ఒడిబియ్యం@ కోటీ 22 లక్షలు

వేములవాడ రాజన్న ఆలయంలో అమ్మవారికి సమర్పించుకునే ఒడి బియ్యానికి డిమాండ్‌ పెరిగింది. వేలంపాటలో గతానికంటే రెట్టింపు ధర పలికింది. రాజన్న దర్శించుకున్న భక్తులు తప్పనిసరిగా రాజరాజేశ్వరి దేవి అమ్మవారికి, అనుబంధ బద్ది పోచమ్మ అమ్మవారికి కూడా ఒడి బియ్యం సమర్పిస్తుంటారు.

• అమ్మవారి ఒడి బియ్యానికి డిమాండ్‌
• టన్నుల కొద్దీ బియ్యం, క్వింటాళ్ల కొద్దీ కొబ్బరి
• రెండేళ్ల క్రితం ప్రారంభమైన టెండర్‌
• వేలంపాటలో గతానికంటే రెట్టింపు

వేములవాడ రాజన్న ఆలయంలో అమ్మవారికి సమర్పించుకునే ఒడి బియ్యానికి డిమాండ్‌ పెరిగింది. వేలంపాటలో గతానికంటే రెట్టింపు ధర పలికింది. రాజన్న దర్శించుకున్న భక్తులు తప్పనిసరిగా రాజరాజేశ్వరి దేవి అమ్మవారికి, అనుబంధ బద్ది పోచమ్మ అమ్మవారికి కూడా ఒడి బియ్యం సమర్పిస్తుంటారు. ఈ క్రమంలో 2021-23 ఆర్థిక సంవత్సరంలో టెండర్‌ ప్రక్రియను ఆలయ అధికారులు ప్రారంభించారు. గతంలో 48 లక్షలు పలుకగా, ప్రస్తుతం 2023-25 (రెండు సంవత్సరాలకు) గాను కోటీ 22 లక్షల వేలం పాటతో హకులు దకించుకున్నారు.

– వేములవాడ, జూలై 10

వేములవాడ రాజన్న సన్నిధికి వచ్చే భక్తులు స్వామివారిని దర్శించుకున్న అనంతరం శ్రీ రాజరాజేశ్వర దేవి అమ్మవారికి , అనుబంధ బద్ది పోచమ్మ అమ్మవారిని దర్శించుకొని ఒడి బియ్యపు సమర్పిస్తారు. వీటిలో బియ్యం, ఎండు కొబ్బరి, ఎండు ఖర్జూర కూడా ఉంటాయి. కాగా, ఒడి బియ్యాన్ని సేకరించుకునే ప్రక్రియను 2021-23 ఆర్థిక సంవత్సరంలో అప్పటి ఆలయ అధికారులు ప్రారంభించారు. దీంతో 48 లక్షలకు దక్కించుకోగా వారి హక్కులు ఈ ఏడాది జనవరి వరకు ముగిశాయి. మళ్లీ టెండర్‌, వేలంపాట నిర్వహించినా ఎవరూ ముందుకు రాకపోవడంతో ఈ యేడాది జనవరి 7 నుంచి, మార్చి 9 వరకు ఆలయ అధికారులే ఒడిబియ్యం సేకరణ నిర్వహించారు. రెండు నెలల్లో దాదాపు 200 క్వింటాళ్ల బియ్యం, 5 క్వింటాళ్ల ఎండు కొబ్బరి సమకూరింది. తర్వాత నిర్వహించిన 2023-25 రెండు సంవత్సరాల హకులకు గాను నిర్వహించిన వేలంపాటలో ఒడిబియ్యం కోటీ 22 లక్షల 55 వేల ధర పలికింది.

ఒడిబియ్యానికి డిమాండ్‌ ఉన్నది
భక్తులు రాజరాజేశ్వరి దేవి, బద్ది పోచమ్మ అమ్మవార్లకు ఒడి బియ్యం సమర్పించుకునే ఆనవాయితీ ఉంది. ఈ క్రమంలో ప్రతి నెలా దాదాపు 100 క్వింటాళ్లకు పైగా బియ్యం, కొబ్బరి సమకూరుతుంది. రెండోసారి నిర్వహించిన వేలంపాటలో రెట్టింపుకు పైగా ఆదాయం రావడమే ఇందుకు నిదర్శనం. ఒడి బియ్యం, ఎండు కొబ్బరికి బాగా డిమాండ్‌ ఉంది.

– గోలి శ్రీనివాస్‌ పర్యవేక్షకుడు, రాజన్న ఆలయం