రోడ్లపై రయ్.. రయ్‌!

గతంలో రహదారులపై ప్రయాణం చేయాలంటే నరకం కనిపించేది. గుంతల రోడ్లపై పడుతూ లేస్తూ ప్రయాణం చేయాల్సి వచ్చేది. అడుగడుగునా గుంతలు.. అతుకుల బొంతలా ఉండేవి. తెలంగాణ ఏర్పాటు తర్వాత ముఖ్యమంత్రి కేసీఆర్‌ రోడ్ల నిర్మాణంపై ప్రత్యేక దృష్టిసారించారు.

• ఉమ్మడి పాలనలో రోడ్డు ప్రయాణం ప్రహసనం
• స్వరాష్ట్రం వచ్చిన తర్వాత రోడ్ల విస్తరణపై సర్కార్‌ ప్రత్యేక దృష్టి
• రోడ్లు, బ్రిడ్జీలు, కల్వర్టుల నిర్మాణాలతో పెరిగిన వాహనాల వేగం.. తగ్గిన సమయం
• నేడు సులువుగా గమ్యస్థానాలకు..

గతంలో రహదారులపై ప్రయాణం చేయాలంటే నరకం కనిపించేది. గుంతల రోడ్లపై పడుతూ లేస్తూ ప్రయాణం చేయాల్సి వచ్చేది. అడుగడుగునా గుంతలు.. అతుకుల బొంతలా ఉండేవి. తెలంగాణ ఏర్పాటు తర్వాత ముఖ్యమంత్రి కేసీఆర్‌ రోడ్ల నిర్మాణంపై ప్రత్యేక దృష్టిసారించారు. దీంతో రహదారుల ముఖచిత్రం పూర్తిగా మారిపోయింది. మారుమూల పల్లెల్లోనూ అద్దంలా మెరిసే రహదారులు నిర్మించారు. ప్రయాణంలో వేగం పెరిగింది. రోడ్లపై వాహనాలు రయ్‌ రయ్‌ అంటూ దూసుకెళ్తున్నాయి. ప్రతి జిల్లాలో గ్రామాల నుంచి మండల కేంద్రాలకు వెళ్లే రోడ్లను సింగిల్‌ నుంచి డబుల్‌ రోడ్లుగా మార్చారు. మండల కేంద్రాల నుంచి జిల్లా కేంద్రాలకు చేరుకునే రోడ్లను ఫోర్‌లేన్‌ రోడ్లుగా మలిచారు. అంతేకాదు నదులు, వాగులపై వంతెనలు, కల్వర్టులు నిర్మించారు. కొత్తగా లింక్‌ రోడ్లు నిర్మించి ఏజెన్సీవాసులకు మెరుగైన రవాణా వసతులు కల్పించారు. గతంలో గంటకు 40 నుంచి 50 కిలోమీటర్లు వెళ్లిన వాహనాలు రోడ్ల విస్తరణ తర్వాత ఇప్పుడు 60 నుంచి 80 కిలోమీటర్ల వేగంతో వెళ్తున్నాయి.

ఖమ్మం, మే 17 (నమస్తే తెలంగాణ ప్రతినిధి): ఉమ్మడి ఆంధ్రప్రదేశ్‌లో గ్రామాలకు రవాణా సౌకర్యాలు అంతంతమాత్రంగా ఉండేవి. అందుకు కారణం సరైన రోడ్లు లేకపోవడమే అన్నది సుస్పష్టం. రాష్ట్రీయ రహదారుల పరిస్థితి అయితే అడగుకో గుంత.. అతుకుల బొంతలా ఉండేది.. ఇక గ్రామీణ ప్రాంతాల్లో అంతర్గత రోడ్ల నిండా గతుకులే. ఇక వానకాలం వస్తే చిన్న సైజు స్విమ్మింగ్‌ పూల్స్‌. గ్రామాల నుంచి మండల కేంద్రాలకు వెళ్లాలన్నా, అక్కడి నుంచి జిల్లాకేంద్రాలకు వెళ్లాలన్నా ప్రయాణికులకు ప్రహసనమే. గతుకుల రోడ్ల కారణంగా ఆరోజుల్లో ప్రమాదాల సంఖ్య కూడా ఎక్కువగా ఉండేది. గ్రామీణ రహదారుల్లో ఎదరెదురుగా వాహనాలు ఢీకొనేవి. నిత్యం ఏదో ఒకచోట ప్రాణాలు గాలిలో తేలిపోయేవి. తెలంగాణ సిద్ధించిన తర్వాత ముఖ్యమంత్రిగా కేసీఆర్‌ రోడ్లు నిర్మాణంపై ప్రత్యేక దృష్టి సారించారు. ప్రతి జిల్లాలో గ్రామాల నుంచి మండల కేంద్రాలకు వెళ్లే రోడ్లను సింగిల్‌ రోడ్ల నుంచి డబుల్‌ రోడ్డుగా మార్చారు. మండల కేంద్రాల నుంచి జిల్లా కేంద్రాలకు చేరుకునే రోడ్లను ఫోర్‌లైన్‌ రోడ్లుగా మలిచారు. అంతేకాదు నదులు, వాగులపై వంతెనలు, కల్వర్టులు నిర్మించారు. కొత్తగా లింక్‌ రోడ్లు నిర్మించి ఏజెన్సీవాసులకు మెరుగైన రవాణా వసతులు కల్పించారు. ప్రభుత్వ ఆదేశాల మేరకు పంచాయతీరాజ్‌, రోడ్లు భవనాలశాఖ అధికారులు రహదారుల నిర్మాణంపై దృష్టి సారించారు. ప్రతిష్ఠాత్మకంగా ఫ్లోటింగ్‌ ఎక్కువగా ఉన్న రహదారుల విస్తరణ చేపట్టారు. రోడ్ల విస్తరణ తర్వాత గతంలో గంటకు 40 నుంచి 50 కిలోమీటర్లు వెళ్లిన అవే వాహనాలు ఇప్పుడు 60 నుంచి 80 కిలోమీటర్ల వేగంతో వెళ్తున్నాయి.

సునాయాసంగా ప్రయాణం..

• ఖమ్మం నుంచి అశ్వారావుపేటకు మధ్య గల దూరం 120 కిలోమీటీర్లు. అటువైపు వెళ్లే రోడ్డంతా గుంతలమయంగా ఉండేది. కొన్నిచోట్ల పెద్ద గొయ్యిలు ఉండేవి. గతంలో ఖమ్మం నుంచి సత్తుపల్లి మీదుగా అశ్వరావుపేట వెళ్లాలంటే నాలుగు గంటలకు పైగా సమయం పట్టేది. కానీ రోడ్డు విస్తరణ పనులు పూర్తవడంతో ఇప్పుడు కేవలం 2.30 గంటల్లోనే గమ్యస్థానానికి చేరుకునే వెసులుబాటు కలిగింది.
• ఖమ్మం నుంచి వల్లభికి మధ్య దూరం 30 కిలోమీటర్లు. గతంలో ముదిగొండ మీదుగా వల్లభి సింగిల్‌ రోడ్డులో వెళ్లాలంటే గంటకు పైగా సమయం పట్టేది. డబుల్‌ రోడ్డు అయిన తర్వాత ఇప్పుడు కేవలం 40 నిమిషాల్లోపే గమ్యస్థానానికి చేరుకునే వెసులుబాటు కలిగింది.
• గతంలో వైరా నుంచి మధిర మీదుగా ఎర్రుపాలెం చేరుకోవడానికి ఎక్కువ సమయం పట్టేది. రోడ్డు విస్తరణ పూర్తి కావడంతో ఇప్పుడు ప్రయాణికులు సునాయాసంగా గమ్యస్థానానికి చేరుకుంటున్నారు.
• ఖమ్మం నుంచి ఇల్లెందుకు మధ్య దూరం 40 కిలోమీటర్లు. గతంలో ఆ రోడ్డంతా గుంతలమయంగా ఉండేది. ఆ రూట్‌లో ప్రయాణం ప్రహసనంలా ఉండేది. ప్రయాణం గంటకు పైగా సుదీర్ఘంగా అనిపించేది. రోడ్డు విస్తరణ పనులు పూర్తయిన తర్వాత ఇప్పుడు కేవలం 40 నిమిషాల్లోనే గమ్యస్థానాలకు చేరుకుంటున్నారు.
• ఖమ్మం నుంచి కురవికి మధ్య దూరం 40 కిలోమీటర్లు. గతంలో రోడ్డు అస్తవ్యస్తంగా ఉండేది. పైగా సింగిల్‌ రోడ్డు. అప్పుడు ప్రయాణం గంటలకు పైగా పట్టేది. విశాలమైన రోడ్డు అందుబాటులోకి వచ్చిన తర్వాత ఇప్పుడు కేవలం 40 నిమిషాల్లోనే కురవికి చేరుకునే సౌలభ్యం ఇచ్చింది.
• ఖమ్మం నుంచి మరిపెడ బంగ్లాకు మధ్య దూరం 35 కిలోమీటర్లు. గంట ప్రయాణం. గతంలో రోడ్డుపై అడుగుకో గుంత ఉండేది. రోడ్డు విస్తరణ తర్వాత ఇప్పుడు ప్రయాణికులు కేవలం 40 నిమిషాల్లోనే ఖమ్మం నుంచి బంగ్లా చేరుకోవచ్చు.
• తల్లాడ నుంచి భద్రాద్రి జిల్లా సరిహద్దు వరకు మధ్య దూరం 30 కిలోమీటర్లు. రోడ్డుపై మూడు కుదుపులు.. ఆరు గతుకులు అన్నట్లుగా ప్రయాణం ఉండేది. ఇప్పుడు విశాలమైన రోడ్డు అందుబాటులోకి రావడంతో ప్రయాణం హాయిగా
  సాగుతున్నది.
• జిల్లా పరిషత్‌ సెంటర్‌ నుంచి వెంకటగిరి క్రాస్‌ రోడ్డుకు మధ్య దూరం 10 కిలోమీటర్లు. గతంలో ఈ రోడ్డు సింగిల్‌ రోడ్డు. కాల్వొడ్డు నుంచి నూతన కలెక్టరేట్‌ వరకు 13 కిలో మీటర్ల రహదారి సింగిల్‌ రోడ్డు. తెలంగాణ వచ్చిన తర్వాత ఆయా రహదారులన్నీ డబుల్‌ రోడ్లు అయ్యాయి.
• ఇల్లెందు క్రాస్‌ రోడ్డు నుంచి కోయచెలక క్రాస్‌ రోడ్డు డబుల్‌ రోడ్డు. ఇప్పుడు అది నాలుగు లేన్ల రహదారి. నాయుడుపేట సెంటర్‌ నుంచి మద్దులపల్లికి మధ్య దూరం 8 కిల్లోమీటర్లు. గతంలో ఈ రోడ్డు డబుల్‌ రోడ్డు. ఇప్పుడు ఫోర్‌ లేన్ల రోడ్డు. అలాగే వరంగల్‌ క్రాస్‌ రోడ్డు నుంచి బైపాస్‌ రోడ్డు కూడా నాలుగు వరసల రోడ్డుగా మారింది. వెంకటగిరి నుంచి క్రాస్‌రోడ్డు మీదుగా గుర్రాలపాడు నుంచి హైదరాబాద్‌ ప్రధాన రహదారిని కలుపుతూ నాలుగు వరసల రహదారి విస్తరణ జరిగింది. వెంకటగిరి క్రాస్‌ రోడ్డు నుంచి ప్రకాశ్‌నగర్‌ వరకు సర్కార్‌ రూ.154 కోట్లతో నాలుగు వరసల రోడ్డు విస్తరించింది.

రోడ్ల విస్తరణ ఇలా..

తెలంగాణ వచ్చిన తర్వాత రోడ్లు భవనాలశాఖ అధికారులు జిల్లావ్యాప్తంగా రూ.143.46 కోట్లు వెచ్చించి 439.88 కిలోమీటర్ల మేర రహదారుల నిర్మాణం, విస్తరణ, రూ.25.83 కోట్లతో తొమ్మిది బ్రిడ్జీలు నిర్మించారు. అవసరమైన చోట వంతెనలు, బ్రిడ్జిలు నిర్మించారు. పంచాయతీరాజ్‌ శాఖ అధికారులు రూ.402.96 కోట్లు వెచ్చించి 751.016 కిలోమీటర్ల మేర రహదారులు నిర్మించారు.

రోడ్డు విస్తరణతో మేలు

గతంలో సరైన రవాణా వసతి లేక మేం ఇబ్బందిపడ్డాం. స్వరాష్ట్రం వచ్చిన వెంటనే చింతకాని- ఖమ్మం రోడ్డు డబుల్‌ రోడ్డు మంజూరైంది. అనతి కాలంలోనే రోడ్డు నిర్మాణం పూర్తయింది. దీంతో ఈ ప్రాంత ప్రజల చిరకాల వాంఛ నెరవేరింది. ఇప్పుడు ప్రయాణికులు, కూలీలు, విద్యార్థులు సునాయాసంగా జిల్లాకేంద్రానికి వెళ్లి తిరిగి వస్తున్నారు. రహదారి విస్తరణతో పాటు రోడ్డు పక్కన మొక్కలు నాటించడంతో ఇప్పుడా రహదారి ఆహ్లాదకరంగా కనిపిస్తున్నది.
– తాతా ప్రసాద్‌, సొసైటీ డైరెక్టర్‌, చింతకాని

కేసీఆర్‌ సర్కారులోనే రోడ్లన్నీ పూర్తి..

కేసీఆర్‌ ప్రభుత్వంలో గ్రామాల్లోని అన్ని రోడ్లకూ మహర్దశ పట్టింది. నూతన రోడ్ల నిర్మాణంతోనే గ్రామాలకు రాకపోకలు సులభమయ్యాయి. పూర్తయిన రోడ్లు, లింకు రోడ్ల విస్తరణతో పల్లెలు శోభాయమానంగా దర్శనమిస్తున్నాయి. భవిష్యత్‌ ఆలోచనతో సీఎం కేసీఆర్‌ రోడ్లను నిర్మిస్తున్నారు. దీంతో పల్లెలు కూడా అభివృద్ధి పథంలో పయనిస్తున్నాయి. బీఆర్‌ఎస్‌ ప్రభుత్వం పల్లెలను తీర్చిదిద్దుతున్నందుకు సంతోషంగా ఉంది. కేసీఆర్‌ సర్కారుకు మా గ్రామ ప్రజలందరూ రుణపడి ఉంటారు.
-సూదగాని సంగయ్య, చింతగుర్తి, రఘునాథపాలెం మండలం

రోడ్డు విస్తరణతో ప్రయాణం సులభమైంది..

గతంలో గ్రామానికి ఒక్క సీసీ రోడ్డు వేయాలంటేనే సంవత్సరాల సమయం పట్టేది. కానీ తెలంగాణ ప్రభుత్వం వచ్చాక పల్లెల్లోని ప్రతి వీధిలోనూ సీసీ రోడ్లు వేశారు. వీటితోపాటు గ్రామాల అనుసంధానంగా ఉన్న రోడ్లను బీటీలుగా తీర్చిదిద్దారు. ఆ రోడ్లన్నింటినీ డబుల్‌ లైన్లుగా విస్తరించి విశాలంగా చేశారు. మా గ్రామం మీదుగా వెళ్లే కోయచలక ప్రధాన రోడ్డును విస్తరించడంతో ఇతర గ్రామాలకు ప్రయాణం సులభతరమైంది. పల్లెలో జరిగిన రోడ్లు విస్తరణతో ఏ రోడ్డులో వెళ్లినా త్వరగా గమ్యస్థానాలకు చేరుకునే అవకాశం కలిగింది.
-నున్నా శ్రీనివాసరావు, రేగులచలక, రఘునాథపాలెం మండలం

అద్దంలా రహదారులు..

స్వరాష్ట్రం ఏర్పడిన తర్వాత ముఖ్యమంత్రి కేసీఆర్‌ రహదారుల నిర్మాణంపై ప్రత్యేక దృష్టి సారించారు. ప్రతి మండల కేంద్రానికి డబుల్‌ రోడ్డు, ప్రతి గ్రామంలో బీటీ, సీసీ రోడ్లు నిర్మించారు. ప్రజలకు రవాణా సౌకర్యాన్ని మెరుగుపరిచింది. గతంలో గ్రామాల్లో గుంతల రహదారులు ఉండేవి. గ్రామాల్లో ప్రధాన రహదారులకు అనుసంధానంగా అప్రోచ్‌ రోడ్లు, లింక్‌ రోడ్లు అందుబాటులోకి వచ్చాయి. అద్దంలా రహదారులు నిర్మించడంతో ప్రజల ప్రయాణమూ సాఫీగా సాగుతున్నది.
– కూసంపూడి మహేశ్‌, మున్సిపల్‌ చైర్మన్‌, సత్తుపల్లి

గ్రామీణ ప్రాంతాల్లోనూ బీటీ రోడ్లు

గత ప్రభుత్వాల హయాంలో గ్రామీణ ప్రాంతాల్లో మట్టి రోడ్లే ఉండేవి. ప్రజలు వర్షాకాలంలో తీవ్ర ఇబ్బందులకు గురయ్యేవాళ్లం. తెలంగాణ ఏర్పడ్డాక ఇప్పుడా పరిస్థితి కనుమరుగైంది. రాష్ట్రప్రభుత్వం ప్రతి గ్రామంలో బీటీ రోడ్లు నిర్మించింది. గ్రామాల నుంచి మండల కేంద్రాలు, జిల్లా కేంద్రాల్లోనూ డబుల్‌ రోడ్లు అందుబాటులోకి వచ్చాయి.
– మందపాటి శ్రీనివాసరెడ్డి, సర్పంచ్‌, గంగారం, సత్తుపల్లి మండలం

నాడు సింగిల్‌ రోడ్డు.. నేడు డబుల్‌ రోడ్డు..

మాది వనంవారి కృష్ణాపురం. నేను ఫొటోగ్రాఫర్‌గా పనిచేసుకుంటున్నాను. వృత్తిరీత్యా ప్రతిరోజూ ఖమ్మం నగరానికి వెళ్తుంటాను. 2014కు పూర్వం ఖమ్మం- వల్లభి రహదారి సింగిల్‌ రోడ్డు మాత్రమే. ఈ రోడ్డు తెలంగాణ ఆంధ్రాప్రాంతాలకు మధ్య వారధి. ఆ సమయంలో ఇసుక రవాణా చేస్తున్న ట్రాక్టర్ల రద్దీ ఉండేది. సింగిల్‌ రోడ్డు కావడంతో తరచూ ప్రమాదాలు జరుగుతుండేవి. 2015లో రోడ్డు డబుల్‌ రోడ్డు అయింది. మరోవైపు న్యూ లక్ష్మీపురం – వెంకటగిరి రోడ్డూ విస్తరణకు నోచుకున్నది. తెలంగాణ వచ్చిన తర్వాతే రహదారుల నిర్మాణానికి ప్రాధాన్యం పెరిగింది.
– గోదా నరేందర్‌, గ్రామస్తుడు, వనంవారి కృష్ణాపురం, ముదిగొండ మండలం