జగిత్యాల జిల్లాలో విషాదం.. వ్యవసాయ బావిలో పడి ఇద్దరు యువకులు మృతి

: జగిత్యాల జిల్లా కథలాపూర్‌ మండలం చింతకుంటలో వ్యవసాయ బావిలో పడి గుంటూరు జిల్లా వినుకొండకు చెందిన ఇద్దరు యువకులు మృతి చెందారు.

జగిత్యాల జిల్లాలో విషాదకర ఘటన చోటుచేసుకుంది. కథలాపూర్‌ మండలం చింతకుంట గ్రామంలో వ్యవసాయ బావిలో పడి ఇద్దరు యువకులు మృతి చెందారు.

వివరాల్లోకి వెళితే.. గుంటూరు జిల్లా వినుకొండకు చెందిన ఇద్దరు యువకులు కొంతకాలం కిందట జగిత్యాల జిల్లాకు వచ్చారు. ఇక్కడ భవన నిర్మాణ కార్మికులుగా పనిచేస్తూ ఉపాధి పొందుతున్నారు. ఈ క్రమంలో బుధవారం తెల్లవారుజామున చింతకుంట గ్రామ పరిధిలోని ఓ వ్యవసాయ బావి వద్దకు వెళ్లిన వారు ప్రమాదవశాత్తూ అందులో పడిపోయారు. ఇది గమనించిన స్థానికులు వారిని బయటకు తీశారు. కానీ అప్పటికే వారు ప్రాణాలు కోల్పోయారు. పొట్టకూటి కోసం వలస వచ్చిన యువకులు ఇలా ప్రాణాలు కోల్పోవడంతో స్థానికంగా విషాదం నెలకొంది.