ట్రాక్టర్లు..వాటర్‌ ట్యాంకర్లు

సైబరాబాద్‌ కమిషనరేట్‌ పరిధిలో రోజురోజుకు పెరుగుతున్న రద్దీని దృష్టిలో పెట్టుకుని భారీ వాహనాలపై ఆంక్షలు విధించడంతో పాటు కొన్ని నిబంధనలను కఠినంగా అమలు చేయనున్నట్లు ట్రాఫిక్‌ డీసీపీ డీవీ శ్రీనివాసరావు తెలిపారు.

• వివిధ వాహనాలపై ఆంక్షలు
• సైబరాబాద్‌ పరిధిలో నిర్దేశిత సమయాల్లో అమలు

సిటీబ్యూరో, జనవరి 18 (నమస్తే తెలంగాణ): సైబరాబాద్‌ కమిషనరేట్‌ పరిధిలో రోజురోజుకు పెరుగుతున్న రద్దీని దృష్టిలో పెట్టుకుని భారీ వాహనాలపై ఆంక్షలు విధించడంతో పాటు కొన్ని నిబంధనలను కఠినంగా అమలు చేయనున్నట్లు ట్రాఫిక్‌ డీసీపీ డీవీ శ్రీనివాసరావు తెలిపారు. గురువారం గచ్చిబౌలిలోని తన కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడుతూ వాహనదారులు, ప్రజలకు ట్రాఫిక్‌ ఇబ్బందుల నుంచి ఉపశమనం కలిగించేందుకు కొన్ని ఆంక్షలు, నిబంధనలను అమలు చేస్తున్నామన్నారు. ఇందులో భాగంగా భారీ వాహనాల రాకపోకలపై పలు ఆంక్షలు విధిస్తున్నట్లు తెలిపారు.

ఆంక్షలు..

• భారీ వాహనాలు, మధ్య స్థాయి వాహనాలు (డీసీఎం, వాటర్‌ ట్యాంకర్లు, ఆర్‌ఎంసీ, జేసీబీ, ట్రాక్టర్లు) ఉదయం 7.30 గంటల నుంచి 11.30 గంటల వరకు, సాయంత్రం 4 గంటల నుంచి రాత్రి 10.30 గంటల వరకు నిషేధం విధించారు. కన్‌స్ట్రక్షన్‌ అండ్‌ డెమాలిషన్‌ తదితర వాహనాలకు ఉదయం 6 గంటల నుంచి రాత్రి 10.30 గంటల వరకు రోడ్లపై నిషేధం విధించారు. అన్ని రకాల భారీ గూడ్స్‌, నెమ్మదిగా కదిలే వాహనాలకు ఫ్లై ఓవర్లపై నిషేధం విధించారు.
• నిషేధిత సమయాల్లో పైన పేర్కొన్న వాహనాలు రాకపోకలు సాగిస్తే ఎంవీ చట్టం ప్రకారం మొదటిసారి జరిమానా విధిస్తామని, రెండోసారి ఉల్లంఘనకు పాల్పడితే వాహనాలను సీజ్‌ చేస్తామని డీసీపీ హెచ్చరించారు.
• మల్టీప్లెక్స్‌ థియేటర్‌, ఇతర వ్యాపార భవనాల నిర్వాహకులు సరైన పార్కింగ్‌ స్థలం లేకుండా వాహనాలను రోడ్లపై నిలిపితే వారికి నోటీసులు జారీచేయడంతో పాటు తగిన చర్యలు తీసుకుంటామన్నారు.
• పాదాచారులు రోడ్డు ప్రమాదాల బారిన పడకుండా కమిషనరేట్‌ పరిధిలో మొత్తం 55 పెలికాన్‌ సిగ్నల్స్‌ను ఏర్పాటు చేశామని, వీటితో పాటు రోడ్లకు ఇరువైపులా ఏర్పాటు చేసిన ఫుట్‌పాత్‌లను, పెద్ద పెద్ద కూడళ్ల వద్ద ఫుట్‌ ఓవర్‌ బ్రిడ్జిలను పాదాచారులు వినియోగించుకోవాలని సూచించారు.
• ఆటోడ్రైవర్లు, క్యాబ్‌డ్రైవర్లు, ఇతర వాహనాలు నడిపే డ్రైవర్లు కచ్చితంగా యూనిఫామ్‌లు ధరించాలి.
• రాంగ్‌రూట్‌లో వాహనాలు నడిపి యాక్సిడెంట్‌లకు కారణమైతే సెక్షన్‌ 304 కింద కేసులు నమోదు చేసి చర్యలు తీసుకుంటామని, ఫుట్‌పాత్‌ను ఆక్రమించిన వ్యాపారులు, ఇతరులపై చట్టప్రకారం చర్యలు తప్పవని డీసీపీ హెచ్చరించారు.