Tea History | అప్పట్లో తేయాకు కోసం ఆంగ్లేయులు, చైనా మధ్య పెద్ద యుద్ధమే జరిగింది!!

Tea History | గల్లీ లెవల్లో సింగిల్‌ టీ కోసం బాహాబాహీకి దిగే సన్నివేశాలు మనం చూస్తుంటాం! ఢిల్లీ లెవల్లో మొగలుల నాటి పానిపట్‌ యుద్ధాల గురించి చరిత్ర పాఠాల ద్వారా తెలుసుకున్నాం! పరోక్షంగా తేయాకు కోసం రెండు రాజ్యాల మధ్య యుద్ధ మేఘాలు కమ్ముకున్న వైనం చరిత్ర పుటల్లో ఇంకా మసాలా టీ అంత ఘాటుగా, ఇరానీ చాయంత చిక్కగా దాక్కొని ఉంది.

June 25, 2023 / 07:45 AM IST

Tea History | అప్పట్లో తేయాకు కోసం ఆంగ్లేయులు, చైనా మధ్య పెద్ద యుద్ధమే జరిగింది!!

Tea History | గల్లీ లెవల్లో సింగిల్‌ టీ కోసం బాహాబాహీకి దిగే సన్నివేశాలు మనం చూస్తుంటాం! ఢిల్లీ లెవల్లో మొగలుల నాటి పానిపట్‌ యుద్ధాల గురించి చరిత్ర పాఠాల ద్వారా తెలుసుకున్నాం! పరోక్షంగా తేయాకు కోసం రెండు రాజ్యాల మధ్య యుద్ధ మేఘాలు కమ్ముకున్న వైనం చరిత్ర పుటల్లో ఇంకా మసాలా టీ అంత ఘాటుగా, ఇరానీ చాయంత చిక్కగా దాక్కొని ఉంది. 19వ శతాబ్దిలో యునైటెడ్‌ కింగ్‌డమ్‌కు చైనా నుంచి తేయాకు ఎగుమతులు జోరుగా సాగేవి. దీంతోపాటు పట్టుదుస్తులు, పింగాణీ వస్తువులు కూడా ఇంగ్లండ్‌కు పంపేవాళ్లు చైనీయులు. వీటికి ప్రతిగా మరేదైనా వస్తువులు దిగుమతి చేసుకోవాలని కోరినా ఒప్పుకోకుండా వెండినాణేలను ప్రతిగ్రహించేవాళ్లు.

ఏండ్లు గడిచేసరికి యూకేలో వెండి నిల్వలు పడిపోయాయి. బొక్కసంలోని వెండి అంతా మంచుకొండలా కరిగిపోసాగింది. ఇలాగే ఉపేక్షిస్తే.. తమ దేశం దివాలా తీస్తుందని భావించిన ఆంగ్లేయులు కుయుక్తితో ‘నల్లమందు’ గుండును చైనాపై ప్రయోగించారు. తమ ఏలికలో ఉన్న భారతదేశంతోపాటు ఆఫ్ఘనిస్థాన్‌ తదితర దేశాల్లో నల్లమందు పండించి చైనాలో దొంగచాటుగా అమ్మడం మొదలుపెట్టారు. లక్షలాది మంది మత్తుపదార్థాలకు బానిసై నాలుగింతల వెండి నాణేలు సమర్పించి మరీ నల్లమందు కొనుగోలు చేసేవారు. అలా వసూలైన వెండినాణేలు ఇచ్చి మళ్లీ తేయాకు దిగుమతి చేసుకునేవారు.

ఇలా ఆంగ్లేయుల ఎత్తు పారడంతో తలపట్టుకున్న చైనా పాలకులు ఇంగ్లండ్‌తో తాడోపేడో తేల్చుకోవాలని భావించారు. దాదాపు మూడేండ్లపాటు ఇరుదేశాల మధ్య ఓ మోస్తరు యుద్ధమే సాగింది. వందల మంది సైనికులు ప్రాణాలు కోల్పోయారు. 1839-42 మధ్య జరిగిన ఈ సమరం మొదటి ఓపియమ్‌ యుద్ధంగా చరిత్రలో చోటు దక్కించుకుంది. చివరికి కొన్ని ఒప్పందాల తర్వాత యుద్ధం సమసిపోయింది.

రాయ్‌బాస్‌ టీ

కావలసినవి: రాయ్‌బాస్‌ టీపొడి (ఆన్‌లైన్‌ మార్కెట్‌లో దొరుకుతుంది): 1 టీ స్పూన్‌, నీళ్లు: ఒక కప్పు, నిమ్మరసం: ఒక టేబుల్‌ స్పూన్‌, తేనె: రెండు టేబుల్‌ స్పూన్లు

తయారీ: ఒక గిన్నెలో నీళ్లు పోసి బాగా మరిగించాలి. టీ పొడి వేసి మరో రెండు నిమిషాలు సన్నని మంట మీద వేడి చేయాలి. కప్పులో నిమ్మరసం, తేనె వేసి అందులోకి టీని వడకట్టుకోవాలి. యాంటీ ఆక్సిడెంట్లు పుష్కలంగా ఉన్న రాయ్‌బాస్‌ టీ తాగడం వల్ల ఉబ్బసం నుంచి ఉపశమనం లభిస్తుంది. చర్మ సంబంధమైన ఎలర్జీలు తగ్గుముఖం పడతాయి.