బాల్‌బ్యాడ్మింటన్‌ @ బోనకల్లు

బోనకల్లు మండలంలోని ముష్టికుంట్లకు చెందిన అమరేషు లింగయ్య అనే క్రీడాకారుడు 1996లో బాల్‌బ్యాడ్మింటన్‌ క్రీడపై మక్కువతో మండల కేంద్రంలో మరికొందరితో కలిసి శాంతిస్నేహ యూత్‌ను ఏర్పాటు చేశారు.

 

• నిరుపేద కుటుంబాల్లో జన్మించి తెలంగాణకే వన్నె తెచ్చిన ఆణిముత్యాలు
• 9మంది క్రీడాకారులకు ఇంటర్నేషనల్‌ స్టార్‌ ఆఫ్‌ ఇండియా అవార్డులు
• విద్యతోపాటు క్రీడల్లోనూ రాణించి ఉద్యోగాలు సాధించిన విజేతలు
• తన కుమార్తెలతోనే శిక్షణ మొదలుపెట్టి రాష్ట్ర జట్టును అందించిన అమరేశి లింగయ్య
• డిసెంబర్‌లో గోదావరిఖనిలో రాష్ట్రస్థాయి, కేరళలో జాతీయస్థాయి పోటీలు..
• ప్రాతినిధ్యం వహించనున్న బోనకల్లు క్రీడాకారులు

కృషి ఉంటే మనుషులు రుషులవుతారన్న నానుడిని నిజం చేశారు బోనకల్లు మండల క్రీడాకారులు. నిరుపేద కుటుంబాల్లో జన్మించినా అసాధారణ ప్రతిభ చాటుతూ తెలంగాణకే వన్నె తెచ్చిన ఆణిముత్యాలుగా నిలిచారు. బాల్‌బ్యాడ్మింటన్‌ క్రీడకే బోనకల్లు మండలాన్ని పుట్టినిల్లుగా నిలిపారు. పేదరికం, ఓటమి, నిరాశ వంటివి వీరి ప్రతిభ ముందు దిగదుడుపేనన్నా అతిశయోక్తి కాదు. కేవలం క్రీడలకే పరిమితం కాకుండా చదువుల్లోనూ రాణిస్తూ ఉద్యోగాలూ సాధిస్తూ విజేతలుగా నిలుస్తున్నారు. కూలీ పనులు చేసుకునే తల్లిదండ్రులు సైతం తమ పిల్లలను ప్రోత్సహిస్తుండడంతో క్రీడానైపుణ్యాన్ని పెంపొందించుకొని రాష్ట్ర, జాతీయస్థాయి చాంపియన్‌షిప్‌లలో సత్తా చాటుతున్నారు.

-మధిర, నవంబర్‌ 27

మధిర, నవంబర్‌ 27: బోనకల్లు మండలంలోని ముష్టికుంట్లకు చెందిన అమరేషు లింగయ్య అనే క్రీడాకారుడు 1996లో బాల్‌బ్యాడ్మింటన్‌ క్రీడపై మక్కువతో మండల కేంద్రంలో మరికొందరితో కలిసి శాంతిస్నేహ యూత్‌ను ఏర్పాటు చేశారు. స్థానికులైన కే.వీరయ్య, పారుపల్లి సురేశ్‌, చావా వెంకటేశ్వరరావు సహా ఇంకొంతమందితో బాల్‌బ్యాడ్మింటన్‌ క్రీడను ప్రారంభించారు. 1996లో తన ఇద్దరు కుమార్తెలతోపాటు మరికొంతమంది విద్యార్థులను జట్టుగా చేసి శిక్షణ మొదలుపెట్టారు. అక్కడి నుంచి మొదలైన బోనకల్లు బాల్‌బ్యాడ్మింటన్‌ ప్రస్థానం అప్రతిహతంగా ముందుకు సాగింది.

2018 వరకు రాష్ట్ర, జాతీయ స్థాయిలో సబ్‌ జూనియర్‌, జూనియర్‌, సీనియర్‌ విభాగాల్లో దాదాపు అందరూ ఆయన దగ్గర శిక్షణ పొందిన బోనకల్లు మండల క్రీడాకారులే కావడం విశేషం. అసలు ఈ క్రీడకు తెలంగాణ రాష్ట్ర జట్టు అంటే అందులో మొత్తం ఈయన శిక్షణ ఇచ్చిన బోనకల్లు బాలబాలికలే. ఆయన తర్ఫీదుతో బరిలో నిలిచిన క్రీడాకారులు ఒక్కో విజయాన్నీ సాధిస్తూ జాతీయ స్థాయిలో మకుటం లేని విజేతలుగా నిలిచారు.

అంతర్జాతీయ స్థాయిలో ఒకరు, జాతీయ స్థాయిలో 9 మంది బాలబాలికలు స్టార్‌ ఆఫ్‌ ఇండియా క్రీడాకారులుగా ఎంపికై అనేక పతకాలను సొంతం చేసుకున్నారు. 2021-22లో కర్నాటకలోని అల్వాలో జరిగిన జాతీయస్థాయి పోటీల్లో రాణించి ట్రోఫీని అందుకున్నారు. ఈ ఏడాది డిసెంబర్‌ 9, 10, 11 తేదీల్లో గోదావరిఖనిలో జరిగే రాష్ట్రస్థాయి పోటీల్లోనూ, ఈ నెల 24 నుంచి 28 వరకు కేరళలో జరిగే జాతీయస్థాయి పోటీల్లోనూ బోనకల్లు నుంచి వెళ్లే పురుషులు, మహిళల జట్లు ఆడనున్నాయి. లింగయ్య ఇప్పటి వరకు 300 మంది క్రీడాకారులను తీర్చిదిద్దారు.

వచ్చే నెలలో పోటీలకు సిద్ధంగా..
బోనకల్లు కేంద్రంగా జిల్లా స్థాయి నుంచి జాతీయ స్థాయి వరకు బాల్‌బ్యాడ్మింటన్‌లో ప్రతిభ చూపుతున్న క్రీడాకారులు డిసెంబరులో పోటీలకు సిద్ధమయ్యారు. డిసెంబరు 9, 10, 11 తేదీల్లో గోదావరిఖనిలో జరిగే రాష్ట్రస్థాయి పోటీల్లోనూ, డిసెంబరు 24 నుంచి 28 వరకు కేరళలో జరిగే జాతీయస్థాయి పోటీల్లోనూ ఆడనున్నారు. పురుషుల జట్టు నుంచి వరికూటి వీరబాబు, వెంకటస్వామి, నూనావత్‌ గోపి, సీహెచ్‌ శశిధర్‌, షేక్‌ హస్‌లామ్‌, మహిళల జట్టు నుంచి పండగ పూజిత, మారుతి కీర్తి, బీ.చైతన్య, పీ.శివానీ, బీ.సహస్ర, కే.ధరణి పాల్గొననున్నారు.

నా కుమార్తెలతోనే శిక్షణ మొదలుపెట్టా..
బాల్‌బ్యాడ్మింటన్‌ అంటే చిన్ననాటి నుంచీ నాకు ఎంతో మక్కువ. పెద్దయ్యాక కుటుంబ పోషణ కష్టమైనా ఈ ఆటను వదులుకోవాలని అనిపించలేదు. ఆర్థికంగా ఎంత కష్టమైనా ఈ క్రీడను నిలబెట్టాలనుకున్నా. ముష్టికుంట్ల గ్రామం నుంచి బోనకల్లు వచ్చి జీవనోపాధి కోసం ఇక్కడ ఒక ఆడియా రికార్డింగ్‌ సెంటర్‌ పెట్టుకున్నా. దానిమీదే కుటుంబాన్ని వెళ్లదీశా. బాల్‌బ్యాడ్మింటన్‌కు ప్రాణం పోయాలన్న ఆశతో నా ఇద్దరు కుమార్తెలు ఉష, నిరోషాలతోనే కోచింగ్‌ మొదలుపెట్టాను. మరికొంతమంది పిల్లలను పోగు చేసి ఆణిముత్యాలుగా తీర్చిదిద్దా. నేను శిక్షణ ఇచ్చిన విద్యార్థులందరూ ఇప్పుడు జాతీయ, అంతర్జాతీయ క్రీడాకారులు.

-అమరేషు లింగయ్య, శిక్షకుడు

జాతీయ, అంతర్జాతీయ పోటీల్లో..

• భుక్యా రమేశ్‌ అత్యంత ప్రతిభ కనబరిచి స్టార్‌ ఆఫ్‌ ఇండియా క్రీడాకారుడిగా ఎంపికయ్యాడు. 2006 అక్టోబర్‌ 12 నుంచి 15 వరకు ఛత్తీస్‌గఢ్‌ రాయ్‌పూర్‌లో 26వ సబ్‌ జూనియర్‌ జాతీయ పోటీల్లో ఆడి స్టార్‌ ఆఫ్‌ ఇండియా మెడల్‌ను కైవసం చేసుకున్నాడు. ప్రస్తుతం ప్రైవేటు పాఠశాలలో పీఈటీగా పని చేస్తూన్నాడు.
• 2006లో మహారాష్ట్ర చంద్రపూర్‌లో ఫిబ్రవరి 15 నుంచి 19 వరకు జరిగిన జూనియర్‌ జాతీయ పోటీల్లో భుక్య ఉమ అత్యంత ప్రతిభ కనబరిచి తెలంగాణ నుంచి స్టార్‌ ఆఫ్‌ ఇండియా అవార్డు సాధించిన మొట్టమొదటి క్రీడాకారిణిగా నిలిచింది. 2013లో నేపాల్‌లో జరిగిన పోటీల్లో అంతర్జాతీయ క్రీడాకారిణిగానూ గుర్తింపు పొందింది. ప్రస్తుతం ఎమ్మెస్సీ బీఈడీ పూర్తి చేసింది. స్పోట్స్‌ కోటాలో పోస్టల్‌ డిపార్టుమెంట్‌లో హైదరాబాద్‌లో ఉద్యోగం సాధించింది.
• హర్యానా డెహ్రాడూన్‌లో 2007 జూన్‌ 1 నుంచి 4 వరకు జరిగిన సబ్‌ జూనియర్‌ పోటీల్లో ప్రతిభ చూపిన జరపల శివకృష్ణ స్టార్‌ ఆఫ్‌ ఇండియాగా గుర్తింపు తెచ్చుకొన్నాడు. పీఈటీ ట్రైనింగ్‌ పూర్తి చేసి మండల కేంద్రంలోని ప్రభుత్వ గురుకుల పాఠశాలలో కాంట్రాక్టు పద్ధతిలో పీఈటీగా పని చేస్తున్నాడు.
• తమిళనాడు చెన్నైలో 2008 మార్చిలో జరిగిన సబ్‌ జూనియర్‌ పోటీలో, ముంబయిలో 2012 డిసెంబర్‌లో జరిగిన పోటీల్లో నూనావత్‌ బుజ్జి అనే క్రీడాకారిణి కూడా రెండుసార్లు స్టార్‌ ఆఫ్‌ ఇండియా అవార్డు పొందింది. ఖమ్మంలో ప్రైవేటు కళాశాలలో టీటీసీ ట్రైనింగ్‌ పూర్తి చేసి ప్రైవేటు పాఠశాలో ఉపాధ్యాయురాలిగా పనిచేస్తోంది.
• హర్యానా రాష్ట్రం కురుక్షేత్రలో 2009 మే 9 నుంచి 13 వరకు జరిగిన సబ్‌ జూనియర్‌ బాల్‌బ్యాడ్మింటన్‌ పోటీల్లో జెడపల తిరుపతమ్మ నైపుణ్యాన్ని ప్రదర్శించి జాతీయస్థాయి సెలెక్టర్ల ద్వారా స్టార్‌ ఆఫ్‌ బాల్‌బ్యాడ్మింటన్‌గా గుర్తింపు పొందింది.
• పంజాబ్‌ అమృతసర్‌లో 2009లో జాతీయస్థాయి బాల్‌బ్యాడ్మింటన్‌ పోటీల్లో ఆలిండియా బెస్ట్‌ ప్లేయర్‌గా రాణించిన బాణోత్‌.గోపాల్‌ జాతీయస్థాయిలో గుర్తింపు తెచ్చుకొన్నాడు. ప్రస్తుతం ప్రైవేట్‌ ఉద్యోగం చేస్తున్నాడు.
• 2011 జనవరిలో చెన్నైలో జరిగిన జాతీయస్థాయి పోటీల్లో భూక్యా నరేశ్‌ ఉత్తమ ప్రతిభను కనబర్చి స్టార్‌ ఆఫ్‌ ఇండియాగా గుర్తింపు పొందాడు.
• 2009లో ఏపీలోని కడపలో, 2010లో రాజస్తాన్‌లోని డుల్‌పుర్‌లో, 2012లో కర్ణాటక తుమ్‌కురలో జరిగిన సబ్‌ జూనియర్‌ పోటీల్లో నూనావత్‌ గోపి చిన్న వయసులోనే అత్యంత ప్రతిభను ప్రదర్శించి పలువురి మన్ననలతోపాటు స్టార్‌ ఆఫ్‌ ఇండియా అవార్డునూ పొందాడు. 13 ఏళ్ల వయసులోనే మూడుసార్లు స్టార్‌ ఆఫ్‌ ఇండియా అవార్డులు కైవసం చేసుకున్నాడు.
• 2013 డిసెంబర్‌ 5 నుంచి 15 వరకు ఏపీలోని తిరుపతిలో జరిగిన సబ్‌ జూనియర్‌ పోటీల్లో బానావత్‌ గోపి ఆలిండియా బెస్ట్‌ ప్లేయర్‌గానూ, స్టార్‌ ఆఫ్‌ ఇండియాఅవార్డులు పొందాడు.
• 2014లో అక్టోబర్‌ 1 నుంచి 5 వరకు తమిళనాడు మధురైలో జరిగిన జాతీయస్థాయి బాల్‌బ్యాడ్మింటన్‌ పోటీల్లో భూక్యా దుర్గాప్రసాద్‌ నైపుణ్యాన్ని ప్రదర్శించి స్టార్‌ ఆఫ్‌ ఇండియా అవార్డును పొందాడు.