తుఫాన్ ధాటికి కొట్టుకుపోయిన లో లెవల్ చప్టా

ములకలపల్లి మండల పరిధిలోని పూసుగూడెం–వీకే రామవరం మధ్య ఉన్న లో లెవల్ చప్టా మురసు తుఫాన్ ప్రభావంతో వచ్చిన వరద ఉధృతికి పూర్తిగా కొట్టుకుపోయింది. దీంతో గురువారం బీఆర్ఎస్ నాయకులు, స్థానిక సర్పంచ్ గుగులోత్ ధర్మా, తాటి రవి చప్టాను పరిశీలించారు.

– వంతెన నిర్మాణం చేపట్టాలని బీఆర్ఎస్ నాయకుల డిమాండ్
– రూ.1.60 కోట్లు మంజూరు చేసినా ప్రారంభానికి నోచుకోని పనులు

ములకలపల్లి, నవంబర్ 05 : ములకలపల్లి మండల పరిధిలోని పూసుగూడెం–వీకే రామవరం మధ్య ఉన్న లో లెవల్ చప్టా మురసు తుఫాన్ ప్రభావంతో వచ్చిన వరద ఉధృతికి పూర్తిగా కొట్టుకుపోయింది. దీంతో గురువారం బీఆర్ఎస్ నాయకులు, స్థానిక సర్పంచ్ గుగులోత్ ధర్మా, తాటి రవి చప్టాను పరిశీలించారు. ఈ సందర్భంగా వారు మాట్లాడుతూ.. పూసుగూడెం నుండి వీకే రామవరం, సంజీవపల్లి, కొత్తూరు తదితర గ్రామాల మీదుగా బూర్గంపాడు వెళ్లే ప్రధాన రహదారిపై ఈ చప్టా ఉందని తెలిపారు. వర్షాకాలంలో కొద్దిపాటి వర్షాలకే చప్టాపై నుండి వరద నీరు ప్రవహిస్తుండడంతో వాహనదారులు, గ్రామస్తులు తీవ్ర ఇబ్బందులు ఎదుర్కొంటున్నారని పేర్కొన్నారు. ఈ సమస్యకు శాశ్వత పరిష్కారం చూపేందుకు 2024లో ప్రభుత్వం హై లెవల్ వంతెన నిర్మాణానికి రూ.1.60 కోట్లు మంజూరు చేస్తున్నట్లు ప్రకటించిందని, మంత్రి పొంగులేటి శ్రీనివాసరెడ్డి చేతుల మీదుగా ఆర్భాటంగా శంకుస్థాపన కూడా నిర్వహించారని గుర్తుచేశారు.

దీంతో తమ కష్టాలు తీరుతాయని భావించిన గ్రామస్తులకు నిరాశే మిగిలిందన్నారు. శంకుస్థాపన జరిగి ఇంతకాలం గడుస్తున్నా వంతెన నిర్మాణ పనులు మాత్రం ప్రారంభానికి నోచుకోలేదని విమర్శించారు. బుధవారం కురిసిన భారీ వర్షాలకు వరద ఉధృతి పెరిగి చప్టా పూర్తిగా కొట్టుకుపోవడంతో ఈ మార్గంలో రాకపోకలు నిలిచిపోయి ప్రజలు తీవ్ర ఇబ్బందులు పడుతున్నారని ఆవేదన వ్యక్తం చేశారు. ఇప్పటికైనా ప్రభుత్వం స్పందించి హై లెవల్ వంతెన నిర్మాణ పనులను వెంటనే ప్రారంభించి, గ్రామాల ప్రజల రాకపోకలకు ఇబ్బందులు లేకుండా చూడాలని వారు డిమాండ్ చేశారు.