Ramavaram : ప్రమాదాల నివారణకు కూడళ్ల‌లో లైటింగ్ టవర్ల ఏర్పాటు

ప్రధాన కూడలిలో జరుగుతున్న ప్రమాదాల నివారించేందుకు సింగరేణి కొత్తగూడెం ఏరియా అధికారులు నడుం బిగించారు. రుద్రంపూర్ ప్రగతివనం వద్ద నుండి రామవరం వరకు సుమారు రూ.10 లక్షల వ్యయంతో ఐదు టవర్లు, ఒక్కొక్కటి 10 మీటర్ల ఎత్తు, 200 వాట్స్, 3 ఎల్ఈడీ లైట్లు ఏర్పాటు చేయనున్నారు.

రామవరం, మే 19 : ప్రధాన కూడలిలో జరుగుతున్న ప్రమాదాల నివారించేందుకు సింగరేణి కొత్తగూడెం ఏరియా అధికారులు నడుం బిగించారు. ఇటీవల కాలంలో విజయవాడ జగదల్పూర్ (30) జాతీయ రహదారి రుద్రంపూర్ ప్రగతివనం వద్ద నుండి రామవరం 14 నంబర్ వరకు త‌రచుగా ప్రమాదాలు జరుగుతున్నాయి. ఈ ప్ర‌మాదాల్లో ప‌లువురు మృతి చెందడం, మరికొందరు క్షతగాత్రులు అవుతున్నారు. ఈ నేపథ్యంలో యూనియన్ నాయకులు, కార్మికులు, ప్రభావిత ప్రాంత ప్రజల అభ్యర్థన మేరకు సింగరేణి కొత్తగూడెం ఏరియా జనరల్ మేనేజర్ శాలెం రాజు ఆదేశాలతో ఏరియా వర్క్‌షాప్ డీవైజీఎం ఈఅండ్ఎంటీ .శ్రీకాంత్ ఆధ్వర్యంలో జాతీయ రహదారిపై 5 టవర్లు ఏర్పాటు చేయనున్నారు.

ఒక్కొక్క టవర్ రూ.2 లక్షల వ్యయం కానున్నది. సుమారు రూ.10 లక్షల వ్యయంతో ఐదు టవర్లు, ఒక్కొక్కటి 10 మీటర్ల ఎత్తు, 200 వాట్స్, 3 ఎల్ఈడీ లైట్లు ఏర్పాటు చేయనున్నారు. అందులో భాగంగా ముందుగా రైల్వే బ్రిడ్జి వద్ద వద్ద ఉన్న కూడలిలో లైటింగ్ ట‌వ‌ర్ ఏర్పాటు చేశారు. త్వరలోనే పాలిటెక్నిక్, 3 ఇంక్లైన్ బంగ్లోస్, బేరియం తండా, కోల్డ్ టెస్టింగ్, టూ టౌన్ పోలీస్ స్టేషన్ వద్ద ఏర్పాటు చేయనున్నారు. ఈ చ‌ర్య‌పై వాహనదారులు హర్షం వ్యక్తం చేస్తున్నారు. అదేవిధంగా మాత శిశు ఆరోగ్య కేంద్రం వద్ద కూడా లైటింగ్ ట‌వ‌ర్‌ ఏర్పాటు చేస్తే బాగుంటుందని స్థానికులు జీఎంను కోరుతున్నారు.