Visit:
రాజన్న సిరిసిల్ల, నవంబర్‌ 30 (నమస్తే తెలంగాణ): సామాజిక సేవలో వెలమ సంక్షేమ మండలి భాగస్వామ్యం కావాలని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ పిలుపు నిచ్చారు. పేద విద్యార్థుల ఉన్నత చదువులకు తమవంతు సహకారాన్ని ఇచ్చి ప్రోత్సహించాలని సూచించారు. భావితరాలకు ఆదర్శంగా నిలువాలని ఆకాంక్షించారు. ఈ మేరకు ఆదివారం రాజన్న సిరిసిల్ల జిల్లా కేంద్రంలోని పద్మనాయక కల్యాణ మండపంలో జిల్లా వెలమ సంక్షేమ మండలి పాలకవర్గ సమావేశం జిల్లా అధ్యక్షుడు చిక్కాల రామారావు అధ్యక్షతన జరిగింది.
కేటీఆర్‌ ముఖ్య అతిథిగా హాజరయ్యారు. నూతనంగా నిర్మించిన పద్మనాయక రిక్రియేషన్‌ భవనాన్ని ప్రారంభించారు. వెలమ సంక్షేమ సంఘం చేస్తున్న అభివృద్ధి పనుల వివరాలు తెలుసుకుని జిల్లా అధ్యక్షుడు చిక్కాల రామారావును శాలువాతో సన్మానించారు. వెలమలలో అనేక మంది పేదలున్నారని, వారి సంక్షేమానికి కృషి చేస్తానని, వెలమ భవన నిర్మాణంలో ఉన్న పెండింగ్‌ పనులకు అవసరమయ్యే నిధులు తానే సమకూరుస్తానని హామీ ఇచ్చారు. వెలమ పాలకవర్గ ఎన్నికలు సమీపిస్తున్న నేపథ్యంలో ఏకగ్రీవంగా ఎన్నుకునేలా చూడాలని సూచించారు.
అనంతరం నాఫ్స్‌కాబ్‌ చైర్మన్‌ కొండూరు రవీందర్‌రావు మాట్లాడుతూ, సంక్షేమ సంఘం చేపట్టిన అభివృద్ధి పనులు కొనసాగాలని ఆకాంక్షించారు. పాలకవర్గం హయాంలో ఆస్తులు కూడబెట్టడం అభినందనీయమని కొనియాడారు. వెలమ పేద విద్యార్థులకు స్కాలర్‌షిప్‌లు అందించాలని, అకాల మరణం చెందిన కుటుంబాలకు అండగా నిలువాలని కోరారు. ఆ తర్వాత కేటీఆర్‌ ఎల్లారెడ్డిపేటకు వెళ్లి, భుజానికి శస్త్ర చికిత్స చేయించుకున్న బీఆర్‌ఎస్‌ జిల్లా అధ్యక్షుడు తోట ఆగయ్యను పరామర్శించారు. అక్కడే తనను కలిసేందుకు వచ్చిన సర్పంచ్‌ అభ్యర్థులకు ఆశీర్వాదం అందజేశారు. వీలైనంత మేర ఏకగ్రీవం కోసం ప్రయత్నం చేయాలని సూచించారు. ఆయన వెంట ప్రధాన కార్యదర్శి గుజ్జునేని వేణుగోపాల్‌రావు, కోశాధికారి బొంత వేణుగోపాల్‌రావు, ఉపాధ్యక్షులు చీటి నర్సింగరావు, శ్రీమతి బాలన్నగారి మేఘమాల, తాండ్ర శ్రీనివాసరావు, తదితరులు ఉన్నారు.
