చెక్‌ పడాల్సిందే..!

ఎన్నికల నిబంధనలు అమల్లోకి వచ్చిన నేపథ్యంలో ఉమ్మడి జిల్లా వ్యాప్తంగా ఆయా జిల్లాల సరిహద్దుల్లో 17 చెక్‌పోస్టులు ఏర్పాటు చేశారు. ఎలాంటి ఆధారాలూ లేకుండా భారీ మొత్తంలో నగదు కానీ, వస్తువులు కానీ తీసుకెళ్లరాదని ఆంక్షలు ఉండడంతో వీటిని ఎప్పటికప్పుడు పర్యవేక్షించేందుకు జిల్లాల సరిహద్దుల్లో చెక్‌పోస్టులు ఏర్పాటు చేసి క్షుణ్ణంగా తనిఖీ చేస్తున్నారు.

• ఉమ్మడి జిల్లాలో 17 చెక్‌ పోస్టులు
• ప్రతి జిల్లా సరిహద్దుల్లో ఏర్పాటు

రాంనగర్‌, అక్టోబర్‌ 12 : ఎన్నికల నిబంధనలు అమల్లోకి వచ్చిన నేపథ్యంలో ఉమ్మడి జిల్లా వ్యాప్తంగా ఆయా జిల్లాల సరిహద్దుల్లో 17 చెక్‌పోస్టులు ఏర్పాటు చేశారు. ఎలాంటి ఆధారాలూ లేకుండా భారీ మొత్తంలో నగదు కానీ, వస్తువులు కానీ తీసుకెళ్లరాదని ఆంక్షలు ఉండడంతో వీటిని ఎప్పటికప్పుడు పర్యవేక్షించేందుకు జిల్లాల సరిహద్దుల్లో చెక్‌పోస్టులు ఏర్పాటు చేసి క్షుణ్ణంగా తనిఖీ చేస్తున్నారు.

ప్రతి చెక్‌పోస్టులో ఎస్‌ఐ స్థాయి అధికారి నేతృత్వంలో సిబ్బందిని నియమించారు. ఎన్నికలు పూర్తయ్యే వరకు నిరంతరం తనిఖీలు నిర్వహించేలా చర్యలు తీసుకుంటున్నారు. కోడ్‌ అమల్లో ఉన్న నేపథ్యంలో ఎలాంటి ఆధారాలు లేకుండా డబ్బు, వస్తువులు, ఆభరణాలు కానీ తీసుకెళ్లే అవకాశం లేదు. తనిఖీల్లో పట్టుబడితే సరైన ఆధారాలు చూపిస్తే నిరభ్యంతరంగా వెళ్లిపోవచ్చు, ఆధారాలు లేకపోతే రెవెన్యూ అధికారులకు అప్పగించడంతో పాటు కేసు నమోదు చేసి, ఆదాయపు పన్ను శాఖకు సమాచారం అందిస్తారు. కోడ్‌ ముగిసేంత వరకు నిబంధనలు పాటించకపోతే ఎంతటి వారికైనా చెక్‌ పడాల్సిందే.

జిల్లాల వారీగా చెక్‌పోస్టులు

• కరీంనగర్‌ కమిషనరేట్‌లో పెద్దపల్లి వెళ్లే రహదారిలో మొగ్దుంపూర్‌ వద్ద, మంచిర్యాలకు వెళ్లే దారిలో చొప్పదండి వద్ద, హైదరాబాద్‌ రూట్‌లో గుండ్లపల్లి వద్ద, వరంగల్‌ దారిలో హుజురాబాద్‌, ములుగు రహదారిలో జమ్మికుంట శివారులో చెక్‌ పోస్టులు ఏర్పాటు చేశారు.
• జగిత్యాల జిల్లా నిజామాబాద్‌ దారిలో గండి హనుమాన్‌ చౌరస్తా, కరీంనగర్‌ రహదారిలో దొంగలమర్రి వద్ద, రాయపట్నం వద్ద ఏర్పాటు చేశారు.
• పెద్దపల్లి జిల్లాలో మంథని మండలం ఎగ్లాస్‌పూర్‌, రామగుండం కోల్‌బెల్ట్‌ ఏరియాలో, సుల్తానాబాద్‌ మండలంలోని దుబ్బపల్లి వద్ద, ఓదెల మండలం గుంపుల వద్ద చెక్‌పోస్టులు ఏర్పాటు చేశారు.
• సిరిసిల్ల జిల్లాలో సిద్దిపేట వెళ్లే దారిలో జిల్లెల్ల వద్ద, కామారెడ్డి దారిలో గంభీరావుపేట వద్ద, ముస్తాబాద్‌ మండలం బందనకల్‌ వద్ద, బోయినపల్లి మండలం నర్సింగాపూర్‌, వేములవాడ రూరల్‌ మండలం ఫాజుల్‌నగర్‌ వద్ద చెక్‌పోస్టులు ఏర్పాటు చేశారు.