‘టేకులచెరువులో 40 కుటుంబాలకు తక్షణమే డబుల్ బెడ్రూం ఇళ్లు అప్పగించాలి’

బూర్గంపహాడ్ మండ‌ల పరిధిలోని టేకులచెరువు గ్రామంలో 40 కుటుంబాల లబ్దిదారులకు ఇప్పటికే నిర్మించి ఉన్న డబుల్ బెడ్రూం ఇళ్లను అప్పగించాలని సీపీఎం మండల కార్యదర్శి బత్తుల వెంకటేశ్వర్లు సోమవారం కలెక్టర్ అంకిత్‌ను కలిసి వినతిపత్రం సమర్పించారు.

– భ‌ద్రాద్రి కొత్త‌గూడెం జిల్లా క‌లెక్ట‌ర్ అంకిత్‌కు సీపీఎం వినతి

బూర్గంపహాడ్, జూలై 27 : బూర్గంపహాడ్ మండ‌ల పరిధిలోని టేకులచెరువు గ్రామంలో 40 కుటుంబాల లబ్దిదారులకు ఇప్పటికే నిర్మించి ఉన్న డబుల్ బెడ్రూం ఇళ్లను అప్పగించాలని సీపీఎం మండల కార్యదర్శి బత్తుల వెంకటేశ్వర్లు సోమవారం కలెక్టర్ అంకిత్‌ను కలిసి వినతిపత్రం సమర్పించారు. ఈ సందర్భంగా ఆయన మాట్లాడుతూ.. బీఆర్ఎస్ అధికారంలో ఉన్న సమయంలో గ్రామంలో డబుల్ బెడ్రూం ఇళ్లు నిర్మించారని, ఆ తర్వాత కాంగ్రెస్ అధికారంలోకి వచ్చాక ఇంతవరకు లబ్దిదారులకు వాటిని అప్పగించక పోవడంతో తక్షణమే వాటిని 40 కుటుంబాల లబ్దిదారులకు అప్పగించాలని ఆ వినతిలో కోరాడు. డబుల్ బెడ్రూం ఇళ్లలో ప్రస్తుతం కరెంటు, మంచినీటి, మరుగుదొడ్ల సమస్య ఉందని ఆ సమస్యలను నెలరోజుల్లో పరిష్కరించి అలాట్ చేసిన వారికే ఇండ్లు కేటాయించాలని కోరారు. దీనికి స్పందించిన కలెక్టర్ హౌసింగ్ అధికారులతో మాట్లాడి నెల రోజుల్లో మరమ్మతు పనులు చేపట్టి 40 కుటుంబాలకు ఇండ్ల‌ను అప్పగించాలని ఆదేశించడంతో లబ్దిదారులు హర్షం వ్యక్తం చేశారు. ఈ కార్యక్రమంలో మండల కమిటీ సభ్యులు పాండవుల రామనాధం, శాఖా కార్యదర్శి బోళ్ల శ్రీశైలం, జక్కుల రాంబాబు, సంపత్ పాల్గొన్నారు.