM IST

Tea History | వందేండ్ల చరిత్ర కలిగిన ఈ టీ కొట్టులో ఎంతటి సెలబ్రెటీ అయినా ఛాయ్‌ తాగాల్సిందే!

Tea History | ఉష్ణోదక ప్రియులకు తేనీరు అమృత తుల్యం అనడంలో సందేహం లేదు. ప్రతి రోజూ ఆద్యంతాల్లో అంటే తొలి, మలి సంజెల్లో తేనీటిని ఆస్వాదించాల్సిందే. పైగా అమృత తుల్యమైన టీ తాగినప్పుడు కలిగే ఆనందానికి ఆది తప్ప అంతం ఉండదని వారి ముక్తాయింపు. అందుకే కాబోలు పుణెలోని ఓ టీ కొట్టుకు ‘ఆద్య అమృతతుల్య’ పేరు పెట్టుకున్నారు దాని యజమానులు. నగరంలోని బుధవార్‌పేట్‌లో ఉన్న ఈ చాయ్‌ దుకాణానికి ఇంకో ఏడాది పోతే వందేండ్లు నిండుతాయి. 1924లో దీనిని ప్రారంభించిన నాటి నుంచీ నాలుగు తరాలుగా అదే ఆదరణ కొనసాగుతున్నది. స్థానికులను ఆకట్టుకున్న ఈ కొట్టుకు ప్రముఖులూ అభిమానులే. పుణెకు ఏ సెలెబ్రిటీ వచ్చినా ఇక్కడి టీ తాగాల్సిందే.

భారత తొలి ప్రధాని పండిత్‌ జవహర్‌ లాల్‌ నెహ్రూ కూడా ‘అమృతతుల్య’ ప్రియుడే! మరాఠా నాయకుడు శరద్‌ పవార్‌, శివసేన వ్యవస్థాపకుడు బాల్‌ ఠాక్రే ఇక్కడి టీ రుచి చూశారని నాలుగో తరానికి చెందిన కొట్టు యజమాని రాహుల్‌ సగర్వంగా చెబుతుంటాడు. అంతేకాదు, బాలీవుడ్‌ తారలు ఎందరో ఈ చాయ్‌కి దాసులే! టీ షాపు ఉన్న బుధవార్‌పేట్‌లోనే ‘మెలోడీ మేకర్స్‌’ రికార్డింగ్‌ సంస్థ ఉండేది. దీంతో ఇక్కడికి పాటల రికార్డింగ్‌ కోసం వచ్చిన బాలీవుడ్‌ నటులు, గాయకులు ‘అమృతతుల్య’లో ఓ టీ తాగి రికార్డింగ్‌ స్టూడియోలోకి వెళ్లేవాళ్లు. అలా షమ్మీకపూర్‌, జానీవాకర్‌, మహమ్మద్‌ రఫీ, లతా మంగేష్కర్‌ తదితర ప్రముఖులు వచ్చేవారని యజమాని కథలు కథలుగా చెబుతాడు. ‘మా ముత్తాత అప్పట్లో బంగు (గుడుంబా) దుకాణం నడిపేవాడు. అనుబంధంగా టీ కొట్టూ ఉండేది. 1924లో గంజాయిపై పూర్తిస్థాయి నిషేధం విధించడంతో దానిని మానేసి తేనీటి దుకాణం ప్రారంభించాడు. అప్పటి నుంచి మా దుకాణం రోజూ తేనీటి ప్రియులతో కళకళలాడుతూనే ఉంది’ అంటాడు రాహుల్‌.

వెనీలా టీ

కావలసినవి: వేడినీళ్లు: ఒక కప్పు, ఆరెంజ్‌ పికో టీ బ్యాగ్‌: ఒకటి, వేడి పాలు: పావుకప్పు, చక్కెర: ఒక టేబుల్‌ స్పూన్‌, వెనీలా కాడ: అంగుళం, దాల్చిన చెక్క: అర అంగుళం ముక్క

తయారీ: వేడినీటిని ఒక మగ్‌లో పోసుకోవాలి. టీ బ్యాగ్‌ అందులో వేసి మూడు నిమిషాలపాటు ఆడించి తీసేయాలి. తర్వాత మగ్‌లో పాలుపోసి చక్కెర, వెనీలా కాడ, దాల్చిన చెక్క వేసి కలపాలి. మరోగ్లాసులోకి వడగట్టుకుంటే వెనీలా టీ రెడీ! టీ చల్లారితే నచ్చని వాళ్లు రెండు నిమిషాలు పొయ్యిమీద వేడి చేసుకోవచ్చు.