‘కాంట్రాక్టు కార్మికులకు రూ.120 బోనస్ చెల్లించాలి’

వీకే ఓసీలో పని చేస్తున్న కాంట్రాక్టు కార్మికులకు దీపావళి బోనస్ విషయంలో అన్యాయం జరుగుతోందని, ఇతర ప్రైవేటు కంపెనీల మాదిరిగానే రూ.120 చొప్పున బోనస్ చెల్లించాలని కార్మిక సంఘాల జాయింట్ యాక్షన్ కమిటీ (జేఏసీ) డిమాండ్ చేసింది. మంగళవారం సింగరేణి కొత్తగూడెం ఏరియా జనరల్ మేనేజర్ కార్యాలయం ముందు...

– రూ.65 మాత్రమే ఇస్తామనడం అన్యాయం
– సింగ‌రేణి యాజమాన్యం జోక్యం చేసుకోవాలని కార్మిక సంఘాల జేఏసీ వినతి
– జీఎం కార్యాలయం ముందు ధర్నా

రుద్రంపూర్, నవంబర్ 10 : వీకే ఓసీలో పని చేస్తున్న కాంట్రాక్టు కార్మికులకు దీపావళి బోనస్ విషయంలో అన్యాయం జరుగుతోందని, ఇతర ప్రైవేటు కంపెనీల మాదిరిగానే రూ.120 చొప్పున బోనస్ చెల్లించాలని కార్మిక సంఘాల జాయింట్ యాక్షన్ కమిటీ (జేఏసీ) డిమాండ్ చేసింది. మంగళవారం సింగరేణి కొత్తగూడెం ఏరియా జనరల్ మేనేజర్ కార్యాలయం ముందు ధర్నా నిర్వహించారు. అనంతరం కొత్తగూడెం ఏరియా జనరల్ మేనేజర్‌ సిహెచ్ వెంకటరమణకు జేఏసీ నాయకులు వినతిపత్రం అందజేశారు. ఈ సందర్భాన్ని పురస్కరించుకొని నాయకులు మాట్లాడుతూ… వీకే సీమ్‌లో శోధ కోల్ కన్స్ట్రక్షన్ కంపెనీ లిమిటెడ్ 2025 ఆగస్టు 24 నుంచి పనులు చేపట్టిందని, అప్పటి నుంచి కార్మికులు పలు సమస్యలు ఎదుర్కొంటున్నారని జేఏసీ నాయకులు వినతిపత్రంలో పేర్కొన్నారు. స్థానిక ప్రాజెక్టు డీసిల్టెడ్ ఫెసిలిటీ (పీడీఎఫ్), ప్రాజెక్టు ఎఫెక్టెడ్ ఫెసిలిటీ (పీఈఎఫ్), వీకే సీమ్ ప్రాజెక్టు నిర్వహణ, ప్రభావిత ప్రాంతాల నిరుద్యోగులకు తగిన ఉపాధి అవకాశాలు కల్పించకుండా ఇతర ప్రాంతాల కార్మికులను తీసుకువస్తున్నారని ఆరోపించారు.

అలాగే కార్మికులపై అధిక పనిభారం మోపుతున్నారని, చట్టబద్ధమైన హక్కులు, సౌకర్యాలు అమలు చేయడంలో నిర్లక్ష్యం వహిస్తున్నారని పేర్కొన్నారు. కంపెనీ ప్రారంభమై ఏడాది గడిచినా బోనస్ విషయంలో స్పష్టత ఇవ్వలేదని ఆవేదన వ్యక్తం చేశారు. కొత్తగూడెం ఏరియాలోని ఇతర ప్రైవేటు కంపెనీలు ఒక్కో కార్మికుడికి రూ.90 నుంచి రూ.120 వరకు బోనస్ చెల్లిస్తుండగా, శోధ కోల్ కన్‌స్ట్ర‌క్ష‌న్ కంపెనీ మాత్రం రూ.65 మాత్రమే చెల్లిస్తామని చెబుతోందని జేఏసీ తెలిపింది. ఇది కార్మికులకు అన్యాయం చేయడమేనని పేర్కొంది. జనరల్ మేనేజర్ ఈ విషయంపై జోక్యం చేసుకుని, కార్మిక సంఘాలతో చర్చించి ఇతర కంపెనీల తరహాలో ఒక్కో కార్మికుడికి రూ.120 బోనస్ చెల్లించేలా చర్యలు తీసుకోవాలని జేఏసీ నాయకులు కోరారు.