నట్టలను చంపేద్దాం జీవాలను రక్షిద్దాం

ప్రజారోగ్యంతోపాటు జీవాల సంరక్షణకు ప్రభుత్వం ప్రత్యేక దృష్టి సారించింది. సీజనల్‌గా వచ్చే వ్యాధులను గుర్తించి ఉచితంగా మందు పంపిణీ చేస్తున్నది. జిల్లావ్యాప్తంగా ఈ నెల 22వ తేదీన జీవాలకు నట్టల నివారణ మందు పంపిణీని పశు సంవర్ధక శాఖాధికారులు ప్రారంభించారు.

• జోరుగా నట్టల నివారణ మందు పంపిణీ
• జిల్లాలో 3.55 లక్షల గొర్రెలు, మేకలు
• ముమ్మరంగా పర్యటిస్తున్న 53 బృందాలు
• నేటితో ముగియనున్న ప్రక్రియ

అశ్వారావుపేట, ఫిబ్రవరి 27 : ప్రజారోగ్యంతోపాటు జీవాల సంరక్షణకు ప్రభుత్వం ప్రత్యేక దృష్టి సారించింది. సీజనల్‌గా వచ్చే వ్యాధులను గుర్తించి ఉచితంగా మందు పంపిణీ చేస్తున్నది. జిల్లావ్యాప్తంగా ఈ నెల 22వ తేదీన జీవాలకు నట్టల నివారణ మందు పంపిణీని పశు సంవర్ధక శాఖాధికారులు ప్రారంభించారు. జిల్లాలో మొత్తం 3,55,868 జీవాలు ఉండగా వీటిలో గొర్రెలు 1,55,406, మేకలు 2,00,462 ఉన్నాయి. 53 బృందాలు ప్రత్యేకంగా నట్టల నివారణ మందు పంపిణీలో పాల్గొంటున్నాయి.

కార్యక్రమం ఈ నెల 28వ తేదీ వరకు కొనసాగుతుందని పశు వైద్యాధికారులు స్పష్టం చేస్తున్నారు. ప్రభుత్వం ఉచితంగా అందిస్తున్న నట్టల నివారణ మందుతో ఎంతో ప్రయోజనం ఉంటుందని, ఈ అవకాశాన్ని జీవాల యజమానులు సద్వినియోగం చేసుకోవాలని సూచిస్తున్నారు. మొదటిరోజు జిల్లాలోని 73 గ్రామాల్లో 20,537 గొర్రెలు, 18,754 మేకలు మొత్తం 39,291 జీవాలకు బృందాలు మందు తాగించారు. దీనివల్ల 584 మంది యజమానులు లబ్ధి పొందారు.

జీవాలకు నట్టల బెడద సర్వసాధారణం. నేలకు దగ్గరగా జీవాలు మేత మేయడం వల్ల జీవాలకు ఈ సమస్య ఉత్పన్నమవుతోంది. మేత కొరత, పోషకాల లోపం, వానకాలం, అనావృష్టి, అంటువ్యాధులు ప్రబలిన సందర్భాల్లో ఈ పరాన్నజీవుల బెడద అధికంగా ఉంటుంది. నట్టల్లో ప్రధానంగా ఏలికపాము, బద్దె పురుగులు, జలగలు వంటి మూడు రకాలు ఉంటాయి. ఇవి శరీరం, కాలేయం, ఊపిరితిత్తులు, పేగులు, జీర్ణాశయంలో స్థావరాలు ఏర్పాటు చేసుకుంటాయి. ఆశ్రద్ధ చేస్తే జీవాల ఆరోగ్యంపై తీవ్ర ప్రభావం చూపుతుందని పశు వైద్యులు హెచ్చరిస్తున్నారు.

ఈ సమస్య పరిష్కారం కోసం ప్రభుత్వం ప్రతి ఏటా నట్టల నివారణ మందును ఉచితంగా పంపిణీ చేస్తున్నది. జిల్లావ్యాప్తంగా బుధవారం లాంఛనంగా ప్రారంభమైన మందు పంపిణీ ఈ నెల 28వ వరకు అంటే వారంరోజుల పాటు కొనసాగిస్తామని పశు సంవర్ధకశాఖ స్పష్టం చేసింది. జిల్లాలోని 23 మండలాల్లో 106మంది వైద్యులు, సిబ్బంది 53 బృందాలుగా నట్టల నివారణ మందు పంపిణీలో పాల్గొంటున్నారు. నట్టల లక్షణాలు, నివారణ చర్యలు, కలిగే ప్రయోజనాలను మండలాల వారీగా యజమానులకు వివరిస్తూ అప్రమత్తం చేస్తున్నారు.

జీవాల్లో నట్టల లక్షణాలు

• నట్టలు జీవాల్లో పోషక పదార్థాలు, రక్తాన్ని స్వీకరించి రక్తహీనతకు గురిచేస్తాయి.
• తరుచూ విరోచనాలు అవ్వడం, ఆకలి లేమి, పొట్ట కిందకు జారి ఉండడం, దవడల మధ్య నీరు చేరడం, తదితర సమస్యలు నట్టల వ్యాధి ప్రధాన లక్షణాలు.
• ఎంత మేత తిన్న బక్కచిక్కి జీవాలు అనారోగ్యం పాలవుతాయి.
• వ్యాధి నిరోధక శక్తి తగ్గిపోయి నీరసించిపోతాయి. ఇలాంటి పరిస్థితుల్లో ఇతర వ్యాధులు వచ్చే ప్రమాదం ఉంటుంది. ఫలితంగా జీవాల ప్రాణాలు కూడా పోవచ్చు.
  ఇవీ నివారణ చర్యలు
• జీవాలు మేసేటప్పుడు ఒకే ప్రదేశంలో కాకుండా 4 లేదా 5 రోజులకొకసారి మేత మేసే ప్రాంతాన్ని మార్చుతూ ఉండాలి. తేమ ఉన్న ప్రదేశాల్లో మేపకూడదు.
• జలగ వ్యాధి కలిగించే నత్తలను నిర్మూలించాలి.
• నట్టల నివారణ మందును క్రమం తప్పకుండా తప్పనిసరిగా తాగించాలి.

నట్టల మందు వల్ల ప్రయోజనాలు

• నట్టల మందు తాగించడం వల్ల జీవాల్లో పోషకాలు సరైన ఎదుగుదలకు ఉపయోగపడుతోంది. దీనిద్వారా ఆరోగ్యంగా, బలంగా, చురుగ్గా ఉంటాయి. అధిక మాంసం ఉత్పత్తి అవుతుంది.
• వ్యాధి నిరోధక శక్తి పెరిగి ఇతర వ్యాధులు సంక్రమించే అవకాశాలు తగ్గుతాయి.
• పునరుత్పత్తి శక్తి ఎరుగుతుంది. జీవాలు త్వరగా ఎదకు వచ్చి పొర్లుతాయి. చూడి కట్టడం పెరుగుతుంది. ఈతల మధ్య కాలం తగ్గుతుంది. మంద వేగంగా వృద్ధి చెందుతుంది.
• చూడి ఉన్న జీవాలకు నట్టలను నివారించడం వల్ల పిల్లలు ఆరోగ్యంగా అధిక బరువుతో పుడతాయి.
  తీసుకోవాల్సిన జాగ్రత్తలు
• నట్టల మందును తాగించేటప్పుడు ముందుగా తగిన జాగ్రత్తలు తీసుకోవాలి.
• పేడ నమూనాలను సేకరించి పరిశీలించాలి. పరీక్షించిన తర్వాత వచ్చే ఫలితాల ఆధారంగా మందుల ఎంపిక చేసుకోవాలి.
• మందు ప్రభావం ఎక్కువగా ఉండటానికి జీవాలకు మందు ఇచ్చే రోజు మేత లేకుండా లేదా తక్కువ మోతాదులో ఇవ్వాలి.
• పశువైద్యుల సూచనల మేరకు మందులు మోతాదు ఎంపిక చేసుకోవాలి.
• వాతావరణ పరిస్థితులు, మేత వనరులు, పరాన్నజీవుల ఉధృతి దృష్ట్యా ఏడాదిలో మూడుసార్లు నట్టల నివారణ మందును తాగించాలి.

నట్టల నివారణ మందు తప్పనిసరి

జీవాల్లో నట్టల నివారణపై యజమానులు తగిన జాగ్రత్తలు తీసుకోవాలి. జీవాలకు మందు తప్పనిసరిగా వేయాలి. ప్రతి ఏడాది ప్రభుత్వం ఉచితంగానే నట్టల నివారణ మందు పంపిణీ చేస్తున్నది. జీవాల పేడ నమూనాలను సేకరించి, పరీక్షించిన తర్వాతనే ఫలితాల ఆధారంగా నట్టల నివారణ మందును ఎంపిక చేస్తాం. జీవాల యజమానులు ఈ అవకాశాన్ని సద్వినియోగం చేసుకోవాలి.
– డాక్టర్‌ బోడేపూడి పురంధర్‌, జిల్లా పశుసంవర్ధక శాఖాధికారి, కొత్తగూడెం