Visit:
కేంద్రాల ఏర్పాటుపై సిటీ పోలీస్‌ సన్నాహాలు
బ్లూకోల్ట్స్‌, సెక్టార్‌ ఎస్‌ఐలకు బాధ్యతలు
గూగుల్‌ ఫామ్స్‌తో వివరాల సేకరణ
అనుభవజ్ఞులైన ఫ్యాకల్టీతో ఇండోర్‌, ఔట్‌డోర్‌ శిక్షణ
సిటీబ్యూరో, మార్చి 15 (నమస్తే తెలంగాణ): పోలీసు శాఖలో ఉద్యోగం చేయాలనుకుంటున్నారా.. మీ కోసం హైదరాబాద్‌ పోలీసులు ఉచితంగా నాణ్యమైన శిక్షణను ఇచ్చేందుకు సిద్ధమవుతున్నారు. శిక్షణ పొందాలనుకునే వారి పేర్లను నమోదు చేసుకోవడానికి హైదరాబాద్‌ పోలీస్‌ వెబ్‌సైట్‌లో గూగుల్‌ ఫామ్‌ లింక్‌ను అందుబాటులో ఉంచనున్నారు. ప్రతి జోన్‌లో వెయ్యి మందికి, ప్రత్యేకంగా ఒక మహిళా సెంటర్‌ను కూడా ఏర్పాటు చేస్తున్నారు. ఇంగ్లిష్‌, తెలుగు మీడియంలలో శిక్షణకు వచ్చే వారికి అనుకూలంగా ఉండే విధంగా ఉదయం, సాయంత్రం, పూర్తి రోజంతా తరగతులు నిర్వహించేలా ప్రణాళికలు సిద్ధం చేస్తున్నారు. హైదరాబాద్‌ పోలీస్‌ కమిషనర్‌ సీవీ ఆనంద్‌ శిక్షణ కేంద్రాలపై ప్రత్యేక దృష్టి పెట్టి, శిక్షణకు వచ్చే వారికి ఎలాంటి ఇబ్బందులూ లేకుండా అన్ని సౌకర్యాలు ఉండేలా కేంద్రాలను ఏర్పాటు చేయాలని ఆయా జోనల్‌ డీసీపీలకు ఆదేశాలు జారీ చేశారు. ఇందులో భాగంగా 2019లో నిర్వహించిన శిక్షణ కేంద్రాలను పరిశీలించాలని, అక్కడ ప్రస్తుత పరిస్థితి ఎలా ఉందో ఆరా తీయాలని అధికారులకు సూచనలు చేశారు. మహిళలకు సురక్షితమైన వాతావారణం ఉండే విధంగా శిక్షణ కేంద్రాల ఎంపిక ఉండాలని సీపీ ఆదేశించారు.
ఇండోర్‌.. ఔట్‌డోర్‌ శిక్షణ
పోలీస్‌ శాఖలో ఎస్‌ఐ, కానిస్టేబుళ్లకు సంబంధించి సుమారు 18000 ఉద్యోగాలకు నోటిఫికేషన్‌ రానుంది. అనుభవజ్ఞులైన బోధనా బృందంతో నాణ్యమైన శిక్షణ ఇచ్చే విధంగా ప్రణాళికలు సిద్ధం చేస్తున్నారు. రాత పరీక్ష(ఇండోర్‌)తో పాటు ఫిజికల్‌ పరీక్షల(ఔట్‌ డోర్‌)ల్లోనూ శిక్షణ ఇవ్వనున్నారు. ప్రతి కేంద్రంలో అన్ని సౌకర్యాలు ఉండేలా చర్యలు తీసుకుంటున్నారు. ఔట్‌ డోర్‌లో శిక్షణకు ఆయా జోన్లలో అనువైన గ్రౌండ్లను ఎంచుకొని, స్పోర్ట్స్‌లో అనుభవం ఉన్న కార్‌(సిటీ ఆర్మ్‌డ్‌ రిజర్వు ఫోర్స్‌) సిబ్బంది, పోలీస్‌ శాఖలోని ఇతర అధికారులతో శిక్షణ ఇవ్వనున్నారు. ఆయా గ్రౌండ్ల వద్ద శిక్షణకు వచ్చే స్త్రీ, పురుషులకు వేర్వేరుగా మరుగుదొడ్లు ఉండే విధంగా చర్యలు తీసుకుంటారు.
ఇండోర్‌ శిక్షణ కేంద్రాలలో ఇవి పక్కాగా ఉండాలి
డిజిటల్‌ బోర్డు, ఇతర బోర్డులు నాణ్యమైన అడియో సిస్టమ్‌ అందరికీ కుర్చీలు స్త్రీ, పురుషులకు వేర్వేరుగా మరుగుదొడ్ల సౌకర్యం గూగుల్‌ లింక్‌తో సమాచారం
పోలీస్‌స్టేషన్‌ పరిధిలో ఉండే సెక్టార్‌ ఎస్‌ఐ, బ్లూకోల్ట్స్‌ సిబ్బంది నిరుద్యోగ యువతకు అవగాహన కల్పిస్తారు. క్షేత్ర స్థాయిలో ఉండే ఆయా ఠాణాల సిబ్బంది కాలనీలు, బస్తీల్లోని నిరుద్యోగ యువత ప్రభుత్వ ఉద్యోగాలకు ప్రయత్నించే వారికి పోలీస్‌ శాఖ ఇస్తున్న ఉచిత శిక్షణ గురించి వివరిస్తారు. శిక్షణలో చేరేందుకు ముందుకొచ్చే వారు తమ వివరాలను హైదరాబాద్‌ పోలీస్‌ వెబ్‌సైట్‌లో అందుబాటులో ఉండే గూగుల్‌ లింక్‌ను క్లిక్‌ చేసి, ఆ ఫారమ్‌లో తమ వివరాలను పొందుపరచాలి. ఇదిలా ఉండగా ఈ శిక్షణ కోసం కార్పొరేట్‌ సోషల్‌ రెస్పాన్సిబిలిటీలో భాగంగా తమ వంతు సహకారం అందించేందుకు కార్పొరేట్‌ సంస్థలు ముందుకు రావాలని పోలీసులు కోరుతున్నారు.
నగర పోలీస్‌ కమిషనరేట్‌ పరిధిలో నిర్వహించే శిక్షణ కేంద్రాలలో అనుభవజ్ఞులైన ఫ్యాకల్టీతో శిక్షణ ఇప్పిస్తాం. శిక్షణకు వచ్చే వారికి కేవలం శిక్షణ ఇవ్వడమే కాదు, ఎప్పటికప్పుడు వారి ప్రతిభను గుర్తించేందుకు మాక్‌ టెస్ట్‌లు నిర్వహిస్తాం. ఈ పరీక్షలతో ఎవరికి ఎక్కడ మార్కులు తగ్గుతున్నాయనే విషయం తెలుస్తుంది. పరీక్షలు నిర్వహించి వారికి ఆత్మవిశ్వాసం పెంపొందిస్తూ ఫైనల్‌ పరీక్షలకు సిద్దం చేస్తాం. ఇక్కడ శిక్షణ తీసుకున్న వారు అందరు ఉద్యోగాలు సాధించాలనే లక్ష్యంతో శిక్షణ కేంద్రాలు కొనసాగుతాయి. హైదరాబాద్‌లోని నిరుద్యోగ యువత ఈ అవకాశాన్ని ఉపయోగించుకోవాలి.
– సీవీ ఆనంద్‌, హైదరాబాద్‌ పోలీస్‌ కమిషనర్‌
