Israel-Hamas War | గాజాలో ఇజ్రాయెల్‌ గ్రౌండ్‌ ఆపరేషన్‌.. రంగంలోకి యుద్ధట్యాంకులు

ఇజ్రాయెల్‌ యుద్ధ ట్యాంకులు గురువారం ఉత్తర గాజాలోకి అడుగుపెట్టాయి. హమాస్‌ స్థావరాలే లక్ష్యంగా భూతల దాడులు చేపట్టాయి. సుమారు 250 స్థావరాలే దాడులు చేసినట్టు ఇజ్రాయెల్‌ సైన్యం ప్రకటించింది.

• లక్ష్యాలపై మెరుపుదాడి చేసి తిరిగి వెనక్కి
• భూతల దాడులు మొదలుపెట్టిన సైన్యం
• ఇండియా-పశ్చిమాసియా-యూరప్‌ ఎకనమిక్‌ కారిడార్‌ వల్లే హమాస్‌ దాడి
• అమెరికా అధ్యక్షుడు బైడెన్‌ అభిప్రాయం

Israel-Hamas War | రఫా, వాషింగ్టన్‌, అక్టోబర్‌ 26: ఇజ్రాయెల్‌ యుద్ధ ట్యాంకులు గురువారం ఉత్తర గాజాలోకి అడుగుపెట్టాయి. హమాస్‌ స్థావరాలే లక్ష్యంగా భూతల దాడులు చేపట్టాయి. సుమారు 250 స్థావరాలే దాడులు చేసినట్టు ఇజ్రాయెల్‌ సైన్యం ప్రకటించింది. ఈ దాడుల్లో కొందరు మిలిటెంట్లను హతమార్చి వారి మౌలిక సదుపాయాలను, యాంటీ-ట్యాంక్‌ మిస్సైల్‌ లాంచింగ్‌ పొజిషన్లను ధ్వంసం చేసినట్టు తెలిపింది. తిరిగి యుద్ధట్యాంకులు వెనక్కి వచ్చేసినట్టు పేర్కొన్నది. మరోవైపు గాజా-లెబనాన్‌ సరిహద్దులో గురువారం వైమానిక, డ్రోన్‌ దాడులు చేసినట్టు పేర్కొన్నది. యుద్ధం కారణంగా మృతుల సంఖ్య భారీగా పెరుగుతున్నది. మందుల కొరత వల్ల క్షతగాత్రుల ఇన్‌ఫెక్షన్ల రేటు పెరుగుతున్నదని గాజాలోని ఒక వైద్యుడు తెలిపారు.

దాడులకు ఆర్థిక కారిడార్‌ ఒక కారణం!

ఇజ్రాయెల్‌పై హమాస్‌ చేసిన దాడికి ఇండియా-మధ్య ప్రాచ్యం-యూరప్‌ ఆర్థిక కారిడార్‌ ఒక కారణమని అమెరికా అధ్యక్షుడు జో బైడెన్‌ అభిప్రాయపడ్డారు. ఆస్ట్రేలియా ప్రధాని అల్బనీస్‌తో కలిసి బుధవారం ఏర్పాటు చేసిన మీడియా సమావేశంలో ఆయన ఈ వ్యాఖ్యలు చేశారు. అయితే తన అభిప్రాయానికి ఆధారాలు లేవని.. ఇజ్రాయెల్‌ అనుసంధానత, ప్రాంతీయ అనుసంధానం కోసం తాము చేస్తున్న ప్రయత్నాల వల్ల ఈ దాడులు జరిగి ఉండొచ్చన్నారు.