Tea History | ఒక టీ పొడి పరిమళం వీధి వీధంతా గుబాళిస్తుంది. మరో టీ.. రంగు, రుచితోపాటు చిక్కదనాన్నీ సంతరించుకొని ట్రిపుల్ ధమాకా అందిస్తుంది. ఇంకో టీ ‘వాహ్’ అనేంత టేస్టుంటుంది. తేనీటి రుచి అంతా చాయపత్తదే! శుద్ధతను బట్టి తేయాకు ఖరీదు ఉంటుంది. ఆకాశాన్నంటే ధరలున్న ఈ రోజుల్లో కిలో టీ పొడి ఖరీదు రూ.1,200 మించదు. కానీ, చైనాలో పుట్టి పెరిగిన డా హాంగ్ పావో ( Da Hong Pao ) టీ పొడిని కొనాలంటే ఆస్తులు అమ్ముకోవాల్సిందే! కిలో తేయాకు ధర అచ్చంగా రూ.10 కోట్లు మరి! వంద గ్రాముల తేయాకు కొనాలన్నా రూ.కోటి వెచ్చించాల్సిందే!
చైనాలోని ఫుజియన్ ప్రావిన్స్ వుయిసాస్ ప్రాంతంలో ఈ తేయాకు మొక్కల ఆనవాళ్లు కనిపిస్తాయి. ఈ తరహా మొక్కలు చాలా అరుదుగా ఉన్నాయట. వాటిని ప్రత్యేక పద్ధతుల్లో పెంచుతారట. పైగా డా హాంగ్ పావో తేయాకులో అనేక రోగాలను నయం చేసే ఔషధ గుణాలున్నాయని పరిశోధనల్లో తేలింది. అందుకే, దీనికి తేయాకు మార్కెట్లో చాలా డిమాండ్ ఉంది. ఈ టీ తాగితే ప్రాణాంతక వ్యాధులు నయం అవుతాయని కొందరు విశ్వసిస్తారు. దీనికి బలం చేకూర్చేలా ఓ కథ ప్రచారంలో ఉంది. చైనాను మింగ్ వంశీయులు చాలాకాలం పాలించారు. ఆ వంశానికి చెందిన ఒక రాణి అనారోగ్యంతో మంచాన పడిందట. పట్టమహిషి మంచం పట్టడంతో మనోవ్యాధితో రాజు కూడా వ్యాధిగ్రస్తుడయ్యాడట. ఆస్థాన వైద్యులు డా హాంగ్ పావో తేయాకు చాయ్తో వైద్యం చేయడంతో కొద్ది రోజుల్లో రాణి కోలుకుందట! రాణీగారు మంచం దిగగానే.. రాజుగారి మనసు కుదుటపడి ఆరోగ్యం పుంజుకుందట! అప్పటినుంచి ఈ టీని మృత సంజీవనిగా భావిస్తారు. కాలక్రమంలో ఈ తేయాకు మొక్కలు చాలావరకూ అంతరించిపోయాయి. ఇప్పటికీ కొన్ని తల్లి మొక్కలను కాపాడుతూ డా హాంగ్ పావో జాతిని కాపాడుతున్నారు. 1972లో తమ దేశంలో పర్యటించిన అమెరికా అధ్యక్షుడు రిచర్డ్ నిక్సన్కు చైనీస్ కమ్యూనిస్ట్ పార్టీ ప్రెసిడెంట్ మావో 200 గ్రాముల డా హాంగ్ పావో టీ బ్యాగ్ ఇవ్వడం విశేషం!
కావలసినవి: నీళ్లు: ఒక కప్పు, లావెండర్ బడ్స్ టీ బ్యాగ్: 1, తేనె: ఒకటిన్నర టేబుల్ స్పూన్, నిమ్మకాయ: సగం ముక్క
తయారీ: స్టౌ మీద గిన్నె పెట్టి నీళ్లను బాగా మరిగించాలి. గ్లాసులో తేనె పోసుకోవాలి. నిమ్మకాయ పిండుకోవాలి. నీళ్లు బాగా మరిగిన తర్వాత గ్లాసులోకి ఒంపుకోవాలి. టీ బ్యాగ్ వేసి రెండు నిమిషాలు ఆడించాలి. పరిమళాలు వెదజల్లే లావెండర్ టీ సిద్ధం. హాయిగా ఆస్వాదించడమే.
ఒక్కో కప్పు టీ.. ఒక్కో ఊహాలోకంలో విహరింపజేస్తుంది.
– క్యాథెరీన్ డౌజల్, ఆంగ్ల రచయిత
Tea History | చైనాలో క్రీ.పూ. నుంచే తేయాకు పండినప్పటికీ జపాన్కు అస్సలు ఇవ్వలేదు.. చివరకు ఆ బౌద్ధ భిక్షువు పుణ్యమా అని చేరింది!Tea Tales | తేయాకు తోటలకు వెళ్లి మీరూ ఇలా మోసపోయారా?
Tea | కేరళలోని ఈ ఆలయంలో ఛాయ్నే తీర్థం.. పెసర గుడాలే ప్రసాదం !!
Tea History | అప్పట్లో తేయాకు కోసం ఆంగ్లేయులు, చైనా మధ్య పెద్ద యుద్ధమే జరిగింది!!
Tea | రైలు ప్రయాణంలో ఒక కప్పు ఛాయ్ తాగితే ఆ కిక్కే వేరు!