సహాయక చర్యలు ముమ్మరం

ఖైరతాబాద్‌ నియోజకవవర్గంలో వరుసగా కురుస్తున్న వర్షాలతో ప్రజలు తీవ్ర ఇబ్బందులు ఎదుర్కొన్నారు. బుధవారం రాత్రి ప్రారంభమైన వర్షం గురువారం మొత్తం కొనసాగింది.

• కొనసాగుతున్న భారీ వర్షాలు
• బంజారాహిల్స్‌లో రికార్డు స్థాయిలో వర్షపాతం
• ఇబ్బందులు పడుతున్న జనం

బంజారాహిల్స్‌/ఖైరతాబాద్‌,జూలై 27: ఖైరతాబాద్‌ నియోజకవవర్గంలో వరుసగా కురుస్తున్న వర్షాలతో ప్రజలు తీవ్ర ఇబ్బందులు ఎదుర్కొన్నారు. బుధవారం రాత్రి ప్రారంభమైన వర్షం గురువారం మొత్తం కొనసాగింది. దీంతో ప్రధాన రహదారులతో పాటు బస్తీలు, కాలనీల్లోని ఇళ్లలో వరదనీరు చేరింది.

• నియోజకవర్గంలో అత్యధికంగా బంజారాహిల్స్‌ రోడ్డు నంబర్‌ 12లో 8 సెంమీ వర్షపాతం నమోదైంది.
• జూబ్లీహిల్స్‌లో 7 సెంమీ, పంజాగుట్టలోని సెస్‌లో 6.8 సెంమీ, డా.ఎంసీహెచ్‌ఆర్‌డీలో 6.4 సెంమీ, శ్రీనగర్‌ కాలనీలో 6.2 సెంమీ, బంజారాహిల్స్‌ రోడ్డు నంబర్‌ 3లో 6సెంమీ, ఖైరతాబాద్‌లోని గణాంక భవన్‌3.5సెంమీ వర్షపాతం నమోదైంది. భారీ వర్షాలతో ఫిలింనగర్‌లోని కొన్ని బస్తీల్లో వరదనీటి ప్రవాహానికి రోడ్లు దెబ్బతిన్నాయి.
• బంజారాహిల్స్‌ రోడ్డు నంబర్‌ 12లోని ఎన్‌బీటీనగర్‌లో పెద్ద ఎత్తున వరదనీరు ప్రవహించడంతో స్థానికులు ఇబ్బందులు పడ్డారు.
• ఖైరతాబాద్‌ డివిజన్‌ పరిధిలోని ఎంఎస్‌ మక్తా, రాజ్‌నగర్‌ తదితర ప్రాంతాల్లో భారీగా వరదనీరు నిలిచిపోయింది.
• హిమాయత్‌నగర్‌ డివిజన్‌లోకి స్ట్రీట్‌ నంబర్‌ 14లోని బస్తీల్లో భారీగా వరదనీరు ఇళ్లలోకి చేరింది. హుస్సేన్‌సాగర్‌ నుంచి భారీగా వరదనీరు వదిలిపెట్టడంతో కింది భాగంలో ఉన్న బస్తీల ప్రజలను జీహెచ్‌ఎంసీ అధికారులు అప్రమత్తం చేశారు. లోతట్టు ప్రాంతాల్లో నివాసం ఉంటున్న వారిని సురక్షిత ప్రాంతాల్లోకి తరలించారు. కాగా జీహెచ్‌ఎంసీ మాన్సూన్‌ బృందం సభ్యులు ప్రధాన రహదారుల్లో వర్షపు నీరు నిలవకుండా ప్రత్యేకంగా మోటార్లను ఏర్పాటు చేసి ఎప్పటికప్పుడు నీటిని తోడేశారు. దీంతో ట్రాఫిక్‌కు ఇబ్బందులు లేకుండా సాఫీగా సాగిపోయింది.
• మోటారు ద్వారా పంపింగ్‌

ఖైరతాబాద్‌ డివిజన్‌లోని ఓల్డ్‌ సీఐబీ క్వార్టర్స్‌, బీఎస్‌ మక్తా, హరిగేట్‌, ఎంఎస్‌ మక్తాలు లోతట్టు ప్రాంతాలుగా ఉన్నాయి. ఇక్కడ వర్షా కాలంలో పెద్ద ఎత్తున వరద నీరు నిల్వ ఉంటుందని, గత సంవత్సరం విజయవంతంగా నీటిని క్రమబద్ధీకరించిన అధికారులు ఈ ఏడాది అలాంటి సమస్య రాకుండా ముందస్తు చర్యలు చేపట్టారు. టిప్పర్లలో సిబ్బందితో పాటు మోటార్లను అక్కడికి తరించారు. ఓల్డ్‌ సీఐబీ క్వార్టర్స్‌కు చెందిన వరద నీటిని మింట్‌ కాంపౌండ్‌లో మోటార్ల సాయంతో తోడివేస్తున్నారు. అలాగే బీఎస్‌మక్తా నీటిని ఎస్టీపీలోకి, ఎంఎస్‌మక్తాలో వరదనీటిని నెక్లెస్‌రోడ్‌లోకి వదులుతున్నారు. బల్దియా ఇంజినీరింగ్‌ విభాగం పర్యవేక్షణలో పనులు జరుగుతున్నాయని డీఈ చైతన్య తెలిపారు.