ఫ్యాన్సీ నెంబర్లపై బాదుడే బాదుడు

ఫ్యాన్సీ నెంబర్లను కోరుకునే కొత్త వాహనదారులకు కాంగ్రెస్‌ ప్రభుత్వం చుక్కలు చూపిస్తోంది. ఆదాయ మార్గాల కోసం వెతుక్కుంటున్న సర్కార్‌ వాహనదారుల అభిరుచిని అవకాశంగా వాడుకుంటోంది. ఫ్యాన్సీ నెంబర్ల ఫీజులను అమాంతం మూడు రెట్లు పెంచేసింది.

• మూడు రెట్లు పెంచిన కాంగ్రెస్‌ సర్కార్‌
• వాహనదారులపై మరింత భారం

రఘునాథపాలెం, నవంబర్‌ 23: ఫ్యాన్సీ నెంబర్లను కోరుకునే కొత్త వాహనదారులకు కాంగ్రెస్‌ ప్రభుత్వం చుక్కలు చూపిస్తోంది. ఆదాయ మార్గాల కోసం వెతుక్కుంటున్న సర్కార్‌ వాహనదారుల అభిరుచిని అవకాశంగా వాడుకుంటోంది. ఫ్యాన్సీ నెంబర్ల ఫీజులను అమాంతం మూడు రెట్లు పెంచేసింది. దీంతో వాహనదారులపై మరింత భారం పడింది. రాష్ట్ర రవాణాశాఖ ‘ఫ్యాన్సీ’ పేరుతో రిజిస్ట్రేషన్‌ నెంబర్లను విక్రయించే ప్రక్రియను ఎన్నో ఏళ్లుగా కొనసాగిస్తోంది. వాహనాలకు విక్రయించే నెంబర్లలో కొన్నింటిని ఫ్యాన్సీ జాబితాలోకి చేర్చి ఖజానా నింపుకుంటోంది.

కొంతమంది వాహనదారులు న్యూమరాజలజీ ప్రకారం తమ అదృష్ట సంఖ్యను నిర్ణయించుకుంటే.. మరికొందరు సమాజంలో తమ మార్క్‌ చూపించుకునేందుకు ఈ ఫ్యాన్సీ నెంబర్ల వెంట పరుగులు తీస్తుంటారు. అవసరమైతే వేలంలో పోటీ పడి ఎంత ఖరీదైనా దక్కించుకుంటారు. అయితే ఇప్పుడు కాంగ్రెస్‌ సర్కార్‌ ఆ ఫ్యాన్సీ నెంబర్ల ఫీజులను మరింత పెంచి దండుకునేందుకు సిద్ధమైంది. ఇంతకాలం అందుబాటులో ఉన్న ప్రత్యేక నంబర్ల రిజర్వేషన్‌ ఫీజులను ప్రభుత్వం ఒక్కసారిగా మూడు రెట్లు పెంచింది. ఈ మేరకు జీవో పత్రాలను జిల్లా రవాణాశాఖ అధికారులకు పంపింది. మోటార్‌ వెహికిల్‌ రూల్స్‌- 1989లోని నిబంధన 81ని సవరణ చేస్తూ జీవో నెంబర్‌ 77ను జారీ చేసింది. అందులో రవాణాశాఖ ప్రత్యేకంగా నిర్ణయించిన ఫ్యాన్సీ నెంబర్లకు కొత్త రేట్లను స్పష్టంగా వెల్లడించింది.

ఆన్‌లైన్‌ ద్వారానే దరఖాస్తు..

ఇకపై ఫ్యాన్సీ నెంబర్లకు కేవలం ఆన్‌లైన్‌ ద్వారానే దరఖాస్తు చేసుకోవాలి. అయితే కాంగ్రెస్‌ ప్రభుత్వం ఫ్యాన్సీ నెంబర్ల ద్వారా వచ్చే ఆదాయాన్ని మరింత పెంచుకునే ఆలోచన చేయడంతో వాహనదారులు బెంబేలెత్తిపోతున్నారు. 9999 నెంబరు ధర ఇప్పటివరకు రూ.50 వేలు ఉండగా నూతన జీవో ప్రకారం అది రూ.1.50 లక్షలు అయ్యింది. 1, 9, 6666 నెంబర్ల ఫీజు రూ.లక్షకు పెరిగింది. 99, 999, 3333, 4444, 5555, 7777 నెంబర్లకు రూ.50 వేలుగా చేసింది. 5, 6, 7, 123, 333, 1234, 2727, 3456, 8888 నెంబర్లకు రూ.40 వేలు చేసింది. 3, 111, 234, 5678, 1818, 1999 నెంబర్లకు రూ.30 వేలుగా పెంచింది. 2, 4, 8, 77, 786, 1233, 4567, 4777 వంటి నెంబర్లకు రూ.20 వేలుగా ఫీజు నిర్ణయించింది. ఇతర నంబర్లకు(కార్లు, ఇతర వాహనాలైతే) రూ.6 వేలు, బైకులకు రూ.3 వేలు చేసింది. పెరిగిన ఫీజులతో రాష్ట్ర ప్రభుత్వానికి ఆదాయం గణనీయంగా సమకూరనుంది.

కావాల్సిన నెంబర్‌ పొందాలంటే..

• వాహన యజమానులు ప్రతిరోజు ఉదయం 8గంటల నుంచి మధ్యాహ్నం 1గంట వరకు ఆన్‌లైన్‌లో దరఖాస్తు చేసుకోవాలి.
• దరఖాస్తులను తప్పనిసరిగా www.transport.telangana.gov.in అనే అధికారిక పోర్టల్‌ ద్వారానే సమర్పించాలి.
• ఒకే ఫ్యాన్సీ నెంబర్‌ కోసం ఒకటి అంతకంటే ఎక్కువ దరఖాస్తులు వచ్చిన పక్షంలో అదే రోజు మధ్యాహ్నం 2 నుంచి 4గంటల వరకు ఆన్‌లైన్‌ బిడ్డింగ్‌(వేలం) నిర్వహిస్తారు.
• వేలంలో అత్యధిక మొత్తాన్ని చెల్లించడానికి సిద్ధపడిన వారికే ఆ నెంబరు కేటాయించబడుతుంది.
• ఆన్‌లైన్‌ బిడ్డింగ్‌లో పాల్గొని నెంబరు గెలవని వారికి వారు చెల్లించిన రిజర్వేషన్‌ రుసుములో 10శాతం మినహాయించుకొని మిగిలిన పైకాన్ని రిఫండ్‌ చేస్తారు.
• ఫ్యాన్సీ నెంబర్‌ కేటాయించిన తరువాత వాహన రిజిస్ట్రేషన్‌ ప్రక్రియ పూర్తవుతుంది. అనంతరం యజమాని 15రోజుల్లో రిజిస్ట్రేషన్‌ కోసం వాహనాన్ని రవాణాశాఖ కార్యాలయంలో చూపించాల్సి ఉంటుంది.
• నిర్దేశించిన 15రోజుల గడువులోగా వాహనాన్ని చూపించడంలో విఫలమైతే, ప్రత్యేక నెంబరు రిజర్వేషన్‌ రద్దవుతుంది. చెల్లించిన ఫీజు తిరిగి ఇవ్వబడదు.