కేసీఆర్‌ నగర్‌..గృహప్రవేశం

రాష్ట్ర ప్రభుత్వం ఎంతో ప్రతిష్టాత్మకంగా కొల్లూరులో 145 ఎకరాల విస్తీర్ణంలో 117 బ్లాక్‌లలో 15,660 డబుల్‌ బెడ్‌రూం ఇండ్లను నిర్మించింది. ఆసియాలోనే అతిపెద్ద సామాజిక గృహ సముదాయాన్ని రాష్ట్ర ముఖ్యమంత్రి కేసీఆర్‌ గురువారం ప్రారంభించారు.

• కొల్లూరులో డబుల్‌ బెడ్‌రూం ఇండ్లను ప్రారంభించిన సీఎం కేసీఆర్‌
• లబ్ధిదారులకు ఇండ్ల పట్టాలు, ఇంటి తాళాలను అందజేసిన సీఎం
• బగ్గీలో డబుల్‌ బెడ్‌రూం ఇండ్ల సముదాయం పరిశీలన

రామచంద్రాపురం, జూన్‌ 22 : రాష్ట్ర ప్రభుత్వం ఎంతో ప్రతిష్టాత్మకంగా కొల్లూరులో 145 ఎకరాల విస్తీర్ణంలో 117 బ్లాక్‌లలో 15,660 డబుల్‌ బెడ్‌రూం ఇండ్లను నిర్మించింది. ఆసియాలోనే అతిపెద్ద సామాజిక గృహ సముదాయాన్ని రాష్ట్ర ముఖ్యమంత్రి కేసీఆర్‌ గురువారం ప్రారంభించారు. ఈ సందర్భంగా ముఖద్వారంలో ఏర్పాటు చేసిన శిలాఫలకాన్ని సీఎస్‌ శాంతికుమారి, రాష్ట్ర మంత్రులు కేటీఆర్‌, హరీశ్‌రావు, ప్రశాంత్‌రెడ్డి, మహమూద్‌అలీ, మల్లారెడ్డి, సబితాఇంద్రారెడ్డిలతో కలిసి సీఎం కేసీఆర్‌ ఆవిష్కరించారు. అనంతరం బగ్గీ వాహనంలో సీఎం కేసీఆర్‌ డబుల్‌ బెడ్‌రూం ఇండ్ల సముదాయాన్ని మొత్తం తిరిగి పరిశీలించారు. ప్రాజెక్టు వివరాలను మంత్రి కేటీఆర్‌, అధికారులు సీఎం కేసీఆర్‌కు వివరించారు. ఆ తర్వాత 93వ బ్లాక్‌లో ఏర్పాటు చేసిన స్టేజీ వద్దకు సీఎం కేసీఆర్‌ చేరుకొని డబుల్‌ బెడ్‌రూం ఇండ్ల లబ్ధిదారులకు ఇండ్ల పట్టాలు, ఇంటి తాళాలను అందజేశారు. అనంతరం లబ్ధిదారులు గృహప్రవేశం చేశారు.

• లబ్ధిదారులకు కేటాయించిన డబుల్‌ బెడ్‌రూం ఇండ్లను రాష్ట్ర గృహనిర్మాణ శాఖ మంత్రి వేముల ప్రశాంత్‌రెడ్డి, హెచ్‌ఎండీఏ స్పెషల్‌ చీఫ్‌ సెక్రటరీ అర్వింద్‌కుమార్‌ ఐఏఎస్‌, డీఈసీ ఇన్‌ఫ్రా ప్రైవేట్‌ లిమిటెడ్‌ ఎండీ అనిరుధ్‌ గుప్తా ప్రారంభించి ప్రత్యేక పూజలో పాల్గొన్నారు.
• రాష్ట్ర మున్సిపల్‌, ఐటీ శాఖ మంత్రి కేటీఆర్‌ తానే స్వయంగా బగ్గీని డ్రైవ్‌ చేస్తూ డబుల్‌ బెడ్‌రూం ఇండ్ల సముదాయాన్ని పరిశీలించారు.
• జీవితంలో సొంతిళ్లు వస్తదని అనుకోలేదని, సీఎం కేసీఆర్‌ చేతుల మీదుగా ఇంటి పట్టాలు అందుకోవడం చాలా అదృష్టంగా భావిస్తున్నామని లబ్ధిదారులు పేర్కొన్నారు.