Bhadradri Kothagudem | ముసురుతో ఉప్పొంగుతున్న వాగులు.. నిలిచిన రాకపోకలు!

Bhadradri Kothagudem | ఎడతెరిపిలేని వర్షాలతో భద్రాద్రి కొత్తగూడెం జిల్లా చుంచుపల్లి మండలంలో వాగులు ఉప్పొంగుతున్నాయి. పెనుబల్లి గ్రామపంచాయతీ పరిధిలోని గోధుమ వాగుతోపాటు పెనగడప–ములుగుగూడెం వాగులు వరద నీటితో ఉధృతంగా ప్రవహిస్తున్నాయి.

Bhadradri Kothagudem | చుంచుపల్లి, నవంబర్‌ 4 (నమస్తే తెలంగాణ): మూడు రోజులుగా కురుస్తున్న ఎడతెరిపిలేని వర్షాలతో భద్రాద్రి కొత్తగూడెం జిల్లా చుంచుపల్లి మండలంలో వాగులు ఉప్పొంగుతున్నాయి. పెనుబల్లి గ్రామపంచాయతీ పరిధిలోని గోధుమ వాగుతోపాటు పెనగడప–ములుగుగూడెం వాగులు వరద నీటితో ఉధృతంగా ప్రవహిస్తున్నాయి. వాగులపై ఉన్న బ్రిడ్జిల మీదుగా నీరు పారుతుండటంతో ఆయా గ్రామాల నుంచి కొత్తగూడెం పట్టణానికి రాకపోకలు నిలిచిపోయాయి.

వరద ఉధృతి ప్రమాదకరంగా మారడంతో పెనుబల్లి వాగు వద్ద స్థానికులు అప్రమత్తమయ్యారు. ఎవరూ వాగు దాటేందుకు ప్రయత్నించకుండా బ్రిడ్జిపై అడ్డంగా ట్రాక్టర్‌ను నిలిపి రాకపోకలను నియంత్రిస్తున్నారు. వరద ప్రవాహం ఎక్కువగా ఉన్న సమయంలో వాగు దాటడం ప్రమాదకరమని హెచ్చరిస్తూ ప్రజలను అడ్డుకుంటున్నారు.

వాగులపై రాకపోకలు నిలిచిపోవడంతో గ్రామీణ ప్రజలు తీవ్ర ఇబ్బందులు ఎదుర్కొంటున్నారు. పాలు సరఫరా చేసేవారు, నిత్యావసర సరుకుల కోసం పట్టణానికి వెళ్లేవారు, కూలీలు, ఉద్యోగులు, విద్యార్థులు ఇబ్బందులు పడుతున్నారు. వర్షాలు కొనసాగుతుండటంతో వాగుల్లో వరద ప్రవాహం ఎప్పుడు తగ్గుతుందోనని గ్రామస్తులు ఆందోళన చెందుతున్నారు.

వరద పరిస్థితిని అధికారులు ఎప్పటికప్పుడు పర్యవేక్షించాలని గ్రామస్తులు కోరుతున్నారు. ప్రమాదకర ప్రాంతాల్లో భద్రతా చర్యలు చేపట్టడంతోపాటు వరద ప్రవాహం తగ్గే వరకు ఎవరూ వాగులు దాటకుండా ప్రజలను అప్రమత్తం చేయాలని విజ్ఞప్తి చేస్తున్నారు.