Traffic | ట్రాఫిక్‌ అస్తవ్యస్థం.. రోడ్లపైకి చిరువ్యాపారాలు.. వాహనాల పార్కింగులు..

ఉదయం మొదలు...రాత్రి పన్నెండు గంటల వరకు మణికొండ, నార్సింగి పట్టణ కేంద్రాలల్లో ట్రాఫిక్‌ రద్దీ రోజురోజుకు పెరిగిపోతుంది. చిన్నచిన్న వ్యాపారాలు ఫుట్‌పాత్‌లపై నిర్వహిస్తుండటంతో అక్కడకు వచ్చే వాహనదారులు రోడ్లపైనే తమ వాహనాలను పార్కింగి చేయాల్సి వస్తోంది.

• అపరిష్కృతంగా మారిన రద్దీ సమస్య.. పట్టించుకోని ట్రాఫిక్‌ పోలీసులు

Traffic | మణికొండ, జనవరి 6 : ఉదయం మొదలు…రాత్రి పన్నెండు గంటల వరకు మణికొండ, నార్సింగి పట్టణ కేంద్రాలల్లో ట్రాఫిక్‌ రద్దీ రోజురోజుకు పెరిగిపోతుంది. చిన్నచిన్న వ్యాపారాలు ఫుట్‌పాత్‌లపై నిర్వహిస్తుండటంతో అక్కడకు వచ్చే వాహనదారులు రోడ్లపైనే తమ వాహనాలను పార్కింగి చేయాల్సి వస్తోంది.

ఫలితంగా రోడ్డుపై వెళ్లే వారికి నిత్యం గంటల తరబడి ట్రాఫిక్‌ రద్దీ పెరిగి అస్తవ్యస్థంగా ప్రధాన కూడళ్లు తయారయ్యాయి. ప్రధానంగా మణికొండ మున్సిపాలిటీ పరిధిలోని మర్రిచెట్టు సర్కిల్‌, ఆర్టీఏ కార్యాలయం వెళ్లే రహదారి, ఆంధ్రాబ్యాంకు సర్కిల్‌, అలిజాపూర్‌ చింతచెట్టు సర్కిల్‌, నార్సింగి మున్సిపాలిటీ పరిధిలో నార్సింగి టీ జంక్షన్‌, వైయస్సార్‌ జంక్షన్‌, సబ్‌ రిజిస్టార్‌ కార్యాలయ సర్కిల్‌ల్లో నిత్యం ట్రాఫిక్‌ రద్దీ ఉంటుంది.

• మణికొండ మున్సిపాలిటీ పరిధిలోని మర్రిచెట్టు సర్కిల్‌, ఆర్టీఏ కార్యాలయ ప్రాంతం నుంచి పంచవటికాలనీ వరకు రోడ్డుకు రెండు వైపులా చిన్నచిన్న వ్యాపార కేంద్రాలన్నీ రోడ్లపైకి వచ్చేశాయి. దీంతో వాహనాల పార్కింగులు మొత్తం రోడ్లపై పెడుతుండటంతో అత్యవసరంగా ముందు కు వెళ్లాల్సిన వారికి ఇబ్బందులు తప్పడం లేదని ప్రజలు వాపోతున్నారు. రోడ్లను చుట్టుపక్కలా విస్తరించి, చిరు వ్యాపారులకు ప్రత్యామ్నాయ మార్గాలను అన్వేషించాల్సిన అవసరం ఉందని మణికొండ వాసులు కోరుతున్నారు.
• మణికొండ ఆర్టీఏ కార్యాలయం-శివాలయ ప్రాంగణంలో ట్రాఫిక్‌ అస్తవ్యస్థంగా తయారైంది. ఆంధ్రాబ్యాంకు సర్కిల్‌లో ప్రతి నిత్యం గంటల తరబడి రద్దీ ఉంటుంది.
• అలిజాపూర్‌ ప్రాంతంలో సాయంత్రం సమయంలో ట్రాఫిక్‌ రద్దీ పెరుగుతుంది. అధికారులు ఈ ప్రాంతాలపై కంటితుడుపు చర్యలు తీసుకుంటుండటంతో రోజురోజు పరిస్థితులు దయనీయంగా మారుతున్నాయని స్థానికులు వాపోతున్నారు.
• నార్సింగి మున్సిపాలిటీ పరిధిలోని నార్సింగి టీ జంక్షన్‌ నుంచి వైయస్సార్‌ సర్కిల్‌ వరకు ఎక్కడా యూ టర్న్‌ లేకపోవడంతో గచ్చిబౌలి, శంకర్‌పల్లి, ఆరేమైసమ్మ రహదారుల నుంచి వచ్చే వాహనాలు ఉదయం, సాయంత్రం వేళల్లో తరలివస్తుంటాయి. దీంతో ఇక్కడ ట్రాఫిక్‌ రద్దీ గంటల సమయం పడుతుండటంతో ప్రజలు ఇబ్బందులను ఎదుర్కొంటున్నారు.
• నార్సింగి టీ జంక్షన్‌ వద్ద ఒకరిద్దరు కానిస్టేబుళ్లు విధులు నిర్వహిస్తున్నా ఈ రద్దీని నిలువరించడం సాధ్యం కావడం లేదని తెలుస్తుంది. ఈ ప్రాంతంలో ట్రాఫిక్‌ సిగ్నళ్లను ఏర్పాటు చేస్తే సమస్యలు కొంతమేర అధిగమించవచ్చునని ప్రజలు అంటున్నారు.
• ట్రాఫిక్‌ పోలీసులు కేవలం చలాన్లపై అధిక దృష్టి సారిస్తుండటంతో ట్రాఫిక్‌ అస్తవ్యస్తంగా మారిపోతుందని, అనేక మంది ప్రజలు బాహటంగానే పోలీసుల తీరుపై విస్మయం వ్యక్తంచేస్తున్నారు. ప్రజలు ఎదుర్కొంటున్న ట్రాఫిక్‌ సమస్యలపై ఉన్నతాధికారులు సకాలంలో స్పందించి ప్రత్యామ్నాయ చర్యలకు ఉపక్రమించాలని వాహనదారులు విన్నవిస్తున్నారు.