Visit:
జూలూరుపాడు, నవంబర్ 29 : భద్రాద్రి కొత్తగూడెం జిల్లా జూలూరుపాడు గ్రామ పంచాయతీకి జరిగే ఎన్నికను రాష్ట్ర హైకోర్టు నిలుపుదల చేస్తూ ఉత్తర్వులు జారీ చేసింది. షెడ్యూల్డ్ ఏరియా పరిధిలో లేని జూలూరుపాడు గ్రామాన్ని గిరిజన గ్రామంగా గుర్తించొద్దని జూలూరుపాడు పంచాయతీకి చెందిన వ్యక్తి హైకోర్టును ఆశ్రయించాడు. దీంతో జూలూరుపాడు గ్రామానికి మూడవ విడతలో ఎన్నికలను నిర్వహించేందుకు ఎన్నికల సంఘం నోటిఫికేషన్ జారీ చేసింది. రాష్ట్ర అత్యున్నత న్యాయస్థానం జూలూరుపాడు గ్రామ పంచాయతీ ఎన్నికలను నిలుపుదల చేయడంతో ఎన్నికల ప్రక్రియ నిలిపి వేస్తున్నట్టు జిల్లా ఎన్నికల అధికారి శనివారం వెల్ల‌డించారు. 15 నవంబర్ 2025 న జూలూరుపాడు గ్రామానికి చెందిన తాళ్లూరి రామారావు అనే వ్యక్తి హైకోర్టులో పిటిషన్ దాఖలు చేశాడు. భద్రాద్రి కొత్తగూడెం జిల్లా జూలూరుపాడు మండలంలోని, జూలూరుపాడు గ్రామాన్ని షెడ్యూల్డ్ ప్రాంతంగా (గిరిజన గ్రామం) పరిగణించవద్దని పిటిషనర్ హైకోర్టులో రిట్ పిటిషన్ దాఖలు చేశాడు. జూలూరుపాడు గ్రామం అప్పటి వరంగల్ జిల్లా మధిర తాలూకా అంతర్భాగంగా ఉందని, కాని పాల్వంచ తాలూకాలో జూలూరుపాడు గ్రామం అంతర్భాగంగా ఉన్నట్లు గుర్తించి షెడ్యూల్డ్ గ్రామంగా నోటిఫై చేశారని పిటిషనర్ న్యాయస్థానం దృష్టికి తీసుకువెళ్లాడు.
1949 సంవత్సరంలో రాజ్ ప్రముఖ్ జారీ చేసిన నోటిఫికేషన్ నంబర్‌లో తెలపలేదన్నారు. పాల్వంచ తాలూకాలో అంతర్భాగంగా లేని జూలూరుపాడు మండలంలోని, జూలూరుపాడు గ్రామాన్ని అధికారులు షెడ్యూల్డ్ గ్రామంగా పరిగణించడం రాజ్యాంగ విరుద్ధమని విన్నవించాడు. మూడవ విడతలో జూలూరుపాడు గ్రామ పంచాయతీకి జరిగే ఎన్నికలను నిలుపుదల చేసేలా అధికారులను ఆదేశించాలని అభ్యర్థించారు. పిటిషనర్ అభ్యర్థనను మన్నించిన ఉన్నత న్యాయస్థానం నవంబర్ 28న ఎన్నికలను నిలుపుదల చేస్తూ ఉత్తర్వులు జారీ చేసింది. కోర్టు ఉత్తర్వుల మేరకు భద్రాద్రి కొత్తగూడెం జిల్లా కలెక్టర్ జితేష్ వి పాటిల్ జిల్లాలోని జూలూరుపాడు, ములకలపల్లి మండలంలోని చాపరాలపల్లి గ్రామ పంచాయతీ ఎన్నికలు నిలిపివేస్తూ ఉత్తర్వులు జారీ చేశారు. తదుపరి ఆదేశాల మేరకు గ్రామ పంచాయతీ ఎన్నికలను నిర్వహిస్తామని జూలూరుపాడు ఎంపీడీఓ పూరేటి అజయ్ తెలిపారు.
