శనివారం 04 ఏప్రిల్ 2020
International - Mar 20, 2020 , 03:12:48

తైవాన్‌ విజయగాథ

తైవాన్‌ విజయగాథ

  • చైనా పక్కనే ఉన్నా..
  • వైరస్‌ను అడ్డుకోగలిగిన సమర్ధత
  • తొలినుంచే జాగ్రత్త చర్యలు 

చైనాలో పుట్టిన కరోనా వైరస్‌.. వేల కిలోమీటర్ల దూరం ప్రయాణించి ఖండాంతరాలకు విస్తరించింది. చైనా నుంచి 11,600 కి.మీ దూరంలో ఉన్న అగ్రరాజ్యం అమెరికాను సైతం చివురుటాకులా వణికిస్తున్నదంటే పరిస్థితి అర్థం చేసుకోవచ్చు. అమెరికాలో ఇప్పటివరకు 9,486 మందికి వైరస్‌ సోకగా, 174 మంది మరణించారు. అయితే.. చైనాకు పక్కనే ఉన్న తైవాన్‌, వియత్నాం వంటి చిన్న దేశాలు మాత్రం కరోనాకు ఎదురునిలిచాయి. తమ దేశంలో వైరస్‌ విజృంభించకుండా  అడ్డుకోవడంలో విజయం సాధించాయి. ముఖ్యంగా తైవాన్‌ తీసుకున్న చర్యలు ప్రపంచానికి ఆదర్శంగా నిలుస్తున్నాయి. చైనాలోని వుహాన్‌లో వైరస్‌ వ్యాప్తి చెందడం మొదలుకాగానే తైవాన్‌కు చెందిన ‘సెంటర్స్‌ ఫర్‌ డిసీజ్‌ కంట్రోల్‌' (సీడీసీ) అప్రమత్తమైంది. తైవాన్‌లో జనవరి 21న మొదటి కరోనా కేసు నమోదైంది. 

ప్రయాణికులకు పరీక్షలు 

అన్ని దేశాల కంటే ముందుగానే తైవాన్‌ ప్రభుత్వం.. డిసెంబర్‌ 31న వుహాన్‌ నుంచి వచ్చే ప్రయాణికులకు వైద్యపరీక్షలు తప్పనిసరి చేసింది. ఆ సమయంలో వుహాన్‌లో కేవలం 27 కేసులు మాత్రమే నమోదయ్యాయి. ‘కొవిడ్‌-19’ దీనికి కారణమని నిర్ధారణ కాలేదు. డిసెంబర్‌ 21వ తేదీ నుంచి వుహాన్‌ మీదుగా తైవాన్‌కు వచ్చిన ప్రయాణికులందరికీ పరీక్షలు నిర్వహించాలని జనవరి 5న నిర్ణయించింది. వారికి సార్స్‌ వంటి 26 రకాల వైరల్‌ వ్యాధుల పరీక్షలు చేసింది. పాజిటివ్‌ వచ్చినవారిని వెంటనే క్వారంటైన్డ్‌ కేంద్రాలకు తరలించింది. జనవరి 20 నుంచి వ్యక్తిగత పరిశుభ్రతపై ప్రచారం మొదలుపెట్టింది. 


అందుబాటులో మాస్కులు.. 

తైవాన్‌ ప్రభుత్వం జనవరి 20న మాస్కుల తయారీని వేగవంతం చేసింది. 24న మాస్కుల ఎగుమతిపై నిషేధం విధించింది. సైన్యాన్ని రంగంలోకి దింపి యుద్ధప్రాతిపదికన మాస్కుల తయారీ మొదలుపెట్టింది. కొత్తగా 62 ఫ్యాక్టరీలను ప్రారంభించింది. ఫిబ్రవరి 6వ తేదీ నుంచి ప్రజలందరికీ పంపిణీ చేయడం మొదలుపెట్టింది. ఒకేసారి ఎక్కువ మొత్తంలో కొనుగోలు చేయకుండా ఆంక్షలు విధించింది. తద్వారా అందరికీ సరిపడా మాస్కులు అందాయి. 

వ్యాప్తిని అడ్డుకునేందుకు.. 

వైరస్‌ వ్యాప్తి చెందకుండా తైవాన్‌ ప్రభుత్వం ఫిబ్రవరి 2వ తేదీ నుంచి విద్యాసంస్థలకు సెలవులు ప్రకటించింది. మొదటివారం నుంచే సానిటైజర్ల ఉత్పత్తిని రెట్టింపు చేసింది. 25న క్వారంటైన్డ్‌ దవాఖానను నెలకొల్పింది. అన్ని దేశాలు స్టేజ్‌-1, స్టేజ్‌-2 హెచ్చరికలు జారీ చేస్తున్న సమయంలోనే తైవాన్‌ ఏకంగా స్టేజ్‌-3 హెచ్చరికలు జారీ చేసి ఆంక్షలను కఠిన తరం చేసింది. మాస్కులు, గ్లౌజులు వంటివాటితోపాటు వైద్యసిబ్బందిని సిద్ధంగా ఉంచింది. ఫలితంగా చైనా పక్కనే ఉన్నా.. మొదటి కేసు నమోదై రెండు నెలలు దాటినా.. తైవాన్‌లో ఇప్పటికీ కేసుల సంఖ్య 108కే పరిమితమైంది. ఇందులో 26 మంది కోలుకోగా, ఒకరు మాత్రమే మరణించారు. 


logo