Thimmapur | తిమ్మాపూర్, నవంబర్30. గంజాయితో పట్టుబడిన ఇద్దరిని అరెస్టు చేసి రిమాండ్కు తరలించినట్లు ఎల్ఎండీ ఎస్ఐ శ్రీకాంత్ తెలిపారు. పెద్దపల్లి జిల్లా పాలకుర్తి మండలం జయ్యారం గ్రామానికి చెందిన కోరండ్ల రఘువర్ధన్రెడ్డి అనే యువకుడు లారీ డ్రైవింగ్ చేసుకుంటూ మండల కేంద్రంలోని తిరుమల హోమ్స్ అద్దెకు ఉంటున్నాడు. అలాగే అదే గ్రామానికి చెందిన చింతకింద శ్రీకృష్ణ మండలంలోని ఓ ఇంజినీరింగ్ కళాశాలలో బీటెక్ సెకండ్ ఇయర్ చదువుతున్నాడు.
అయితే వీరు మండల కేంద్రంలోని ఓ ప్రైవేటు హాస్టల్లో ఉంటున్న యువకుడి వద్ద గంజాయి కొనుగోలు చేసి తాగుతుంటారు. వీరు గంజాయితో ఉన్నారనే సమాచారంతో ఎల్ఎండీ ఎస్ఐ శ్రీకాంత్ సిబ్బందితో కలిసి సోదాలు నిర్వహించగా 110గ్రాముల గంజాయి లభ్యమైంది. పోలీసులు వెళ్లినట్లు పసిగట్టిన మరో యువకుడు పారిపోయాడు. వీరి నుండి గంజాయితో పాటూ గంజాయి సేవించే బాంగ్, బైక్ సీజ్ చేశారు. ప్రైవేటు హాస్టళ్లలో ఉంటూ గంజాయికి అలవాటుపడి జీవితాలు పాడుచేసుకోవద్దని ఎస్ఐ శ్రీకాంత్ విద్యార్థులకు సూచించారు. నిత్యం గస్తీ నిర్వహిస్తామని, బంగారు భవిష్యత్ను నాశనం చేసుకోవద్దని చెప్పారు. ప్రైవేటు హాస్టళ్ల నిర్వాహకులు సైతం పర్యవేక్షించాలని సూచించారు.