467 సీసీ టీవీ కెమెరాలతో పటిష్టమైన నిఘా వ్యవస్థ : ఎస్పీ రోహిత్ రాజు

భ‌ద్రాద్రి కొత్త‌గూడెం జిల్లాలో శాంతిభద్రతల పరిరక్షణ, నేరాల నియంత్రణను మరింత సమర్థవంతంగా చేపట్టేందుకు నూతనంగా ఏర్పాటు చేసిన జిల్లా కమాండ్ అండ్ కంట్రోల్ సెంటర్‌ను ఎస్పీ రోహిత్ రాజు సోమవారం చుంచుపల్లి పోలీస్ స్టేషన్‌లో ప్రారంభించారు.

– చుంచుప‌ల్లి పీఎస్‌లో కమాండ్ అండ్ కంట్రోల్ సెంటర్ ప్రారంభం

చుంచుపల్లి, అక్టోబర్ 12 : భ‌ద్రాద్రి కొత్త‌గూడెం జిల్లాలో శాంతిభద్రతల పరిరక్షణ, నేరాల నియంత్రణను మరింత సమర్థవంతంగా చేపట్టేందుకు నూతనంగా ఏర్పాటు చేసిన జిల్లా కమాండ్ అండ్ కంట్రోల్ సెంటర్‌ను ఎస్పీ రోహిత్ రాజు సోమవారం చుంచుపల్లి పోలీస్ స్టేషన్‌లో ప్రారంభించారు. జిల్లాలోని వివిధ పోలీస్ స్టేషన్ల పరిధిలో ఏర్పాటు చేసిన మొత్తం 467 సీసీ టీవీ కెమెరాలను ఈ కేంద్రానికి అనుసంధానం చేశారు. వీటి ద్వారా ఆయా ప్రాంతాలను నిరంతరం పర్యవేక్షించడం, అనుమానాస్పద కార్యకలాపాలను గుర్తించడం, నేరాల నియంత్రణతో పాటు అత్యవసర సమయాల్లో తక్షణమే స్పందించడం సులభతరం కానుంది.

ప్రజల భద్రతను దృష్టిలో ఉంచుకుని అవసరమైన ప్రాంతాల్లో మరిన్ని సీసీటీవీ కెమెరాలను ఏర్పాటు చేయాలని ఎస్పీ అధికారులను ఆదేశించారు. పోలీసు సేవలను మెరుగుపరిచేందుకు ఆధునిక సాంకేతిక పరిజ్ఞానాన్ని సమర్థవంతంగా వినియోగించుకోవాలని సూచించారు. అనంతరం పర్యావరణ పరిరక్షణలో భాగంగా పోలీసు అధికారులతో కలిసి మొక్కలు నాటారు. ఈ కార్యక్రమంలో కొత్తగూడెం డీఎస్పీ ఆదినారాయణతో పాటు పోలీసు అధికారులు, సిబ్బంది పాల్గొన్నారు.